قوستاناي اۋەجايى احاڭ اتىندا بولادى
ارقىراعان اقپاننىڭ اياعىندا احاڭنىڭ 150 جىلدىعى مەرەيتويىن اشىپ كەلدىك.
ون كۇن ەل ارالاۋىمىزدىڭ اياعى احاڭنىڭ تۋعان ولكەسىنە جالعاستى. 28 اقپاندا قوستانايدا ۇلت ۇستازى، الاشتىڭ رۋحاني كوسەمى احمەت بايتۇرسىنۇلىنىڭ يۋنەسكو اياسىندا تويلاناتىن 150 جىلدىق مەرەيتويىنىڭ رەسمي اشىلۋ سالتاناتى ءوتتى.
قوستاناي وبلىسى اكىمى ارحيمەد مۇقانبەتوۆپەن كەزدەسىپ، ەلىمىز ەلەڭدەپ وتىرعان مەرەيتويدىڭ بارىسى جونىندە سويلەستىك. اكىم توي تۋرالى توىققاندى اقپارات بەردى.
احاڭنىڭ 150 جىلدىعىنا بايلانىستى ۇكىمەت باسشىسى ورىنباسارى ە.توعجانوۆقا «اق جول» فراكتسياسىنىڭ دەپۋتاتتىق ساۋالىن جولداعانى بەلگىلى. ونىڭ ىشىندە الاش كوسەمدەرى احاڭ مەن جاحاڭنىڭ تۋعان اۋىلدارىنا باراتىن جول جوق ەكەندىگىن جازىپ، بارلىعى 17 ۇسىنىس جاساعانبىز. ولاردىڭ كوبىسى ورىندالىپ جاتقانى تۋرالى ۆيتسە-پرەمەردىڭ جاۋابى دا كەلگەن.
ءبىزدىڭ دەپۋتاتتىق ساۋالدان كەيىن قوستاناي وبلىسىنىڭ اكىمى ارحيمەد مۇحامبەتوۆ جانگەلدين اۋدانىنا، سونىڭ ىشىندە احمەت بايتۇرسىنۇلى اۋىلىنا بارىپ، ەلمەن كەزدەسىپ قايتقانى بەلگىلى. احاڭنىڭ تويىنا ارنالىپ ىستەلىپ جاتقان ءىس-شارالاردى، ونىڭ ىشىندە جول سالۋ باستالعانىن بايانداپ، جۇرتتىڭ وي-پىكىرىن، ۇسىنىستارىن تىڭداپ، ماڭىزدى ماسەلەلەردى ورىنداۋعا ۋادە ەتتى. ال ەڭ باستىسى– احاڭ اۋىلىنا باراتىن جولدى كۇردەلى جوندەۋدەن وتكىزۋ جۇمىستارى شەشىمىن تاۋىپ وتىر.
«2022 جىلدىڭ بيۋدجەتىن بەكىتكەن كەزدە جولدىڭ 11,4 شاقىرىمىن جوندەۋگە 450 ملن تەڭگە بولىنگەن بولاتىن. قازىرگى ۋاقىتتا ودان ءارى قاراي جول سالۋ ءۇشىن قۇجاتتاما ازىرلەۋگە قاراجات ءبولىندى. قۇجات دايىن بولعان بەتتە، جۇمىستار باستالادى. ول ماقساتتا قوسىمشا 1,5 ملرد تەڭگە قاراستىرىپ وتىرمىز، بۇل شامامەن 21 شاقىرىم جول توسەۋگە جەتەدى. سوندا 32 شاقىرىم جولدىڭ قارجىسى شەشىلىپ تۇر. ال كوكتەمدەگى بيۋدجەتتى قايتا پىسىقتاۋ كەزىندە قالعان شاقىرىمدارعا قارجى سۇرايمىز دەپ وتىرمىز»- دەدى ارحيمەد بەگەجانۇلى.
رەسپۋبليكالىق «قازاق ءۇنى» گازەتى مەن ۇلتتىق پورتالىندا ءبىزدىڭ «ۇلت ۇستازىن ۇلىقتاۋعا قارسى قوعامدىق كەڭەستى تاراتىپ جىبەرۋ كەرەك» دەگەن ماقالامىزدا كوتەرىلگەن ماسەلەلەردى دە قولعا الىپ جاتقاندارىن ايتتى. «ا.بايتۇرسىنۇلى تۋعان ءۇيدى قالپىنا كەلتىرۋگە وبلىستىق بيۋدجەت ەسەبىنەن قاراجات ءبولىندى. ونى جاڭعىرتىپ، مۋزەي ۇيگە اينالدىرۋ جوسپارلانىپ وتىر» دەدى. سونداي-اق، ورىنبور قالاسىندا احاڭنىڭ ەسكەرتكىشىن ورناتۋ ماسەلەسىن دەمەۋشىلەر ارقىلى شەشۋگە تىرىسىپ جاتقاندارىن جەتكىزدى.
اكىمنىڭ ايتۋىنشا، ءبىزدىڭ كوتەرگەن دەپۋتاتتىق ساۋال بويىنشا وبلىس ورتالىعىنداعى اۋەجايعا احمەت بايتۇرسىنۇلى ەسىمى بەرىلۋ تۋرالى ۇسىنىس وبلىستىق ءماسليحات دەپۋتاتارى تاراپىنان ءوز قولداۋىن تاۋىپ جاتىر ەكەن. اۋەجاي اكىمشىلىگى دە ءوز كەلىسىمىن بەرگەن. بۇل تۋرالى وبلىستىق ءماسليحات حاتشىسى، رۋحانياتقا قامقور بولىپ جۇرەتىن كاسىپكەر سايلاۋبەك ەشانوۆ تا راستادى. ال كەشە وبلىستىق ءماسليحات قوستاناي قالاسىنداعى اۋەجايعا احمەت بايتۇرسىنۇلىنىڭ اتىنا بەرۋدى قولداپ، بەكىتتى. ەندى رەسپۋبليكالىق ونوماستيكالىق كوميسسيانىڭ شەشىمى عانا قالدى.
قۇداي قالاسا، احاڭنىڭ تويىنا الىس-جاقىننان اعىلعان قوناقتاردى قوستانايدا ۇشاقتان تۇسكەن بەتتە اۋەجايدا «احمەت بايتۇرسىنۇلى» دەگەن ايشىقتى جازۋمەن احاڭنىڭ ءوزى قارسى الىپ تۇرسا قانداي عانيبەت!
مەرەيتوي ماسەلەسىندە ايماق باسشىلىعى بارىنشا قيمىلداپ جاتىر ەكەن. حالىق ۇنىنە قۇلاق تۇرە بىلگەن وبلىس اكىمى ارحيمەد بەگەجانۇلىنا العىس ايتامىز. ەندى سول ۋادەلەردىڭ بارلىعى ورىندالسىن دەپ سەنەيىك.
