رەسەيلىك سايتتا قىرعىزستان تولقۇجاتى ساتىلىپ جاتىر — جوعارعى كەڭەس دەپۋتاتى

2526
Adyrna.kz Telegram

جوعارى كەڭەس دەپۋتاتى گۋليا قوجوقۇلوۆا قىرعىزستان تولقۇجاتى رەسەيدەگى avito.ru جارنامالىق سايتىندا اشىق ساتىلىپ جاتقانىن مالىمدەدى. ول بۇل ماسەلەنى 18 مامىردا وتكەن پارلامەنت وتىرىسىندا كوتەرىپ، ۇلتتىق قاۋىپسىزدىك كوميتەتىن شارا قولدانۋعا شاقىردى، دەپ حابارلايدى «ادىرنا» ءتىلشىسى.

«قىرعىز ازاماتتىعى ەركىن ساتىلىپ جاتىر. ءبىزدىڭ قۇپيا قىزمەت قايدا قاراپ وتىر؟ تسيفرلىق دامۋ مينيسترلىگى نە ىستەيدى؟ ءبىزدىڭ تولقۇجاتتارىمىز ءارتۇرلى جەرلەردە ساتىلادى، بۇل كوپتەگەن كەلەڭسىزدىككە اكەلەدى»،—دەدى قوجوقۇلوۆا.

avito.ru سايتىندا ازاماتتىق ساتىپ الۋ قۇنۋ 120 000 - 270 000 رۋبل ارالىعىندا دەپ جازىلعان. جارناما بەرۋشىلەر قىرعىز ءتىلىن ءبىلۋ جانە رەسەيلىك تولقۇجاتتان باس تارتۋ مىندەتتى ەمەس ەكەنىن ايتادى. سونداي-اق قىرعىزستان ازاماتتىعىن الۋ ارقىلى بانكتەردەن ەسەپشوت اشۋعا جانە اقش پەن ەۋروپاعا ۆيزا الۋعا بولادى دەلىنگەن.

ايتا كەتەيىك، رەسەي-ۋكراينا قاقتىعىستارى باستالعاننان كەيىن قىرعىزستان ازاماتتىعىن العىسى كەلەتىن رەسەيلىكتەردىڭ سانى ارتتى. بۇعان دەيىن قىرعىزستان باسشىسى سادىر جاپاروۆتىڭ 2022 جىلى ازاماتتىق الۋ تۋرالى جارلىعى نەگىزىندە رەسەيدىڭ ونداعان بەلگىلى شەنەۋنىگى مەن ءىرى بيزنەسمەندەرى ازاماتتىق العان ەدى.

پىكىرلەر