فوتو: Rus.team
الەمگە تانىمال موتيۆاتسيالىق سپيكەر، جازۋشى ءارى كاسىپكەر برايان ترەيسي 12 قاراشا كۇنى 82 جاسىندا ومىردەن ءوتتى. ول جەكە دامۋ، كوشباسشىلىق، ۋاقىتتى ءتيىمدى پايدالانۋ جانە ماقساتقا جەتۋ تاقىرىپتارىنداعى ەڭبەكتەرىمەن كەڭىنەن تانىلعان.
برايان ترەيسي كانادانىڭ شارلوتتاۋن قالاسىندا دۇنيەگە كەلگەن. قارجىلىق قيىندىقتاردى باستان وتكەرگەن وتباسىندا وسكەن ول مەكتەپتى تولىق اياقتاماي، ەڭبەككە ەرتە ارالاسقان. جاستىق شاعىندا اعاش وڭدەۋ كاسىپورىندارىندا، فەرمالار مەن قۇرىلىس الاڭدارىندا جۇمىس ىستەپ، جۇك كەمەسىندە تەڭىزشى بولعان.
ومىرىندەگى وسى تاجىريبەلەر ونىڭ ادام مۇمكىندىكتەرى مەن جەتىستىككە جەتۋ جولدارىن زەرتتەۋگە دەگەن قىزىعۋشىلىعىن ارتتىردى. كەيىن بۇل قىزىعۋشىلىق كاسىبي قىزمەتىنە اينالىپ، ول جەكە جانە كاسىبي دامۋ سالاسىندا تانىمال ساراپشىلاردىڭ ءبىرى بولدى.
ترەيسي Brian Tracy International كومپانياسى ارقىلى جەكە تۇلعالار مەن ۇيىمدارعا كوشباسشىلىق، ساتۋ، ماقسات قويۋ، ەڭبەك ونىمدىلىگى جانە ءوزىن-ءوزى دامىتۋ باعىتتارىندا كەڭەس بەردى. ول الەمنىڭ ءتۇرلى ەلدەرىندە دارىستەر وقىپ، 80-نەن استام كىتاپ جازدى.
جازۋشىنىڭ ەڭ تانىمال ەڭبەكتەرىنىڭ ءبىرى – 2001 جىلى جارىق كورگەن «Eat That Frog!» («باقانى جەپ قوي!») كىتابى. وندا اۆتور ەڭ ماڭىزدى ءارى ورىنداۋ قيىن تاپسىرمانى كەيىنگە قالدىرماي، الدىمەن اياقتاۋعا كەڭەس بەرەدى. ەڭبەكتە ۋاقىتتى باسقارۋ، مىندەتتەردى باسىمدىقتارىنا قاراي ءبولۋ جانە جۇمىستى ءتيىمدى ۇيىمداستىرۋ تاسىلدەرى قامتىلعان.
برايان ترەيسي ءوز ەڭبەكتەرىندە ناقتى ماقسات قويۋ، ۋاقىتتى ءتيىمدى پايدالانۋ، جەكە شەشىمدەر ءۇشىن جاۋاپكەرشىلىك الۋ جانە باستاعان ءىستى سوڭىنا دەيىن جەتكىزۋدىڭ ماڭىزىن ۇنەمى اتاپ ءوتتى. ونىڭ پايىمداۋىنشا، ادامنىڭ جەتىستىگى تەك قابىلەتى مەن جاعدايىنا ەمەس، كۇندەلىكتى ادەتتەرى مەن قابىلدايتىن شەشىمدەرىنە دە بايلانىستى.
موتيۆاتسيالىق سپيكەردىڭ ومىرلىك ۇستانىمىن بىلدىرەتىن قاناتتى سوزدەرىنىڭ ءبىرى: «قاي جەردەن شىققانىڭ ماڭىزدى ەمەس. ەڭ باستىسى – قايدا بارا جاتقانىڭ». ول ادامنىڭ باستاپقى جاعدايى بولاشاعىن تولىق ايقىندامايتىنىن، ال ءبىلىم الۋ، قيىندىقتاردى ەڭسەرۋ جانە جۇيەلى ارەكەت ەتۋ ءومىر باعىتىن وزگەرتە الاتىنىن ناسيحاتتادى.
برايان ترەيسيدىڭ ارتىندا جۇبايى باربارا مەن ءتورت بالاسى قالدى.