ۇلىلارىمىزدى ۇلىقتاماساق، ەل بولىپ العا جىلجي المايمىز.
جالپى، احاڭ ەلىندەگى ساپارىمىز تۋرالى تولىق اقپاراتتى وبلىستىق «قوستاناي تاڭى» گازەتىندە جازىلعان حابار مەن جۋرناليست قىدىربەك قيىسحانعا بەرگەن سۇقباتىمىزدان وقۋعا بولادى.
ۇلت ۇستازىنىڭ تويى رەسمي اشىلدى
مەرەيتويدىڭ القيسساسى
بيىل 28 اقپاندا قوستانايدا ۇلت ۇستازى احمەت بايتۇرسىنۇلىنىڭ 150 جىلدىق مەرەيتويىنىڭ رەسمي اشىلۋ سالتاناتى ءوتتى. ايتۋلى شاراعا اقىن، قر پارلامەنتى ءماجىلىسىنىڭ دەپۋتاتى قازىبەك يسا، قازاقستان جازۋشىلار وداعىنىڭ توراعاسى ۇلىقبەك ەسداۋلەت، قر ءبىلىم جانە عىلىم مينيسترلىگىنىڭ ءتىل ساياساتى كوميتەتىنىڭ شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ ديرەكتورى ەربول Tىلەشوۆ، الماتى قالاسىنداعى احمەتبايتۇرسىنۇلى مەموريالدىق مۋزەي-ءۇيىنىڭ ديرەكتورى رايحان يماحانبەت، وڭىرىمىزدەگى زيالىقاۋىم وكىلدەرى قاتىستى. سالتاناتتى جيىندىايماق باسشىسى ارحيمەد مۇحامبەتوۆ باستاپ، الىستان-جاقىننان كەلگەن مەيماندار وبلىسورتالىعىنداعى احاڭ ەسكەرتكىشىنە گۇل شوعىن قويۋدان باستادى.
مۇنان كەيىن ا.بايتۇرسىنوۆ اتىنداعى قوستاناي وڭىرلىك ۋنيۆەرسيتەتىندە «ۇلت ۇستازى» دوڭگەلەك ۇستەل وتىرىسىنا جالعاستى. العاشقى ءسوز كەزەگىن العان وبلىس اكىمى جىل بويىنا وڭىرىمىزدە اۋقىمدى عىلىمي-تانىمدىق جانە مادەني-اعارتۋشىلىق شارالاردى وتكىزۋ جوسپارى بەكىتىلىپ، ءتيىستى جۇمىستار جۇرگىزىلىپ جاتقانىن جەتكىزدى:
— ۇلت ۇستازىنا ارنالعان ايتۋلى شارالار وتكەن اپتادا ەلوردامىزدان باستاۋ الىپ، رۋحاني كوسەمنىڭ تۋعان جەرىندە جالعاسىپ جاتىر. جىل باسىندا جانكەلدين اۋدانىنا جۇمىس ساپارىممەنبارىپ، حالىقپەن كەزدەسىپ قايتتىق. سول كەزدەسۋاياسىندا اۋىل تۇرعىندارى جول جوندەۋ، ينتەرنەت جەلىسىن قوسۋ جانە مەديتسينالىق كومەك كورسەتۋ ساپاسىن ارتتىرۋ جونىندە وتىنىشتەرىن جەتكىزگەنبولاتىن. وسىعان بايلانىستى قوسىمشا شارالارقابىلداپ جاتىرمىز. 2022 جىلدىڭ بيۋدجەتىنبەكىتكەن كەزدە «شۇبالاڭ-قاراسۋ» باعىتىنداعى جولدىڭ 11,4 شاقىرىمىن جوندەۋگە 450 ملن تەڭگە بولىنگەن بولاتىن. قازىرگى ۋاقىتتا ودان ءارى قاراي جول سالۋ ءۇشىن قۇجاتتاما ازىرلەۋگە قاراجات ءبولىندى. قۇجات دايىن بولعان بەتتە، جۇمىستار باستالادى. ول ماقساتتا قوسىمشا 1,5 ملرد تەڭگە قاراستىرىپ وتىرمىز، بۇل شامامەن 21 شاقىرىم جول توسەۋگە جەتەدى. شالعاي اۋىلداردى ينتەرنەت جەلىسىنە قوسۋ بويىنشا تسيفرلاندىرۋ مينيسترلىگىجانە «قازاقتەلەكوم» اكتسيونەرلىك قوعامىمەن بىرلەسىپ جول كارتاسى ازىرلەنىپ، جۇمىستار پىسىقتالۋدا. جوسپار اياسىندا تورعاي اۋىلىنداعى «احمەت بايتۇرسىنۇلى مەن مىرجاقىپ دۋلاتۇلىنىڭ ادەبي مۋزەيىن» جوندەۋ جۇمىستارى جۇرگىزىلەتىن بولادى جانە ەكسپوزيتسياسى تولىعىمەن قايتا جاڭارتىلادى. وعان قوسا، ا.بايتۇرسىنۇلى تۋعان ءۇيدى قالپىنا كەلتىرۋگە وبلىستىق بيۋدجەت ەسەبىنەن قاراجات ءبولىندى. ونى جاڭعىرتىپ، مۋزەي ۇيگە اينالدىرۋ جوسپارلانىپ وتىر، — دەدى ايماق باسشىسى.
