فوتو: Iranian Supreme Leader's Office/ZUMA/Mago
يران باحرەين اۋماعىندا ورنالاسقان اقش اسكەري بازاسىنا ۇشقىشسىز ۇشۋ اپپاراتتارىمەن شابۋىل جاسادى. بۇل تۋرالى 15 قاراشادا dpa اگەنتتىگى جازدى، دەپ حابارلايدى “ادىرنا”.
باحرەين اسكەري كۇشتەرىنىڭ مالىمەتىنشە، اۋە شابۋىلىنا قارسى قورعانىس جۇيەلەرى يراننان ۇشىرىلعان وق-دارىلەردى نىساناعا جەتپەي تۇرىپ جويعان. وسىعان بايلانىستى باحرەين بيلىگى تەگەراندى كورولدىككە قارسى جۇيەلى دۇشپاندىق ارەكەتتەر جاسادى دەپ ايىپتادى. بۇل قىركۇيەك ايىنىڭ باسىنان بەرى ەلدىڭ اۋە قورعانىسى كۇشتەرى تويتارعان العاشقى شابۋىل بولدى.
ال يران تاراپى شابۋىلدىڭ ءساتتى وتكەنىن مالىمدەدى. Press TV تەلەارناسىنىڭ حابارلاۋىنشا، يسلام رەۆوليۋتسياسى ساقشىلار كورپۋسى باحرەيندەگى ەر-ريفاا تىكۇشاق بازاسى ماڭىندا ورنالاسقان اقش-تىڭ اۋە قورعانىسى جۇيەسىنە تيەسىلى راداردى نىساناعا الۋ ءۇشىن التى درون جىبەرگەن. ايتا كەتەيىك، باحرەيندە اقش اسكەري-تەڭىز كۇشتەرىنىڭ بەسىنشى فلوتى ورنالاسقان.
بۇعان دەيىن، جۇما كۇنى يران تاراپى باحرەيندەگى اقش-تىڭ ەرتە ەسكەرتۋ جۇيەسىنە تيەسىلى رادارعا شابۋىل جاسالعانىن حابارلاعان ەدى. الايدا امەريكالىق اسكەري كۇشتەر بۇل اقپاراتتى جوققا شىعارىپ، ەكى يراندىق دروننىڭ ۇستالعانىن جانە ەشقانداي زالال كەلمەگەنىن مالىمدەدى.
ەسكە سالايىق، اقش پەن يزرايل 2026 جىلعى 28 اقپاندا يران اۋماعىنداعى نىساندارعا جاپپاي سوققى بەرىپ، اسكەري وپەراتسيا باستاعان بولاتىن. شابۋىلدار سالدارىنان يراننىڭ جوعارعى كوشباسشىسى اياتوللا ءالي حامەنەي مەن بىرقاتار جوعارى لاۋازىمدى شەنەۋنىك قازا تاپتى. بۇعان جاۋاپ رەتىندە تەگەران يزرايل اۋماعىنا جانە تاياۋ شىعىستاعى اقش اسكەري بازالارىنا سوققى جاساي باستادى.
اقش پرەزيدەنتى دونالد ترامپ ارالىق سايلاۋدان كەيىن يرانعا قارسى سوعىس اسكەري تۇرعىدان ء«ىس جۇزىندە اياقتالعانىن» ايتقان. مەملەكەتتىك حاتشى ماركو رۋبيو دا ەلدە اۋقىمدى اسكەري وپەراتسيالاردى جالعاستىرۋدىڭ قاجەتى جوق ەكەنىن مالىمدەدى. دەگەنمەن قاقتىعىسقا قاتىسۋشى تاراپتاردىڭ ەشقايسىسى سوعىستىڭ تولىق اياقتالعانىن نەمەسە بەيبىت كەلىسىمگە قول جەتكىزىلگەنىن راستاعان جوق.
