بۇگىن وبلىستىق ءماسليحاتتىڭ كەزەكتى XXXIV سەسسياسىنا قاتىسقان قىزىلوردا وبلىسىنىڭ اكىمى مۇرات ەرگەشباەۆ كۇشىنە ەنگەن جاڭا اتا زاڭدا ازاماتتاردىڭ قۇقىقتارى مەن بوستاندىقتارىن قورعاۋ، زاڭ ۇستەمدىگىن قامتاماسىز ەتۋ، ادىلەتتى قوعام قۇرۋ باستى ماقسات رەتىندە بەلگىلەنگەنىن اتاپ ءوتتى.
«جاڭا پرەامبۋلادا بايىرعى قازاق جەرىندە مەملەكەتتىلىكتى نىعايتا وتىرىپ، ۇلى دالانىڭ مىڭجىلدىق تاريحي ساباقتاستىعىن ساقتاۋ باستى قاعيدات رەتىندە بەكىتىلگەن. بيلىك تارماقتارىنىڭ تەپە-تەڭدىگى نىعايتىلىپ، باسقارۋ جۇيەسى زامان تالابىنا ساي جاڭعىرتىلدى.
بۇل – مەملەكەتىمىزدىڭ تۇعىرىن نىعايتىپ، قوعامدىق كەلىسىم مەن تۇراقتىلىقتى ساقتاۋعا نەگىز بولاتىن ماڭىزدى قۇجات. مۇنىڭ بارلىعى –قازاقستاندى دەموكراتيالىق، قۇقىقتىق جانە الەۋمەتتىك مەملەكەت رەتىندە دامىتۋعا باعىتتالعان جۇيەلى قادامدار.
جاڭا اتا زاڭىمىز كۇشىنە ەنگەننەن كەيىن پرەزيدەنتىمىز 23 تامىزدا قۇرىلتاي سايلاۋىن وتكىزۋ تۋرالى جارلىققا قول قويدى. ۇلتىمىزدىڭ تاريحىنا التىن ارىپپەن جازىلاتىن ساياسي كەزەڭدە بارشاڭىزدى ەلدىك مۇددە جولىنداعى ماڭىزدى ىسكە بەلسەندى قاتىسۋعا شاقىرامىن»، – دەدى مۇرات نالقوجاۇلى.
جيىندا بىرقاتار ازاماتقا مەملەكەت باسشىسى قاسىم-جومارت كەمەلۇلىنىڭ جاڭا كونستيتۋتسيانىڭ كۇشىنە ەنۋىنە وراي جولداعان قۇتتىقتاۋ حاتى جانە كونستيتۋتسيانىڭ ارنايى باسىلىمى تابىس ەتىلدى.
