قۇرمەتتى دوستار، ءبىر جاقسى تاجىريبەممەن بولىسسەم دەيمىن. جاقىندا كۋالىكتەگى اتى-ءجونىمدى تولىق قازاقشالاپ الدىم. -وۆ پەن -ەۆتى الىپ تاستاۋ كوپتەن ويىمدا جۇرگەن دۇنيە ەدى.
بىراق مەنىڭ جاعدايىمدا بۇل ءۇردىس ءبىرشاما كۇردەلى بولدى. سەبەبى…
اكەمنىڭ قۇجاتتارىندا بۇرىنعى ورىستاندىرۋ ساياساتىنىڭ سالدارىنان «حالىق» دەگەن اتامنىڭ اتى بۇرمالانىپ، «كاليك» دەپ جازىلىپ كەتكەن. سونىڭ كەسىرىنەن مەنىڭ دە بارلىق قۇجاتتارىمدا «كاليكوۆ» بولىپ كەتكەنمىن.
العاشىندا حالىققا قىزمەت كورسەتۋ ورتالىعىنا بارعاندا:
– وۆ پەن ەۆتى وڭاي الىپ تاستاۋعا بولادى،
– ارىپتەردى دە قازاقشالاۋعا بولادى، بىراق ح ءارپىن ەنگىزە المايمىز، ك ءارپىن ق-عا اۋىستىرامىز، سوندا ءسىزدىڭ تەگىڭىز قالىق بولادى، – دەپ ءتۇسىندىردى.
بۇل نۇسقا مەنى قاناعاتتاندىرمادى.
سەبەبى اتامنىڭ شىن اتى – حالىق، ال «قالىق» دەگەن مۇلدە باسقا ۇعىم.
سودان كوپ ىزدەنىپ، بىرنەشە تسون قىزمەتكەرلەرىمەن سويلەستىم، ناقتى ءارى دۇرىس كەڭەس الا الماي ءبىراز ءجۇردىم.
سوڭىندا ءتىل ءبىلىمى ينستيتۋتىنا بارىپ، عالىمداردان رەسمي نەگىزدەمە جازدىرىپ الدىم:
“قازاق تىلىندە «كاليك» ەسىمى جوق، بۇل – «حالىق» دەگەن ءسوزدىڭ بۇرمالانعان نۇسقاسى”، - دەگەن انىقتاما بەرىلدى.
وسى انىقتامانىڭ نەگىزىندە:
1. الدىمەن تۋ تۋرالى كۋالىگىمدى وزگەرتتىم.
2. كەيىن جەكە كۋالىك، پاسپورت، نەكە كۋالىگى، قىزىمنىڭ تۋ تۋرالى كۋالىگى – بارلىق قۇجاتتاردى كەزەڭ-كەزەڭىمەن جاڭارتتىم.
پاسپورتىمدا اقش-تىڭ 10 جىلدىق ۆيزاسى بار ەدى. ونى نە ىستەيمىن دەپ الاڭدادىم. بىراق ول دا شەشىلەدى ەكەن:
ءجاي عانا ءوتىنىش جازاسىز – ۆيزاسى بار ەسكى پاسپورتىڭىزدى مەرزىمى اياقتالعانشا وزىڭىزبەن بىرگە ۇستاپ جۇرە بەرەسىز.
ەگەر اتى-ءجونىڭىزدى قازاقشا جازىپ، ناعىز ۇلتتىق بولمىسىڭىزعا ساي بولعىڭىز كەلسە – ەش قورىقپاڭىز.
باستىسى – نيەت پەن تاباندىلىق.
بۇل – ءبىر كۇندىك شارۋا ەمەس. بىراق ارقايسىمىز وسىلاي ارەكەت ەتسەك، ەلىمىزدە ۇلتتىق سانا مەن تىلگە دەگەن قۇرمەت ارتادى.
ءوز ەلىمىزدە قازاقشا اتى-جونىمىزبەن جۇرەيىك!
