ۇلىتاۋ وبلىسىنىڭ الەۋمەتتىك-ەكونوميكالىق دامۋىنىڭ 2022-2026 جىلدارعا ارنالعان كەشەندى جوسپارى قابىلداندى. جوسپارى 9 باعىت بويىنشا ءىس-شارالار كەشەنىن قامتيدى. يگى باستامانى ۇلىتاۋ وبلىسىنىڭ اكىمى بەرىك ابدىعاليۇلى حابارلادى.
ۇلت ۇياسىنا اينالعان ۇلىتاۋ وبلىسى جاندانىپ، جاڭاراتىن بولادى. ايماقتى دامىتۋ مەن قىزۋ تىرلىكتىڭ وشاعىنا اينالۋ جوسپارىن وبلىس اكىمى بەرىك ابدىعاليۇلى بايان ەتتى.
"قۇرمەتتى جەرلەستەر!جاڭا عانا قر ۇكىمەت وتىرىسىندا ۇلىتاۋ وبلىسىنىڭ الەۋمەتتىك-ەكونوميكالىق دامۋىنىڭ 2022-2026 جىلدارعا ارنالعان كەشەندى جوسپارى ماقۇلداندى. بۇل ماڭىزدى قۇجاتتىڭ قابىلدانۋى - مەملەكەت باسشىسى قاسىم-جومارت توقاەۆتىڭ قولداۋى جانە ءبىزدىڭ 4 ايدان استام ەڭبەگىمىزدىڭ ناتيجەسى دەپ قابىلدايمىن. ۇلىتاۋ وبلىسىنىڭ الەۋمەتتىك-ەكونوميكالىق دامۋىنىڭ 2022-2026 جىلدارعا ارنالعان كەشەندى جوسپارى 9 باعىت بويىنشا ءىس-شارالار كەشەنىن قامتيدى. ولاردىڭ ىشىندە يندۋستريالىق-يننوۆاتسيالىق دامۋ، مينەرالدىق-شيكىزات بازاسىن كەڭەيتۋ، كاسىپكەرلىكتى دامىتۋ، اگروونەركاسىپتىك كەشەن، تۇرعىن ءۇي-كوممۋنالدىق شارۋاشىلىق، كولىك ينفراقۇرىلىمى، الەۋمەتتىك ينفراقۇرىلىم جانە ت. ب. وبلىس اكىمدىگى وسى قۇجاتقا قوسىمشا قازاقستان رەسپۋبليكاسىنىڭ مەملەكەتتىك باعدارلامالارى مەن ۇلتتىق جوبالارىنا ەنگىزىلگەن بارلىق ءىس-شارانى كوزدەيتىن كەڭەيتىلگەن دامۋ باعدارلاماسىن ازىرلەدى", - دەپ سۇيىنشىلەدى اكىم.
سونىمەن قاتار، وبلىس باسشىسى كەشەندى دامۋ جوسپارىنىڭ قارجىلىق قۇنى مەن ەكونوميكالىق اۋقىمدىلىعىن تاپسىرلەپ ءتۇسىندىردى.
"جالپى، بەس جىلدىق كەزەڭدەگى ينۆەستيتسيالاردىڭ جالپى كولەمى 1,8 ترلن. تەڭگە. ونىڭ ىشىندە رەسپۋبليكالىق بيۋدجەتتەن 351 ملرد. تەڭگە، جەرگىلىكتى بيۋدجەتتەن – 147 ملرد. تەڭگە بولىنەدى، جەكە ينۆەستيتسيالار 1,3 ترلن. تەڭگەنى قۇرايدى. ۇلىتاۋ وبلىسىنىڭ يندۋستريالىق-يننوۆاتسيالىق دامۋى ونەركاسىپتىك رەاگەنت شىعارۋ جونىندەگى حيميا زاۋىتىنىڭ قۇرىلىسىن، مۇناي وڭدەۋ زاۋىتىن، قارا مىس كونتسەنتراتتارىن ءوندىرۋ زاۋىتىن، جەزقازعان مىس بالقىتۋ زاۋىتىنىڭ جاڭا كۇكىرت قىشقىلى تسەحىن جانە ت.ب. ىسكە قوسۋدى قامتيدى. جالپى، 3 مىڭ جاڭا جۇمىس ورىندارىن قۇرۋمەن 787 ملرد. تەڭگە سوماسىنا 16 جوبانى ىسكە اسىرۋ جوسپارلانۋدا.وڭىردە مينەرالدىق-شيكىزات بازاسىن كەڭەيتۋ اياسىندا گەولوگيالىق كلاستەر سالىنىپ، 9 كەن ورنىنا گەولوگيالىق بارلاۋ جۇمىستارى جۇرگىزىلەدى. ينۆەستيتسيالاردىڭ جالپى كولەمى 20 ملرد. تەڭگەنى قۇرايدى. اگروونەركاسىپتىك كەشەن سالاسىندا ەت وڭدەۋ جانە ءسۇت وڭدەۋ زاۋىتتارىن سالۋ، قۇس ەتى مەن جۇمىرتقا ءوندىرۋ كەشەنىن ىسكە قوسۋ، ۇن تارتۋ كەشەنىن جاڭعىرتۋ سياقتى ت.ب. 11 ينۆەستيتسيالىق جوبا ىسكە اسىرىلاتىن بولادى. سالا ينۆەستيتسيالارىنىڭ جالپى كولەمى 45 ملرد. تەڭگەدەن اسادى، - دەدى بەرىك ابدىعاليۇلى.
