تاشكەنتتە دارىگەرلەر سيام ەگىزدەرىن اجىراتۋ بويىنشا كۇردەلى وپەراتسيا جاسادى، دەپ حابارلايدى "ادىرنا" ۇلتتىق پورتالى ازاتتىق راديوسىنا سىلتەپ.
بۇل اقپاراتتى وزبەكستاننىڭ دەنساۋلىق ساقتاۋ مينيسترلىگىنىڭ ءباسپاسوز قىزمەتى تاراتتى.
سيام ەگىزدەرى 33–34 اپتادا دۇنيەگە كەلگەن. دارىگەرلەر سابيلەر تۋعاننان كەيىن نەبارى 9 ساعات وتكەن سوڭ، بەس ساعاتقا سوزىلعان حيرۋرگيالىق وپەراتسيانى ءساتتى اياقتاعان.
باق حابارلاۋىنشا، وپەراتسيانى مەديتسينا عىلىمدارىنىڭ دوكتورى، پروفەسسور، رەسپۋبليكالىق پەريناتالدىق ورتالىق جانىنداعى نەوناتالدىق حيرۋرگيا ورتالىعىنىڭ جەتەكشىسى باحتيور ەرگاشەۆتىڭ باسشىلىعىمەن جوعارى بىلىكتى ماماندار توبى جۇرگىزدى.
وپەراتسيا شىرشىق قالاسىنداعى انا مەن بالا دەنساۋلىعىنىڭ رەسپۋبليكالىق عىلىمي-تاجىريبەلىك ورتالىعىنىڭ تاشكەنت وبلىستىق فيليالىندا ءوتتى.
وزبەكستان دەنساۋلىق ساقتاۋ ءمينيسترى اسيلبەك حۋداياروۆ بۇل وقيعانى وتاندىق مەديتسينانىڭ دامۋىنىڭ جاڭا دەڭگەيگە كوتەرىلگەنىنىڭ دالەلى دەپ اتاپ ءوتتى.
«سيام ەگىزدەرىن شۇعىل تۇردە، ايماقتىق دەڭگەيدە ءساتتى اجىراتۋ — بۇل وزبەك مەديتسيناسىنىڭ مۇمكىندىكتەرى كەڭەيىپ كەلە جاتقانىن كورسەتەدى»، — دەدى مينيستر.
وپەراتسياعا قاتىسقان دارىگەرلەر توبىنا مينيستر «وزبەكستان رەسپۋبليكاسىنىڭ دەنساۋلىق ساقتاۋ ۇزدىگى» توسبەلگىسىن تابىستادى.