اقىن قازىبەك يسا ءوز سوزىندە احاڭنىڭ مەرەيتويىنا توقتالدى:
- الەمدە بارلىق ەلدە ۇلتتىڭ ۇلى تۇلعالارىنىڭ مەموريالدىق كەشەنى ەڭ الدىمەن ولاردىڭ تۋعان جەرىندە بولادى. كيەلى جيدەبايدى وبلىس ورتالىعىنان تىم الىستا دەپ ۇلى ابايدىڭ مەموريالدىق كەشەنىن وسكەمەننەن نەمەسە سەمەيدەن سالعان جوقپىز عوي. ۇلىلارعا تاعزىم ەتۋ ءۇشىن ەل الىستى جاقىنداتىپ، اباي اۋىلىنا بارادى. سول سەكىلدى ۇلتتىڭ ۇلى كوسەمى احمەت بايتۇرسىنۇلىنىڭ ارۋاعىنا تاعزىم ەتۋ ءۇشىن الىستاعى احمەت اۋىلىنا بارۋى كەرەك، دەدى. —«اقجول» پارتياسى بيىلعى جىلدى مەملەكەتتىك ءتىل جىلى دەپ جاريالاۋدى ۇسىندى. بىراق ۇكىمەت بالالار جىلى دەپ اتادى. دەگەنمەن ۇلت ءۇشىن، قوعام ءۇشىن بيىل احاڭ تويى قارساڭىندا انا ءتىلىجىلى بولادى دەپ سەنەمىن. ءبىزدىڭ كوتەرگەن دەپۋتاتتىق ساۋال بويىنشا وبلىس ورتالىعىنداعى اۋەجايعا احمەت بايتۇرسىنۇلى ەسىمى بەرىلۋ تۋرالى ۇسىنىس ءوز قولداۋىن تاۋىپ جاتىر. اۋەجاي اكىمشىلىگى ءوز كەلىسىمىن بەرگەن، قازىرگى كۇنى وسى ماسەلەنىڭ شەشىلۋى ۇكىمەتتىك دەڭگەيدە قاراستىلىپ جاتىر. سونىمەن بىرگە ءبىر ايتا كەتەرىم، مىناۋ ۋنيۆەرسيتەتتىڭ اتىنداعى «احمەت بايتۇرسىنوۆ» دەگەن تەگىندەگى «وۆ» جالعاۋىن الىپ تاستاۋ كەرەك. الاش كوسەمدەرى احاڭ، ءاليحان، مىرجاقىپتار ءوز تەكتەرىنەن وۆ» جالعاۋىنا قارسى بولعان، ول تۋرالى ماقالالارى دا بار— دەدى قر پارلامەنتى ءماجىلىسىنىڭ دەپۋتاتى.
جارتى عۇمىرىن احمەت بايتۇرسىنۇلى مۋزەي-ۇيىنە ارناعان رايحان يماحانبەت «قازاق» دەپ وتكەن احمەت بايتۇرسىنۇلىنىڭ جاساعان ەڭبەگىنىڭ تورتتەن ءبىر بولشەگىندە جاساي العاي وتىرمىز دەيدى. -ارتقا تاۋەلسىزدىكپەن بىرگە وتىز جىلدىقتى تاستاعانىمەن، قوعامدا تۇلعالارىمىزدىڭ دا ەڭبەگى ەلەنىپ جاتقان جوق. ونى ەسكەرۋىمىز كەرەك. اسىرەسە، ءبىز اتقا ءمىنىپ جۇرگەن ەر ازاماتتارىمىزعا قارايمىز. كەشەگى الاش ارىستارىنىڭ رۋحىن سىزدەرسەزىنبەسەڭىزدەر، قاراپايىم حالىقتىڭ سەزىنگەنىازدىق ەتەدى. اسىرەسە، احمەتتى ۇشىرعان اقكولگە ۇلكەن كوڭىل اۋدارۋلارىڭىزدى سۇرايمىن. كوبى ەلدەن تىسقارى جاتىر دەپ ويلايدى. ەگەر جاعدايىن جاساسا، احمەت تۋعان ولكەگە ەل نەگە بارمايدى؟،- دەپ احمەتتانۋشى احمەت اتامىزدىڭ ولەڭىمەن ويىنتۇيىندەدى.
ءسوز ورايىندا ايتا كەتەيىك، ۋنيۆەرسيتەت قابىرعاسىندا وتكەن جيىندا قازاقستاننىڭ «اق جول» دەموكراتيالىق پارتياسىنان سايلانعان ءماجىلىس دەپۋتاتى قازىبەك يسا ءوڭىرىمىزدىڭ ءتىل جاناشىلارى اقىن اقىلبەك شاياحمەت پەن «قوستاناي تاڭى» گازەتتىنىڭ باس رەداكتورى جانۇزاق ايازبەكوۆكە «اق جول» پارتياسىنىڭ ەڭبەك ارداگەرلەرىنە ارنالعان «ەڭبەگىم ەلىمە» مەدالىن تابىس ەتتى. سالتاناتتى شارا سوڭىندا بەلگىلى عالىم، اقىن سەرىكباي وسپانوۆتىڭ «ۇلت ۇستازى» كىتابىنىڭ تۇساۋكەسەر ءراسىمى ءوتتى. مارتەبەلى مەيماندار مەن عالىمدارعا «احمەت بايتۇرسىنوۆ» قۇرمەت مەدالى تابىس ەتىلدى.
ايتۋلى شارا قالامىزدىڭ مادەني ورىندارىندا دا جالعاسىن تاپتى. ا.بايتۇرسىنوۆ اتىنداعى قوستاناي وڭىرلىك ۋنيۆەرسيتەتىندە، ىبىراي التىنسارين مەموريالدىق مۋزەيىندە، ءى.وماروۆ اتىنداعى قازاق دراما تەاترىندا، «دوستىق ۇيىندە» جانە بالالار شىعارماشىلىق ۇيىندە احمەتتانۋ ءدارىس ساباقتارى ءوتتى. جاستارسارايىندا احمەت بايتۇرسىنۇلىنا ارنالعان مەرەيلى جىلدىڭ سالتاناتتى اشىلۋ ءراسىمى بولدى. ادەبي-سازدى كەش ءوتىپ، وندا احاڭنىڭ اندەرى، كۇيلەرى ورىندالىپ، ولەڭدەرى وقىلادى، كەمەڭگەردىڭ ومىرىنەن تەاترلاندىرىلعان قويىلىمدار ۇسىنىلدى. «قوستاناي پلازا» ساۋدا-ويىن-ساۋىق ورتالىعىندا احمەت وبرازىمەنفوتوسەسسيا، مەكتەپ وقۋشىلارىنىڭ، ستۋدەنتتەردىڭ قاتىسۋىمەن ينتەراكتيۆتى شارالار ءوتتى، وندابەلگىلى ونەر يەلەرى جانە كوركەمونەرپازدار ۇجىمى ونەر كورسەتتى. جاستار اراسىندا «استىقجان» ساۋداورتالىعى ايماعىندا «پويسك» تانىمدىق كۆەستويىنى ۇيىمداستىرىلدى. «ماسا» Youtube-جوباسىنىڭ تۇساۋى كەسىلدى.
مەرەيتوي اياسىندا «بايتۇرسىنۇلى وقۋلارى-2022»، حالىقارالىق عىلىمي-پراكتيكالىق كونفەرەنتسيالار، «احاڭ جۇرگەن جولمەن» عىلىمي ەكسپەديتسياسى، قايراتكەردىڭ مۇراسىن زەرتتەۋگە ارنالعان «احمەت الەمى» ينتەراكتيۆتى پورتالى، وبلىستىق تەاتر ساحنالارىندا تاقىرىپتىق قويىلىمدار جوسپارلانعان. ەرەكشە اتاپ وتەتىن جايت، كەلەسى وقۋ جىلى وبلىس ءۇشىن ماڭىزدى ماماندىقتار بويىنشا احمەت بايتۇرسىنۇلى اتىنداعى گرانتتار جەرگىلىكتى بيۋدجەت ەسەبىنەن تاعايىندالادى.