وبلىس اۋماعىندا الەۋمەتتىك نىساندار سالۋعا دا ايرىقشا كوڭىل بولىنگەن. وبلىس اكىمىنىڭ ايتۋىنشا، جاقىن جىلداردا قوعامنىڭ قاجەتىن وتەۋ ءۇشىن سان-cالالى عيماراتتار بوي كوتەرەدى.
"الەۋمەتتىك سالادا 47 جاڭا نىسان سالىنادى. ولاردىڭ ىشىندە جەزقازعان قالاسىنداعى پەريناتالدىق ورتالىق، جاڭاارقا جانە ۇلىتاۋ اۋداندارىنداعى 14 فەلدشەرلىك-اكۋشەرلىك پۋنكت، 9 مەكتەپ، 4 وقۋشىلار سارايى، 5 بالاباقشا، 10 سپورت نىسانى جانە باسقالارى بار. سونداي-اق، 27 ءبىلىم بەرۋ جانە دەنساۋلىق ساقتاۋ نىساندارى جوندەلەدى. بارلىق ءىس-شارالاردىڭ جالپى سوماسى 94 ملرد.تەڭگەدەن اسادى. "ەڭبەك" فۋتبول كلۋبى جاندانىپ، "ارىستان" بالالار حوككەي مەكتەبى اشىلادى. 2023 جىلدىڭ 1 قىركۇيەگىنەن باستاپ جاڭا ۇلىتاۋ مەملەكەتتىك تەحنيكالىق ۋنيۆەرسيتەتىنە ستۋدەنتتەردى قابىلداۋ جوسپارلانۋدا. حالىق سانىنىڭ ءوسۋىن ەسكەرە وتىرىپ، جەزقازعان قالاسىندا 60 ءۇيدى نەمەسە 1800-گە جۋىق پاتەردى قامتيتىن ءۇش جاڭا شاعىن اۋدان سالىنادى. جەكە تۇرعىن ءۇي قۇرىلىسىنا 1 مىڭ ۋچاسكە بولىنەدى. سونداي – اق، جەزقازعان قالاسىنداعى 26 اپاتتى ءۇيدى جانە ساتباەۆ قالاسىنداعى 20 اپاتتى ءۇيدى جاڭارتۋ جۇمىستارى جۇرگىزىلەدى. اتالعان ءىس-شارالارعا 62 ملرد.تەڭگەدەن استام قاراجات باعىتتالادى".
سونىمەن قاتار، ۇلىتاۋ وبلىسىن دامىتۋدىڭ كەشەندى باعدارىندا تۇرعىن ءۇي-كوممۋنالدىق شارۋاشىلىقتى جاڭعىرتۋ، سۋمەن جابدىقتاۋ، ساتباەۆ قالاسىنىڭ تۇرعىندارىن جىلۋمەن قامتاماسىز ەتۋ، ەلەكتر ەنەرگياسىن ءوندىرۋ، زاماناۋي بۋ-گاز قوندىرعىسىن سالۋ سەكىلدى جاڭا باستامالار قاراستىرىلعان.
"بۇدان باسقا، ءوڭىردىڭ گاز ينفراقۇرىلىمىن دامىتۋ جوباسىن ىسكە اسىرۋ ءۇشىن 34 ملرد.تەڭگەدەن استام قاراجات بولىنەدى. جالپى سوماسى 264 ملرد.تەڭگەگە 227 كم وبلىستىق اۆتوجولدار جانە 118 كم قالاىشىلىك جانە كەنتىشىلىك جولدار سالىنادى، قايتا جوندەلەدى جانە جوندەلەدى. تۋريزم سالاسىن دامىتۋعا 1,5 ملرد. تەڭگە باعىتتاۋ كوزدەلگەن... ىسكە ءسات!" - دەپ جازدى ۇلىتاۋ ءوڭىرىنىڭ باسشىسى.
"ادىرنا" ۇلتتىق پورتالى
