ءىىم كوشى-قون قىزمەتى كوميتەتى حالىقتى قۇجاتتاندىرۋ باسقارماسى مەملەكەتتىك قۇجاتتى الۋ ءۇشىن باج سالىعىن تولەمەيتىن ازاماتتار ساناتىن ايتتى، دەپ حابارلايدى "ادىرنا" ۇلتتىق پورتالى قازينفورمعا سىلتەپ.
سالىق كودەكسىنىڭ 622-بابىنا سايكەس:
- ۇوس ارداگەرلەرى مەن ولارعا تەڭەستىرىلگەن تۇلعالار
- كەڭەس وداعىنىڭ باتىرلارى
- سوتسياليستىك ەڭبەك ەرلەرى
- مۇگەدەكتىگى بار ازاماتتار (بارلىق توپ)
- بالا كەزىنەن مۇگەدەك بولعان ازاماتتىڭ اتا-اناسىنىڭ ءبىرى
- قارتتار مەن مۇگەدەكتەرگە ارنالعان مەكەمەلەردە تۇراتىن ەگدە جاستاعى ادامدار
- جەتىم بالالار جانە بالالار ۇيلەرىندە نەمەسە ينتەرناتتاردا تۇراتىن اتا-اناسىنىڭ قامقورلىعىنسىز قالعان بالالار
- «باتىر انا»، «التىن القا» جانە «كۇمىس القا» توسبەلگىلەرىنىڭ يەلەرى
- چەرنوبىل اپاتىنىڭ سالدارىنان زارداپ شەككەن ازاماتتارعا تولقۇجات تەگىن بەرىلەدى.
"ىشكى ىستەر مينيسترلىگىنىڭ 2020 جىلعى 30 ناۋرىزدا بەكىتىلگەن 267 بۇيرىعى بار. سوندا تولىعىمەن جازىلعان. مۇگەدەكتىگى بار بالا بولسا، ول ءوزى تۇراتىن وڭىردەگى حالىققا قىزمەت كورسەتۋ ورتالىعىنا بارادى. تيىسىنشە بالانىڭ تۋ تۋرالى كۋالىگىن اتا-انالارىنىڭ بىرەۋى كورسەتە وتىرىپ، ارىز جازادى. ال چەرنوبىل اپاتىنان زارداپ شەككەن، ۇوس قاتىسقان ازاماتتار ارنايى كۋالىكتەرىن كورسەتىپ، تەگىن الا الادى", - دەلىنگەن ماتەريالدا.
تولقۇجات ءوتىنىش قابىلدانعاننان كەيىن 15 جۇمىس كۇنى ىشىندە دايىن بولادى. الايدا مۇنداي ازاماتتار قۇجاتتى جەدەل العىسى كەلسە، اقى تولەۋى كەرەك.
وزگە قازاقستاندىقتار مەملەكەتتىك تولقۇجاتتى الۋ ءۇشىن بەلگىلەنگەن باج سالىعىن تولەۋى كەرەك. 2025 جىلعى اەك بويىنشا 36 بەتتىك تولقۇجات 31 456 تەڭگە، 48 بەت 47 184 تەڭگە تۇرادى.