مەرەيتويعا ارنالعان نەگىزگى ءىس-شارالاردى ءوزىنىڭ تۋعان كۇنى اياسىندا، ياعني 5 قىركۇيەك شاماسىندا وتكىزۋ جوسپارلانعان. وعان قوسا، وبلىس ورتالىعىندا قازاقستان حالقى تىلدەرى كۇنىنە ارنالعان اۋقىمدى شارالار، «ءتىل-قازىنا» فەستيۆالى وتەدى. سونداي-اق، تاريحي تۇلعانىڭ تۋعان جەرى جانكەلدين اۋدانىندا بىرقاتار كولەمدى مەرەيتويلىق شارالار، اتاپ ايتقاندا ادەبي مۋزەيدىڭ جوندەۋدەن كەيىنگى تۇساۋكەسەرى، عىلىمي تاجىريبەلىك كونفەرەنتسيا، اقىندار ايتىسى، وقۋشىلار اراسىندا «احمەت وقۋلارى» بايقاۋى، ات سپورتىنان جارىستار وتكىزۋ كوزدەلگەن.
ايتا كەتۋ كەرەك، اقجولتاي جاڭالىق، ۇلت جاناشىرلارىنىڭ باستاماسىمەن احاڭ اتىنداعى وڭىرلىك ۋنيۆەرسيتەت «وۆ» جالعاۋىنان ارىلىپ، احمەت بايتۇرسىنۇلى اتىنداعى وقۋ ورداسى بولىپ اتالاتىن بولدى.
«قوستاناي تاڭى» گازەتى
قازىبەك يسا: «حالىق تالابى ورىندالماي، ەل جاعدايى وڭالمايدى»
پارلامەنتكە كەلمەي جاتىپ-اق حالىق قالاۋلىسىنا اينالعان، ەلىنىڭ شىن ىقىلاسىنا بولەنگەن، ءماجىلىس تورىندە وتىرعان ءبىر جىلدا تىنىمسىز ەڭبەك تىندىرعان قازىبەك يسا مىرزا. الەۋمەتتىك جەلىدە جۇرتشىلىق وسى يگى ىستەرىنە قاراپ، «جوعارى مىنبەردە وتىرعان ۇلتتىڭ جوقتاۋشىسى – قاز داۋىستى قازىبەك» دەپ اتاپ كەتتى. احمەت بايتۇرسىنۇلى جىلىنىڭ رەسمي اشىلۋىنا احاڭنىڭ ەلىنە كەلگەن حالىق قالاۋلىسىن قوستانايلىق حالىق تا ىستىق ىقىلاسپەن قارسى الدى. ەكى كۇن بويى قاسىندا ءجۇرىپ، ءبىز دە ول كىسىگە باۋىر باسىپ قالىپپىز. ءبىراز اڭگىمەنىڭ شەتىن اعىتتىق. سول سۇقباتىمىزدى ىقشامداپ، نازارارىڭىزعا ۇسىنىپ وتىرمىز.
كەدەيشىلىك كەڭىنەن جايلاپ العان ەلمىز
- قازىبەك جارىلقاسىنۇلى، ەل اۋەلدەن ءسىزدى اقىن رەتىندە تانيدى. اقىن بولعاندا دا، اسىرەسە، 2019 جىلدىڭ اقپانىنداعى ەلوردادا ءبىر ءۇيدىڭ بەس بىردەي ءسابيىنىڭ ورتكە ورانۋى قازاق قوعامى ءۇشىن زور كۇيزەلىس بولعانى راس. سول تۇستا ءسىز «جەر بەتىندە پەرىشتەگە جوق ورىن» دەگەن ەلدىڭساي-سۇيەگىڭدى سىرقىراتىر تولعاۋجازدىڭىز. بۇل جاعدايدىڭ ارتىنان قوعامدا ۇلكەن سەڭ قوزعالاتىنىن ءبىلدىڭىز بە؟
- بۇنىڭ الدىنداعى جىلى قىزىلوردا وبلىسى قارماقشى اۋدانىندا ءبىر وتباسىنىڭ ءۇش ۇلى، سودان كەيىن قىزىلوردا قالاسىندا ساياجايدى پانالاعان وتباسىنىڭ ءالينۇر، الديار، ابزال اتتى ءۇش ۇلى، ال اقپاندا استانادا اياداي لاشىقتا تۇرىپ جاتقان ءبىر وتباسىنىڭ بەس قىزى ورتتەن قازا تاپتى. ءۇش وقيعادا دا كوپ بالالى وتباسىنىڭ اكە-شەشەلەرى تۇنگى جۇمىستا بولعان. قۋ جوقشىلىق!
ال سول كەزدە الەۋمەتتىك قورعاۋ ءمينيسترى كوپ بالالى انالارعا 16 مىڭ تەڭگە كوپ دەپ، ەلدىڭ ىزاسىن تۋدىرسا، ۆيتسە-مينيستر اۋىر قاسىرەتكە ۇشىراعان اتا-انالاردىڭ تۇنگى جۇمىس ىستەۋىن «بۇل ولاردىڭ تاڭداۋى» دەپ ەلدى شوشىتتى.الەۋمەتتىك جەلىدە جۇرت الەۋمەتتىك قورعاۋ ءمينيسترى مەن ۆيتسە-ءمينيستردى ورنىنان كەتسىن دەپ شۋلاپ جاتتى. بەس قىزدىڭ ولىمىنەن كەيىن بەلگىلى رەجيسسەر تالعات تەمەنوۆ تەلەفون سوعىپ، وسى وقيعانى اۋىر كۇيزەلىسپەن جەتكىزدى ءارى ماعان ولەڭ جازشى دەپ ءوتىنىش ءبىلدىردى. «جەر بەتىندە پەرىشتەگە جوق ورىن» جىرى سودان تۋعان بولاتىن...
وسىدان كەيىن كوپ بالالى انالار ءار جەردە تالاپتارىن ايتىپ ەرەۋىلدەدى. اقىرى، ۇكىمەت وتستاۆكاعا كەتتى. تۋرا وسى قايعىلى جاعدايعا تىكەلەي قاتىسى بار دەپ ايتا المايمىن، بىراق سول جىلى ناۋرىزدا تۇڭعىش پرەزيدەنت ورنىن بوساتتى. ءبارىبىر بۇل ءبىزدىڭ قوعامدا كوپ جىلداردان بەرگى الەۋمەتتىك تەڭسىزدىك، كەدەيشىلىك زارىنىڭ ءوتىپ كەتكەندىگى ەكەنى انىق.
