بايقوڭىر قالاسىنىڭ تۇرعىندارى ءۇشىن وزەكتى تۇرعىن ءۇي، گازداندىرۋ سالالارىندا وڭ شەشىم بار. وبلىس اكىمى گۇلشارا ابدىقالىقوۆا بايقوڭىر قالاسىن دامىتۋ ماسەلەلەرىن قاراپ، قر پرەزيدەنتىنىڭ «بايقوڭىر» كەشەنىندەگى ارناۋلى وكىلىنىڭ قىزمەتىن قامتاماسىز ەتۋ باسقارماسىنىڭ باسشىسى جاسۇلان اباتوۆتىڭ اتقارعان جۇمىستارىن سارالادى.
جيىندا بايقوڭىر قالاسىن جىلۋ ەلەكتر ستانتسياسىن گازعا قوسۋ ماسەلەسى قارالدى. بۇگىنگى تاڭدا قالا اكىمشىلىگى قاجەتتىلىكتى ەسكەرە وتىرىپ ءتيىستى شارالاردى قابىلدادى. بۇل رەتتە وبلىس اكىمدىگى مەن سالالىق مينيسترلىك جىلۋ ەلەكترستانتسياسىنا گاز جەتكىزۋ باعىتىندا بىرلەسكەن جۇمىستاردى اتقارۋدا. ەگەر دە ستانتسيانى گازعا قوسۋ ماسەلەلەرى تولىققاندى جۇرگىزىلسە، تۇرعىندار ءۇشىن كوممۋنالدىق قىزمەت تولەمدەرى ءبىرشاما تومەندەيدى.
سونداي-اق، بيىل تورەتام، اقاي ەلدى مەكەندەرىن گازداندىرۋ ءۇشىن جوبا قۇرىلىسىن قارجىلاندىرۋعا ءوتىنىم بەرىلدى.
باسقوسۋدا بايقوڭىرداعى تۇرعىن ۇيلەردى قازاقستاندىقتارعا جەكەشەلەندىرۋ ماسەلەسى دە ايتىلدى. بۇگىنگى تاڭدا قازاقستان-رەسەي اراسىنداعى بىرلەسكەن تالقىلاۋلار جۇرگىزىلىپ، قوس تاراپ اراسىندا جەكەلەشەلەندىرۋدىڭ ماڭىزدىلىعى ايقىندالدى. الداعى ۋاقىتتا بىرلەسكەن شەشىمدەردى قابىلداۋ بويىنشا ورتاق ۇستانىم بولادى.
قازىرگى تاڭدا بايقوڭىردا 75 مىڭنان استام ادام تۇرادى. ونىڭ 66 پايىزدان استامى قازاقستاندىقتار. بۇعان دەيىن تۇرعىن ءۇيدى جەكەشەلەندىرۋ عارىش كەشەنىن پايدالانۋ جونىندەگى كەلىسىم بويىنشا تىيىم سالىنعان بولاتىن.
كەزدەسۋدە تالقىلانعان تاعى ءبىر ماسەلە – بايقوڭىر قالاسى اكىمشىلىگىنە قاراستى مەكتەپتەردە قازاق ءتىلى مەن ادەبيەتى، قازاقستان تاريحى پاندەرىن وقىتۋ.
جاسۇلان اباتوۆ بۇل ماسەلەدە قوس تاراپتىڭ ءبىلىم مينيسترلىگىمەن بىرلەسكەن شەشىمدەر قابىلدانعاننان كەيىن وقىتۋ پروتسەسىنە قاجەتتى جۇمىستاردى الدىن الا سارالاۋ قاجەت ەكەنىن تىلگە تيەك ەتتى. بۇل رەتتە بايقوڭىردا پەداگوگتاردىڭ وقۋ جۇكتەمەسىنە قاتىستى ايتارلىقتاي پروبلەما بولمايدى.
باسقارما باسشىسىنىڭ ۇسىنىستارىن سارالاعان وبلىس اكىمى بايقوڭىر قالاسىندا الەۋمەتتىك ماسەلەلەردى تۇراقتى تۇردە شەشۋ، تۇرعىندارعا تۇسىندىرمە جۇمىستارىن كۇشەيتۋ جانە بايقوڭىرلىقتاردىڭ تۇرمىستىق الەۋەتىن كوتەرۋ ءۇشىن اتقارىلاتىن شارالاردىڭ ۋاقىتىلى جۇزەگە اسۋىن قاداعالاۋدى قاپەرگە سالدى.
"ادىرنا" ۇلتتىق پورتالى
