13 قىركۇيەك كۇنى سەيسمولوگتار كامچاتكانىڭ شىعىس جاعالاۋىندا جەر سىلكىنىسىن تىركەدى، دەپ حابارلايدى “ادىرنا” ۇلتتىق پورتالى.
رەسەيدىڭ گەوفيزيكالىق قىزمەتىنىڭ دەرەگىنشە، جەر سىلكىنىسىنىڭ ەپيتسەنترى پەتروپاۆلوۆسك-كامچاتسكي قالاسىنان 123 شاقىرىم جەردە، تىنىق مۇحيتىندا ورنالاسقان. ماگنيتۋداسى 6,3 بالل دەپ باعالانعان. الايدا ۆۋلكانولوگيا جانە سەيسمولوگيا ينستيتۋتىنىڭ كامچاتكاداعى توبى ءدۇمپۋدىڭ قۋاتى 7,7 بالل بولعانىن مالىمدەدى.
جەر سىلكىنىسىنەن كەيىن تۇبەكتە تسۋنامي قاۋپى جاريالاندى. جەرگىلىكتى تجم مالىمەتىنشە، تولقىنداردىڭ بيىكتىگى 120 سانتيمەترگە جەتۋى مۇمكىن.
توتەنشە جاعداي قىزمەتى تۇرعىندارعا تەڭىز جاعاسىنان الىستاۋدى ۇسىندى. سونداي-اق تەڭىزدە جۇرگەن كەمەلەرگە 50 مەترلىك يزوباتا شەگىنەن شىعىپ، مۇحيتقا باعىت الۋ جونىندە ەسكەرتىلدى.
ەسكە سالا كەتەيىك، شىلدە ايىنىڭ سوڭىندا كامچاتكا جاعالاۋىنان 161 شاقىرىم جەردە ماگنيتۋداسى 8,5 بالدىق جەر سىلكىنىسى تىركەلسە، تامىز ايىنىڭ باسىندا شىعىس جاعالاۋدا ماگنيتۋداسى 5,3 باللدى قۇرايتىن جەراستى دۇمپۋلەرى بولعان ەدى.