الاش قايراتكەرلەرىن ۇمىتۋ –ساياسي قاتەلىك
- ءبىر جىلدان بەرى ماجىلىستەسىز ءارى ءبىز بىلەتىن ەڭ بەلسەندى دەپۋتاتىسىز. قۇر اتتان ەمەس، ناقتى ماسەلەلەردى كوتەرىپ، ۇكىمەتكە قاراتا تالاي ساۋالدار جولدادىڭىز. سونىڭ بارلىعى ۇلتتىڭ قامى، اسىرەسە، الاش ارىستارىنا قاتىستى. جانە سول جولداناتىن باياندامالارىڭىزدى پروتوكولمەن بەكىتكەندەي رەسمي ەمەس، قازاقتىڭ بايىرعى جالپاق تىلىمەن جەتكىزىپ جاتاسىز. تىڭداپ، ايىزىڭ ءبىر قانىپ وتىرادى. بۇل دەگەنىمىز، قازاق قاۋىمىنىڭ كەزىندەگى شەرحان مۇرتازا اعامىزدىڭ جانايقايىنىڭ جاڭعىرىعىن ساعىنىپ قالعانى، ىشىندەگى قىجىلىن ءوزىڭىز ءدوپ باسىپ جاتىرسىز دەپ ايتساق، كەلىسەسىز بە؟
- ادىلەتسىزدىككە ۇشىراعان، قۋعىن كورگەن كارى تاريح پەن تاريحي تۇلعالاردىڭ ەسىمى دوڭگەلەپ وتىرىپ ۇرپاعىنىڭ الدىنا قايتىپ كەلەتىنى – ۇلى اكسيوما. ول الەمدىك تاجىريبەدە بار دۇنيە. ءوزىمىز دە قايراندا كەتكەن الاش بوزداقتارىنىڭ جىرىمەن سۋسىنداپ وسكەندىكتەن، ىشىمىزدە جاتقان بۇلقىنىستىڭ بولۋى دا زاڭدىلىق. سول سەبەپتى، حالىقتىڭ مۇڭى – مەنىڭ مۇڭىم، مەنىڭ مۇڭىم – حالىقتىڭ مۇڭى بولۋى كەرەك.
وتكەن جىلى پارلامەنتكە كەلىسىمەن، «اق جول» پارتياسىنىڭ فراكتسياسى اتىنان پرەمەر-ءمينيستردىڭ ورىنباسارى ەرالى توعجانوۆقا دەپۋتاتتىق ساۋال جولدادىق. وندا 30 جىلدىعى اتالىپ وتەتىن قازاق ەلى تاۋەلسىزدىگى جولىنداعى عاسىرلار بويعى جانقيارلىق كۇرەستەردىڭ ىشىندە الاشوردانىڭ ورنى ايرىقشا ەكەنى باسا ايتىلدى. ورتا ازيادا العاشقى زاماناۋي ساياسي پارتيا قۇرىپ، الاش وردا اۆتونومياسىن جاريالاعان الاش ارىستارى ازاتتىق جولىنداعى ۇلى كۇرەستە ۇلت بولاشاعى ءۇشىن سانالى تۇردە قۇرباندىققا بارا بىلۋىمەن قانداي قۇرمەتكە دە لايىقتى. باستى ۇرانى - جەردى ساتپاۋ، ەلدى ساقتاۋ، ءتىلدى ساقتاۋ. سونىمەن قاتار تاۋەلسىزدىكتىڭ 30 جىلدىعىن مەرەكەلەۋ جونىندەگى كوميسسيانىڭ مەملەكەتتىك دەڭگەيدەگى ءىس-شارالار قاتارىندا الاش كوسەمى ءاليحان بوكەيحاننىڭ 155 جىلدىعى دا بار ەكەنى ەسكەرىلىپ، قاراعاندىنىڭ وكتيابر اۋدانىنا ءاليحان بوكەيحاننىڭ ەسىمىن بەرۋ جونىندەگى شەشىمدى حالىق زور قۋانىشپەن قارسى الدى. جالپى، سوڭعى كەزدە الاش تاقىرىبىنىڭ ەل اراسىندا كەڭ تارالا باستاعانى وتە قۋانىشتى تەندەنتسيا. ەل تاۋەلسىزدىگى جولىندا جانىن پيدا ەتكەن الاش قايراتكەرلەرىنىڭ اسقاق رۋحىن قاستەرلەپ، ەستە قالدىرۋ شارالارى (كوشەلەرگە، مەكتەپتەرگە، ەلدى مەكەندەرگە ەسىمدەرىن بەرۋ، ەسكەرتكىشتەر قويۋ، ت.ب.) ەلوردا مەن وڭىرلەردە ءتيىستى دارەجەدە جۇزەگە اسۋى قاجەت. ونىڭ ناتيجەسى دە جوق ەمەس – استانادا الاش كوسەمدەرى ءاليحان، احمەت، مىرجاقىپتاردىڭ ەسكەرتكىشتەرى اسقاقتاپ تۇر قازىر.
الايدا، الاش دەسە قاراپايىم كوپشىلىكتىڭ ەسىنە تەك الاشوردا ۇكىمەتىنىڭ كورنەكتى كوسەمدەرى ءاليحان بوكەيحان، احمەت بايتۇرسىنۇلى، مىرجاقىپ دۋلاتۇلى سەكىلدى بىرنەشە تۇلعانىڭ ەسىمدەرى عانا كەلەدى. شىن مانىندە بۇل ءتىزىم الدەقايدا اۋقىمدى. ايتالىق، 2019 جىلى «اق جول» پارتياسى «الاش» ينستيتۋتىمەن بىرلەسىپ، بۇرىن بەلگىسىز بولىپ كەلگەن 700-دەن استام تۇلعانى قۇرايتىن جەرگىلىكتى الاش قايراتكەرلەرىنىڭ ءتىزىمىن دايىندادى. الاشتانۋشى عالىمداردىڭ زەرتتەۋلەرىنىڭ نەگىزىندە جاسالعان تىزىمگەكوپشىلىك قاۋىمعا ەسىمدەرى ۇمىت بولعان ءار ءوڭىردىڭ جەرگىلىكتى الاش قايراتكەرلەرى ەنگىزىلدى. ءاربىر وبلىس، قالا اكىمدەرىنە سول جەرگە قاتىسى بار، سول جەردەن شىققان الاششىل ازاماتتاردىڭ ءتىزىمى جىبەرىلىپ، ولاردىڭ اتتارىنجەرگىلىكتى جەردەگى كوشە، مەكتەپ، ت.ب. نىساندارعا بەرۋدىۇسىنعان بولاتىنبىز. الايدا، الىنعان جاۋاپتار كوڭىلگە قونبايدى. كوبىنەسە جاۋاپتار جالتارما سيپاتتا، بۇعان دەيىن الاشتىڭ ەل اۋزىنداعى جيىرما شاقتى تانىمال باسشىلارىنىڭ ەسىمدەرىن اتاۋمەن عانا شەكتەلگەن. بۇنداي ادىلەتسىزدىكتى ءبىز ۇلكەن ساياسي قاتەلىك دەپ سانايمىز. جالپى، بىزدە مەملەكەت تاراپىنان بەكىتىلگەن ءتىزىم بار، سوعان ەنگەن تۇلعالار عانا الگىدەي قۇرمەتكە يە بولا الادى. ول تىزىمگەكوپ الاش قايراتكەرلەرى كىرمەگەن. الاش تۋرالى تالاپتىەسكەرە وتىرىپ، سول مەملەكەتتىك ارنايى ءتىزىمدى قايتا قاراۋ كەرەك.
