اباي وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتى حالىقتىڭ ءومىر ساپاسىن جاقسارتۋ مەن دەنساۋلىعىن ساقتاۋ باعىتىندا جۇيەلى شارالاردى جۇزەگە اسىرىپ جاتىر. بۇل تۋرالى وڭىرلىك كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا دەپارتامەنت باسشىسىنىڭ ورىنباسارى ايگۇل توقتاباەۆا باياندادى.
- دەنساۋلىق ساقتاۋدى دامىتۋدىڭ 2026 جىلعا دەيىنگى تۇجىرىمداماسى شەڭبەرىندە ددسۇ-نىڭ «دەنساۋلىقتى نىعايتۋعا ىقپال ەتەتىن مەكتەپتەر»، «سالاۋاتتى ۋنيۆەرسيتەتتەر»، «سالاماتتى جۇمىس ورىندارى» جانە «سالاماتتى قالالار» جوبالارى ىسكە اسىرىلىپ جاتىر. اتالعان جوبالاردىڭ بارلىعىنىڭ تۇپكى ماقساتى – حالىقتىڭ دەنساۋلىعىن ساقتاۋ جانە نىعايتۋ بولىپ تابىلادى، - دەپ اتاپ ءوتتى سپيكەر.
سونىمەن قاتار، اباي وبلىسىندا دۇنيەجۇزىلىك دەنساۋلىق ساقتاۋ ۇيىمىنىڭ باستامالارى اياسىندا ىسكە اسىرىلىپ جاتقان جوبالار تۋرالى تاۋەكەلدەردى مونيتورينگىلەۋ، تالداۋ جانە باعالاۋ ءبولىمىنىڭ باسشىسى ايجان احاتاەۆا كەڭىنەن تارقاتتى.
- «سالاماتتى مەكتەپ» جوباسى بويىنشا 125 مەكتەپ قامتىلىپ، وقۋشىلاردىڭ دەنساۋلىعىن نىعايتۋ مەن دۇرىس ءومىر سالتىن قالىپتاستىرۋ جۇمىستارى جۇرگىزىلۋدە. «سالاۋاتتى ۋنيۆەرسيتەتتەر» جوباسى شەڭبەرىندە سەمەي مەديتسينا ۋنيۆەرسيتەتى ستۋدەنتتەر اراسىندا سالاۋاتتى ءومىر سالتىن ناسيحاتتاۋدا. سونىمەن قاتار، «سالاماتتى جۇمىس ورىندارى» جوباسىنا «سەمەي تسەمەنت زاۋىتى» قاتىسىپ، ەڭبەك جاعدايىن جاقسارتۋ شارالارىن جۇزەگە اسىرۋدا. ال «سالاماتتى قالالار» جوباسى 2026 جىلى باستاۋ الادى، - دەدى ايجان احاتاەۆا.
