فوتو: Anadolu
ارمەنيا پرەمەر-ءمينيسترى نيكول پاشينيان ەلىنىڭ الداعى جيىرما جىل ىشىندە ەۋروپالىق وداققا مۇشە بولاتىنىنا سەنىم ءبىلدىردى. بۇل تۋرالى ول يرلانديا استاناسى دۋبليندە وتكەن حالىقارالىق جانە ەۋروپالىق ىستەر ينستيتۋتىنداعى (IIEA) كەزدەسۋدە مالىمدەدى، دەپ حابارلايدى “ادىرنا” ۇلتتىق پورتالى 1lurer.am سايتىنا سىلتەمە جاساپ.
كەزدەسۋ بارىسىندا پاشينيانعا ارمەنيانى 20 جىلدان كەيىن قانداي مەملەكەت رەتىندە ەلەستەتەتىنى تۋرالى سۇراق قويىلدى. ۇكىمەت باسشىسى وعان: «مەن ارمەنيانى ەۋروپا وداعىنىڭ قۇرامىندا كورەمىن»، – دەپ جاۋاپ بەردى.
پرەمەر-ءمينيستردىڭ ايتۋىنشا، قازىرگى ۋاقىتتا ەرەۆان مەن بريۋسسەل اراسىنداعى بايلانىس جاڭا دەڭگەيگە كوتەرىلىپ، تاراپتار ەكىجاقتى قارىم-قاتىناستىڭ بۇرىن-سوڭدى بولماعان جوعارى كورسەتكىشكە جەتكەنىن مويىنداپ وتىر.
پاشينيان بۇل وزگەرىستەردىڭ ايقىن دالەلى رەتىندە 5 مامىردا ەرەۆاندا وتكەن ارمەنيا مەن ەۋروپا وداعىنىڭ العاشقى بىرلەسكەن ءسامميتىن اتادى.
سونىمەن قاتار ارمەنيا ۇكىمەتىنىڭ باسشىسى ەو-مەن ۆيزاسىز رەجيم ەنگىزۋ ماسەلەسىنە دە توقتالدى. بۇعان دەيىن ول بۇل باعىتتاعى كەلىسسوزدەر مەن قاجەتتى شارالاردى ەڭ ۇزاق دەگەندە ەكى جىل ىشىندە اياقتاۋعا ۋادە بەرگەن بولاتىن. ونىڭ سوزىنشە، ۆيزاسىز قاتىناس ورناعان جاعدايدا ارميان ازاماتتارىنىڭ ەۋروپا ەلدەرىنە ساپارلاۋى ەداۋىر جەڭىلدەيدى.
پاشينيان بۇل مۇمكىندىكتى ازىلمەن جەتكىزىپ، بولاشاقتا كيپردىڭ لارناكا قالاسىنا بارۋ ءۇشىن تولقۇجاتتى ۇمىتپاۋ جەتكىلىكتى بولاتىنىن، ال ۇشاق بيلەتىنىڭ باعاسى نەبارى ەكى ەۋرو بولۋى مۇمكىن ەكەنىن ايتقان.
بۇدان بولەك، جۋىردا پرەمەر-مينيستر ارمەنيانىڭ ەۋروپا وداعىنا قوسىلۋ جونىندە 2027 نەمەسە 2028 جىلى رەسمي ءوتىنىش بەرۋى ىقتيمال ەكەنىن مالىمدەگەن ەدى.