ۇلت ۇستازىن ۇلىقتاي ءبىلۋ – ۇلتتىعىمىزدى بىلدىرەدى
- مىنە، بۇگىن ۇلت ۇستازى، الاشتىڭ كوسەمى احمەت بايتۇرسىنۇلى مەرەيتويىنىڭ رەسمي اشىلۋ جيىنىنا ارنايى قاتىسۋعا قوستاناي توپىراعىنا كەلىپ وتىرسىز. احاڭنىڭ بۇل تويىنا ازىرلىك ماسەلەسى قوعامدا كۇنى بۇرىن از قوزعالعان جوق. بىراق ءوزىڭىز سول ماسەلەنى پارلامەنتتە ناقتىۇسىنىستارىڭىزبەن كوتەرىپ، ۇكىمەتكە دەيىن رەسمي ساۋال جولدادىڭىز. بۇگىنگى مەرەكەلىك شارانىڭ باستاۋىن سول ەڭبەگىڭىزدىڭ جەمىسى دەسەك، ارتىق ايتقاندىق ەمەس. ويلاعانىمىز ورىندالدى دەپ اۋىز تولتىرىپ ايتا الاسىز با؟
- ءيا، احاڭنىڭ 150 جىلدىعىنا بايلانىستى ۇكىمەت باسشىسى ورىنباسارى ە.توعجانوۆقا «اق جول» فراكتسياسىنىڭ دەپۋتاتتىق ساۋالىن جولداعانىمدى بىلەسىزدەر. ونىڭ ىشىندە الاش كوسەمدەرى احاڭ مەن جاحاڭنىڭ تۋعان اۋىلدارىنا باراتىن جول جوق ەكەندىگىن جازدىق. جاقىندا قوستاناي وبلىسىنىڭ اكىمى ارحيمەد مۇحامبەتوۆ جانگەلدين اۋدانىنا، سونىڭ ىشىندە احمەت بايتۇرسىنۇلى اۋىلىنا بارىپ، ەلمەن كەزدەستى. احاڭنىڭ تويىنا ارنالىپ ىستەلىپ جاتقان ءىس-شارالاردى، ونىڭ ىشىندە جول سالۋ باستالعانىن بايانداپ، جۇرتتىڭ وي-پىكىرىن، ۇسىنىستارىن تىڭداپ، ماڭىزدى ماسەلەلەردى ورىنداۋعا ۋادە ەتتى. حالىق ۇنىنە قۇلاق تۇرە بىلگەن وبلىس اكىمىنە العىس ايتامىز. ەندى سول ۋادەلەردىڭ بارلىعى ورىندالسىن دەپ سەنەيىك. ۇلىلارىمىزدى ۇلىقتاماساق، ەل بولىپ العا جىلجي المايمىز.
ال جولدانعان ساۋالىمىزعا ۇكىمەت تاراپىنان جاۋاپ حات كەلدى. وندا قازاقستان پرەزيدەنتىنىڭ 2021 جىلعى 19 ماۋسىمداعى №624 جارلىعىنا سايكەس احمەت بايتۇرسىنۇلىنىڭ 150 جىلدىق مەرەيتويىنا دايىندىق جانە ونى وتكىزۋ جونىندەگى مەملەكەتتىك كوميسسيا قۇرىلىپ، قازاقستان رەسپۋبليكاسىنىڭ مەملەكەتتىك حاتشىسى اتالعان كوميسسيا توراعاسى بولىپ بەلگىلەنگەنى جازىلعان. جالپى رەسپۋبليكالىق جوسپار بەكىتىلدى. يۋنەسكو كولەمىندە اتالىپ وتىلەتىن بولدى. ول جايىندا كوپشىلىك حاباردار. ال ەڭ باستىسى – احاڭ اۋىلىنا باراتىن جولدى كۇردەلى جوندەۋدەن وتكىزۋ جۇمىستارى شەشىمىن تاۋىپ وتىر. ءبىزدىڭ كوتەرگەن دەپۋتاتتىق ساۋال بويىنشا وبلىس ورتالىعىنداعى اۋەجايعا احمەت بايتۇرسىنۇلى ەسىمى بەرىلۋ تۋرالى ۇسىنىس ءوز قولداۋىن تاۋىپ جاتىر. قوستانايعا كەلگەن ادام ۇشاقتان تۇسكەن بەتتە «احمەت بايتۇرسىنۇلى اۋەجايى» دەگەن ۇلكەن جازۋ الىپعيماراتتىڭ ماڭدايشاسىندا جازۋ قارسى الىپ تۇرسا قانداي عانيبەت! بۇل جاعىنان ايماق باسشىلىعى زور ەڭبەك جاساپتى.
الايدا «قاپ، اتتەگەن-اي» دەگىزگەن ءبىر جايتقا قاپالانىپ قالدىق. ءبىز ۇلت ۇستازىنىڭ ەڭسەلى ەسكەرتكىشى تەك قوستانايمەن، قوس استانامەن عانا شەكتەلمەۋى كەرەك، بۇكىل تۇراننىڭ تۇلعاسى دەرلىك احاڭنىڭ ەسكەرتكىشى تۇركى الەمىنىڭ ورداسى تۇركىستاندا، العاشقى استانامىزدىڭ ءبىرى قىزىلوردادا، شىمكەنتتە، بارلىق وبلىس ورتالىقتارىندا دا تۇرۋى ءتيىس، تۇركيادا انكارادا، رەسەيدە ورىنبوردا، وزبەكستاندا تاشكەنتتە، ءازىربايجاندا ەسكەرتكىشتەرۋن ورناتۋعا قول جەتكىزۋ كەرەك دەپ اتاپ كورسەتىپ، ۇسىنىس جاساعان ەدىك. احاڭنىڭ تۋعان وبلىسى ورتالىعىندا وتكەن قوعامدىق كەڭەس احمەت بايتۇرسىنۇلىنىڭ مەموريالدىق كەشەنىن سالۋعا جانە ورىنبور قالاسىندا ەسكەرتكىشىن ورناتۋعا قارسى شىعىپتى. قوعامدىق كەڭەس وسى ۇيعارىمدى قولداپ داۋىس بەرىپتى. سىلتاۋلارى – «قارجى جەتپەيدى- مىس». اششى دا بولسا ايتايىن، وسى جايىن ەستىگەندە، «ۇلت ۇستازىن ۇلىقتاۋعا قارسى قوعامدىق كەڭەستى تاراتىپ جىبەرۋ كەرەك» دەپ جازعان ەدىك.
