اقمولا وبلىسى دەنساۋلىق ساقتاۋ باسقارماسىنىڭ بۇرىنعى باسشىسى مەن كاسىپكەر توعىز جىلعا باس بوستاندىعىنان ايىرىلدى، دەپ حابارلايدى “ادىرنا” قازينفورمعا سىلتەمە جاساپ.
دەنساۋلىق ساقتاۋ سالاسىندا قىلمىسقا جول بەرگەندەردىڭ ءبىرى الاياقتىققا كومەكتەسكەنى ءۇشىن، ەكىنشىسى – تىكەلەي اسا ءىرى كولەمدە الاياقتىق جاساعانى ءۇشىن سوتتالعان.
وبلىستىق سوتتىڭ ءباسپاسوز قىزمەتى حابارلاعانداي، ايىپتالۋشىلار اراسىندا بۋراباي اۋدانىنداعى دەنساۋلىق ساقتاۋ نىساندارىن سەنىمگەرلىك باسقارۋعا بەرۋ تۋرالى شارت جاسالعان.
ورتاق شارتقا سايكەس سەرىكتەستىك ستاندارتتار مەن تەحنيكالىق شارتتارعا، ساپا كورسەتكىشتەرىنە، سونداي-اق دارىلىك زاتتار مەن پرەپاراتتار، مەديتسينالىق ماقساتتاعى بۇيىمداردى، فارماتسەۆتيكالىق قىزمەتتەردى ساتىپ الۋدى ۇيىمداستىرۋ جانە وتكىزۋ قاعيدالارى مەن كودەكستىڭ تالاپتارىنا سايكەس كەلەتىن جاڭا ءارى بۇرىن قولدانىستا بولماعان مەديتسينالىق تەحنيكانى ساتىپ الۋعا مىندەتتەلگەن.
الايدا ەكى تاراپ 1 ميلليارد تەڭگەدەن استام قاراجاتتى يەمدەنىپ، تالاپقا ساي ەمەس مەديتسينالىق قۇرال-جابدىقتاردى جەتكىزىپ، سونىڭ سالدارىنان مەملەكەتكە اسا ءىرى كولەمدە زالال كەلتىرگەنى بەلگىلى بولدى.
«سوت جازا تاعايىنداۋ كەزىندە جاۋاپتىلىقتى اۋىرلاتاتىن ءمان-جايلاردى نازارعا الدى: ك. جانە ي. لاۋازىمدى ادامدار بولا وتىرىپ، انت ءىشىپ، قىزمەتتىك بابىن پايدالانىپ، قىلمىس جاساپ، ماتەريالدىق زالالدى وتەمەگەن. سوت ۇكىمىمەن ك. مەن ي. ءومىر بويىنا مەملەكەتتىك قىزمەتتە لاۋازىمداردى اتقارۋ قۇقىعىنان ايىرا وتىرىپ، ارقايسىسىنا 9 جىل باس بوستاندىعىنان ايىرۋ جازاسى تاعايىندالدى. سونىمەن قاتار، ك.-نىڭ مۇلكى – اۆتوكولىك تاركىلەندى»، - دەپ تولىقتىردى ۆەدومستۆودان.
تولىقتىرىپ وتەيىك، وتكەن جىلى بۇل ءىس بويىنشا ايىپتالۋشىلاردىڭ ءبىرى، اقمولا وبلىسى دەنساۋلىق ساقتاۋ باسقارماسىنىڭ بۇرىنعى باسشىسى باسقا ءىس بويىنشا سوتتالعان ەدى. سودان كەيىن ەلدە جاريالانعان توتەنشە جاعداي كەزىندە بيۋدجەت قاراجاتىن جىمقىرعانى ءۇشىن وعان جانە جشس ديرەكتورىنا سەگىز جىلعا باس بوستاندىعىنان ايىرۋ جانە 86,8 ميلليون تەڭگە ماتەريالدىق شىعىندى وتەۋ تاعايىندالدى.
