قازاقستاندىق اتا-انا بالاسىنىڭ تۋ تۋرالى كۋالىگىن ونلاين راسىمدەۋ كەزىندە اتى-ءجونىن قالاعان نۇسقادا تىركەي الماعان، دەپ حابارلايدى "ادىرنا" ۇلتتىق پورتالى.
ادىلەت مينيسترلىگى تۇسىندىرۋىنشە، بالا اكەسىنىڭ اتىن قۇجاتتا «ۇلى» نەمەسە «قىزى» فورماسىندا تىركەۋ مۇمكىندىگى قاراستىرىلعان.
الايدا جەلىدەگى جۇرتتىڭ ايتۋىنشا، كەي جاعدايدا اقپاراتتىق جۇيە قاجەتتى اتى-ءجوندى تىركەۋگە مۇمكىندىك بەرمەيدى. ماسەلەن، ءبىر قازاقستاندىق ايەل قىزىنىڭ اكەسىنىڭ اتىن «قىزى» فورماسىمەن راسىمدەمەك بولعان. بىراق جۇيە فاميلياسى «-ەۆا» جالعاۋىمەن اياقتالاتىن جاعدايدا بۇل نۇسقانى قابىلداماعان.
«بۇل زاڭ بويىنشا تىيىم سالىنعان با، الدە جۇيەدە اقاۋ بار ما؟» – دەپ سۇرادى ول الەۋمەتتىك جەلىدە.
ادىلەت مينيسترلىگىنىڭ مالىمەتىنشە، قازاقستان زاڭناماسىندا ازاماتتىڭ اتى-ءجونى فاميلياسى مەن ەسىمىن قامتيدى، ال اكەسىنىڭ اتى ازاماتتىڭ قالاۋىمەن كورسەتىلەدى.
«نەكە (ەرلى-زايىپتىلىق) جانە وتباسى تۋرالى» كودەكسكە سايكەس، بالانىڭ تەگى اتا-اناسىنىڭ تەگىنە قاراي انىقتالادى. ەگەر اتا-انانىڭ تەگى ءارتۇرلى بولسا، ولاردىڭ كەلىسىمى بويىنشا بالاعا اكەسىنىڭ نەمەسە اناسىنىڭ تەگى بەرىلەدى.
سونىمەن قاتار قازاق ۇلتىنىڭ وكىلدەرى ءوز قالاۋى بويىنشا فاميلياسى مەن اكەسىنىڭ اتىنداعى «-وۆ»، «-ەۆ»، «-وۆا»، «-ەۆا»، «-وۆيچ»، «-ەۆيچ» جانە باسقا دا جالعاۋلاردان باس تارتىپ، ولاردىڭ ورنىنا «ۇلى» جانە «قىزى» نۇسقالارىن قولدانا الادى.
ياعني، «ۇلى» جانە «قىزى» فورمالارىن قولدانۋعا زاڭ جۇزىندە رۇقسات ەتىلگەن. ال ونلاين راسىمدەۋ كەزىندە مۇنداي نۇسقانىڭ قابىلدانباۋى اقپاراتتىق جۇيەگە قاتىستى تەحنيكالىق ماسەلە بولۋى مۇمكىن.