ۇلتتىڭ ۇلى ۇستازىنا قۇرمەتىمىز شەكسىز. ول قازاققا عانا ەمەس، تۇتاس تۇركى دۇنيەسىنە ورتاق تۇلعا. وبلىس اكىمى ارحيمەد مۇحانبەتوۆپەن كەزدەسكەنىمىزدە وسىنىڭ ءبارىن ايتتىق. ءبىر قۋانتارلىعى، ايماق باسشىلىعى كوپ دۇنيە اتقارىپ جاتىر ەكەن. سىن ايتىلادى، سول سىننان قورىتىندى شىعارىلعانى دۇرىس. سىنعا قارسى شىعۋ – حالىققا قارسى شىعۋ دەگەن ءسوز. ال يۋتۋب ارناسىندا تارالعان ۆيدەوداعىاحمەت بايتۇرسىنۇلى ءۇيىنىڭ مۇشكىل ءحالىن ايتىپ كۇيزەلگەن ابدىسالىق جاقسىمبەكوۆ اقساقالمەنىڭ تەلەفونىمدى ءوزى تاۋىپ الىپ، دەپۋتاتاتتىق ساۋالىما بايلانىستى «جىلاپ وتىرىپ تىڭدادىق» دەپ، شىنايى العىسىن ايتتى.
سول سەكىلدى تالاي اعايىندار حابارلاسىپ، العىستارىن ايتىپ جاتىر. ەلدىڭ اق تىلەگىنە ريزامىز، تەك ۇمىتتەرىن اقتاي الساق دەپ قايرات تانىتىپ ءجۇرمىز.
ەڭ باستىسى، ۇلت ۇستازىن ۇلىقتاي ءبىلۋ- ۇلتتىعىمىزدى، ەلدىگىمىزدى بىلدىرەدى.
قاندى قاڭتاردا ەل ەرەۋىلگە پۇل ءۇشىن عانا ەمەس، ءتىل ءۇشىن دە شىقتى...
- اعا، كەشەگى «قاڭتار قاسىرەتى» ەل جادىندا كوپ ۋاقىت بويى وشپەيتىنى انىق. وسى ءبىر شىرماۋى قالىڭ وقيعا مەن ونىڭ سالدارى جايىندا ءبىر اۋىز پىكىرىڭىزدى ايتاسىز با؟
- قاي زاماندا دا حالىقتىڭ تالابى ورىندالماي، ەلدىڭ جاعدايى ورىندالمايدى. كەشەگى قاسىرەتتى قاڭتار قاقتىعىسى بولعان كەزدە، جاڭاوزەندە بەيبىت ەرەۋىل باستالعاندا، 3 قاڭتار كۇنى «جاڭاوزەندىكتەردىڭ تالابى ورىندالۋى ءتيىس» دەپ ماقالا جازدىم. 4 قاڭتاردا ازات پەرۋاشەۆ «اق جول» پارتياسىنىڭ فراكتسياسىن وتكىزدى. 8 قاڭتار كۇنى «قازاقستان» ۇلتتىق ارناسىنىڭ «اشىق الاڭ» باعدارلاماسىنا شىقتىم. وندا ەلدىڭ نامىسى ءۇشىن، الەۋمەتتىك ادىلدىكتى تالاپ ەتىپ ەرەۋىلگە شىعىپ، بەيبىت شەرۋ وتكىزگەن ءارى سول جولدا جازىقسىز ۇستالىپ جاتقانداردى بوساتۋىن تالاپ ەتتىم. ال 9 قاڭتاردا “قازاق ءۇنى” ۇلتتىق پورتالىنا شىققان شىققان “حالىقتىڭ تىلىندە سويلەي الاتىن حالىقتىق ۇكىمەت كەرەك! جاڭاوزەن - جاڭا كەزەڭ باستاۋى» اتتى ماقالام، ودان سوڭ 10 قاڭتاردا شىققان «جازىقسىز جاندار جازاعا ءىلىنىپ كەتپەۋى ءتيىس”- اتتى ماقالامقاتتى قولداۋعا يە بولدى. بەلگىلى تەلەجۋرناليست نارتاي ارالبايۇلىنىڭ يۋتۋبارناسىندا ەرەۋىل تاقىرىبىندا سۇقبات بەردىم.
“التىندى باسىپ وتىرىپ، جالاڭاياققا اينالدىق!”-اتتى جىرىم جاريالاندى.
26 قاڭتاردا: “مەملەكەتتىك توڭكەرىس جاساعاندار تۇگەل انىقتالىپ تەگىس جازالانۋى ءتيىس” دەپ، «اق جول» فراكتسياسىنىڭ باس پروكۋرورعا دەپۋتاتتىق ساۋالىن جاريلادىم.
باسىنان باستاپ، قامالعاندار مەن ولاردىڭ تۋىستارىمەن كەزدەسۋلەر وتكىزدىك. ماسەلەن، ازات پەرۋاشەۆ ەكەۋمىز تارازداعى تۇرمەدە قاپاستا وتىرعان 68 ادامنىڭ بارلىعىمەن كەزدەسىپ، جەكە-جەكە سويلەستىك.
ءبىزدىڭ ارالاسۋىمىزبەن بىرنەشە جاس تۇرمەدەن بوساپ شىقتى، الدى العىستارىن جاريالاپ جاتىر.
حالىق كوشەگە پۇل ءۇشىن عانا ەمەس، ءتىل ءۇشىن دە شىققانىن جازدىم. جالپى، ءبىز ءتىل ماسەلەسىن تالاي كوتەرىپ كەلەمىز. «قازاق ءۇنى» گازەتى سايتىندا جاريالانعان پرەزيدەنتتەن مەملەكەتتىك ءتىل تۋرالى زاڭدى تالاپ ەتكەن اشىق حاتقا ءبىر جارىم ايدا 126 مىڭنان استامادام قول قويدى!
