Qūrmettı dostar, bır jaqsy täjıribemmen bölıssem deimın. Jaqynda kuälıktegı aty-jönımdı tolyq qazaqşalap aldym. -ov pen -evtı alyp tastau köpten oiymda jürgen dünie edı.
Bıraq menıŋ jaǧdaiymda būl ürdıs bırşama kürdelı boldy. Sebebı…
Äkemnıŋ qūjattarynda būrynǧy orystandyru saiasatynyŋ saldarynan «Halyq» degen atamnyŋ aty būrmalanyp, «Kalik» dep jazylyp ketken. Sonyŋ kesırınen menıŋ de barlyq qūjattarymda «Kalikov» bolyp ketkenmın.
Alǧaşynda Halyqqa qyzmet körsetu ortalyǧyna barǧanda:
– ov pen evtı oŋai alyp tastauǧa bolady,
– Ärıpterdı de qazaqşalauǧa bolady, bıraq H ärpın engıze almaimyz, K ärpın Q-ǧa auystyramyz, sonda sızdıŋ tegıŋız Qalyq bolady, – dep tüsındırdı.
Būl nūsqa menı qanaǧattandyrmady.
Sebebı atamnyŋ şyn aty – Halyq, al «Qalyq» degen mülde basqa ūǧym.
Sodan köp ızdenıp, bırneşe SON qyzmetkerlerımen söilestım, naqty ärı dūrys keŋes ala almai bıraz jürdım.
Soŋynda Tıl bılımı institutyna baryp, ǧalymdardan resmi negızdeme jazdyryp aldym:
“Qazaq tılınde «Kalik» esımı joq, būl – «Halyq» degen sözdıŋ būrmalanǧan nūsqasy”, - degen anyqtama berıldı.
Osy anyqtamanyŋ negızınde:
1. Aldymen tuu turaly kuälıgımdı özgerttım.
2. Keiın jeke kuälık, pasport, neke kuälıgı, qyzymnyŋ tuu turaly kuälıgı – barlyq qūjattardy kezeŋ-kezeŋımen jaŋarttym.
Pasportymda AQŞ-tyŋ 10 jyldyq vizasy bar edı. Ony ne ısteimın dep alaŋdadym. Bıraq ol da şeşıledı eken:
Jäi ǧana ötınış jazasyz – vizasy bar eskı pasportyŋyzdy merzımı aiaqtalǧanşa özıŋızben bırge ūstap jüre beresız.
Eger aty-jönıŋızdı qazaqşa jazyp, naǧyz ūlttyq bolmysyŋyzǧa sai bolǧyŋyz kelse – eş qoryqpaŋyz.
Bastysy – niet pen tabandylyq.
Būl – bır kündık şarua emes. Bıraq ärqaisymyz osylai äreket etsek, elımızde ūlttyq sana men tılge degen qūrmet artady.
Öz elımızde qazaqşa aty-jönımızben jüreiık!