جالپى، قاڭتارداعى قايعىلى وقيعا جايىندا از ايتىلعان جوق. ءبىز دە ءوز تاراپىمىزدان بارلىق شىندىق اشىلىپ، كىنالىلەر جازالانۋى ءتيىس ەكەندىگىن تالاپ ەتىپ وتىرمىز. ءبىز ءۇشىن باستى ماقسات – مەملەكەتتى ساقتاپ قالۋ. قازىناعا باي، كەنگە تولى ەلدە كەدەيلەر بولماۋى ءتيىس. وليگارحتار زاڭسىز يەلەنگەن قارجىلارىن مەملەكەتكە قايتارۋى قاجەت. ۇلتتىق كونتسەپتسيا قابىلدايتىن ۋاقىت جەتتى. قاسىرەت قايتالانباۋى ءۇشىن ۇلتتىق كەلىسىم جاسالۋى كەرەك.
ايتالىق، جاڭا كەزەڭ باستاۋى بولعان جاڭاوزەن ەرەۋىلىنە پرەزيدەنتتىڭ ۇكىمەت كوميسسياسىن جىبەرىپ، ەرەۋىلشىلەردىڭ تالابىن ورىنداتۋى – وتىز جىلدىق تاۋەلسىزدىگىمىزدەگى بيلىكتىڭ حالىققا جاساعان العاشقى قادامى. بۇدان ون جىل بۇرىن جاڭاوزەندە ەرەۋىل بولعاندا نە بولعانى بارىمىزگە بەلگىلى. ال وسى جولعى قاڭتار قاسىرەتىندە پرەزيدەنتتىڭ بارلىق جاۋاپكەرشىلىكتى ءوزى كوتەرۋى مەملەكەتتى ساقتاپ قالدى. سوندىقتان، بۇل جەردە مەملەكەتتى ساقتاۋ جولىندا مەملەكەت باسشىسىنىڭ ءوزى دە قۇرباندىققا بارىپ وتىر دەۋگە بولادى. بارىنەن دە 227 ادامنىڭ قازا تاپقانى ورنى تولماس اۋىر قايعى...
تاباندى تالاپ ەتكەندە، ناتيجەسى دە جاقسى بولادى
- تالاپ دەگەننەن شىعادى. جالپى، جوعارى جاققا قويعان تالاپتارىڭىز ۇنەمى ورىندالىپ، قويعان ساۋالدارىڭىزدان ناتيجەلى جاۋاپتار كەلىپ جاتا ما؟
- ءوزىمىز قاراپايىم حالىق ىشىنەن شىققاندىقتان، ەل اتىنان سايلانعاندىقتان، ءار كەز سول جۇرتشىلىقتىڭ ويىنداعى جاتقان تۇيتكىلدەردى ناقتى دالەلدەرمەن ورتالىققا جەتكىزىپ كەلەمىز. تاباندى تالاپ ەتكەندە، ناتيجەسى دە داقسى بولادى. ءبىر عانا مىسال ايتايىن. وزدەرىڭىزگە ءمالىم، وتكەن جىلى فۋتبولدان ءبىزدىڭ جىگىتتەرىمىز فرانتسياقۇراماسىنان 8:0 ەسەبىمەن ماسقارا بولىپ جەڭىلگەن ەدى. اناۋ جىلى تۋىس ەل تۇركيادان 6:0 بولىپ ۇتىلعاندا جەرگە كىرىپ كەتە جازداعانبىز. بۇل دەگەنىڭىز فۋتبول تاريحىندا بولماعان ماسقارا جەڭىلىس! وسىعان بايلانىستى «گول سالمايتىن، تەك حالىق قازىناسىنا قول سالاتىن، قول سالعاندا مول سالاتىن فۋتبولعا ميللياردتتاردى شاشۋدى توقتاتۋ كەرەك! ونىڭ ورنىنا بالالار سپورتىن دامىتۋ كەرەك» دەپ تالاي ماسەلە كوتەردىك. ۇكىمەتكە جولدانعان دەپۋتاتتىق ساۋالىمىز قوعامدا ۇلكەن رەزونانس تۋدىردى. الەۋمەتتىك جەلىلەردە رەكوردتىق دەڭگەيدە تارادى. قولداۋ پىكىرلەردىڭ كوپتىگى سونشا، ەسەبى جوق. ناتيجەسىز فۋتبولعا بولىنگەن 133 ملردقا كەمىندە 133 مەكتەپ سالۋعا بولار ەدى.
بۇل دەپۋتاتتىق ساۋالىمىزعا ۇكىمەتتەن جاۋاپ جەتتى. زاڭدا بەلگىلەنگەن مەرزىم ءبىر اي بولعاندا «اق جولدىڭ» دەپۋتاتتىق ساۋالى بويىنشا فۋتبول بيۋدجەتى قايتا قارالىپ جاتقانى جونىندە، تولىق ەسەپتەلىپ بىتكەندە جاۋاپ بەرىلەتىنى تۋرالى ەسكەرتپە كەلگەن ەدى. اتاپ ايتقاندا «شاحتەر» (قاراعاندى وبل.) جانە «قايسار» (قىزىلوردا وبل.), «ورداباسى» (شىمكەنت ق.) فۋتبول كلۋبتارى سەنىمگەرلىك باسقارۋعا بەرىلىپ، «توبىل» فۋتبول كلۋبى (قوستاناي وبل.) جەكەشەلەندىرىلدى. سونىمەن قاتار، اقمولا وبلىسىنىڭ اكىمدىگى «وقجەتپەس» فۋتبول كلۋبىن 2023 جىلى جەكە مەنشىككە وتكىزۋدى جوسپارلاپ وتىر، ال ماڭعىستاۋ وبلىسىنىڭ اكىمدىگى وزىنە تيەسىلى كاسىبي فۋتبول كلۋبتارىن جەكەشەلەندىرۋ ماسەلەسىن پىسىقتاۋدا.
ەڭ باستىسى، كاسىبي كلۋبتارعا بولىنەتىن قاراجات 20,1 ملرد تەڭگەگە قىسقارتىلىپ، بۇل قارجى مەملەكەتتىك سپورتتىق تاپسىرىسقا، سپورت ينفراقۇرىلىمىنا، بۇقارالىق سپورتتىق ءىس-شارالارعا قايتا باعدارلاناتىن بولدى.
- لايىم، ەلىمىز امان، جۇرتىمىز تىنىش بولىپ، باستاعان ىستەرىڭىز وڭىنان شەشىلگەي دەپ تىلەيىك. كەڭ كوسىلىپ، سۇقبات قۇرعانىڭىزعا راحمەت!
سۇقباتتاسقان قىدىربەك قيىسحانۇلى
