Ata-babamyzdyń bilektiń kúshimen, naızanyń ushymen qorǵap, bizge amanattap ketken táýelsizdigin táý etip, urpaqqa jetkizý – mindetimiz. Bıyl Táýelsizdiktiń 30 jyldyǵy qarsańynda respýblıka kóleminde, aýyl, aýdan, oblys boıynsha kóptegen is-shara ótkizilýde. Oǵan Úsharal orta mektebi ujymy da óz úlesin qosýda. «Táýelsizdiktiń 30 jyldyǵyna – 30 túp aǵash» dep mektep ujymy aǵash kóshetterin egip, kógaldandyrý jumysyn jalǵastyrdy. Qashyqtyqtan oqýshylar arasynda tárbıe saǵattary, sýret kórmesi, shyǵarma baıqaýy uıymdastyrylýda.
Táýelsizdiktiń 30 jylynda elimizdiń jetken jetistikteri, baǵyndyrǵan belesteri, Qazaqstandy álem tanyp moıyndaýy, mine, osy tarıhı shejireni búgingi urpaq bilip, sezinip ósýi tıis. Táýelsizdikke tartý retinde mektebimizdegi daryndy oqýshylar óz jyr-tolǵaýlaryn arnaýda. Sondaı oqýshylardyń biri – 11-synyp oqýshysy Gúlmaral Jańabaı. Táýelsizdiktiń 30 jyldyǵyna arnaǵan myna óleńin tebirenbeı oqý múmkin emes:
Otyz jyl Táýelsizdik tórindemiz,
Áli talaı bıikterden kórinermiz.
Rýhty elim, qazaǵym, máńgi jasap,
Urpaqtardyń jyry bop tógilermiz.
Qanshama tarıh jatyr qoınaýyńda,
Uly Dalam, jazıraly jaılaýyńda.
Sol tarıhtyń berilgen jemisi ǵoı,
Búgingi táýelsizdik toılaýyń da.
Egemendik kelmedi ǵajappenen,
Keldi qıyn-qystaýmen, azappenen.
Órshil rýhty ata-babam arqasynda,
Tanyldy ataýymyz «qazaq» degen.
Tógildi osy jolda qanshama qan,
Kórsetti batyrlyǵyn qanshama jan?!
Ańsaýmenen egemendi el bolýdy,
Ótti qansha tún men qanshama tań?!
Ótken talaı tarıhtyń saǵasynan,
Boı kótergen Esildiń jaǵasynan.
Salyndy bas qalamyz Saryarqadaı,
Keń-baıtaq qazaǵymnyń dalasynan.
Bul kúnderi Nur-Sultan astanamyz,
Ásem, sulý kórkińe shattanamyz.
Tatý-tátti, beıbit tynysh, kórkem sulý,
Bas qalamyz ózińmen maqtanamyz.
Tik ustaǵan tórtkúl dúnıe terezesin,
Búgin elim keń jaıady keregesin.
Qýanyshpen, shattyqpen, maqtanyshpen,
Toılaýdamyz táýelsizdik merekesin.
Óleń atty ólkege ózindik sapar shegip júrgen Gúlmaraldyń bolashaǵynan zor úmit kútemin. Mekteptegi «Jas qalam», «Jas qaýyrsyn» úıirmelerinen shyńdalǵan shákirtimniń jetistikteri aýdandyq, oblystyq, respýblıkalyq basylymdarda jaryq kórdi. Aýdandyq, oblystyq Ábish Kekilbaev oqýlarynyń jeńimpazy, «Jastary belsendi eldiń erteńi jarqyn» atty jazba aqyndar músháırasynda jáne «Ónerdi ulyqtaǵan jastar» atty baıqaýdan Alǵys hat ıelendi.
A.Qunanbaıulynyń 175 jyldyǵyna baılanysty «Altyn ǵasyr» ǵylymı-praktıkalyq ortalyǵy uıymdastyrǵan jarysta Maqtaý qaǵazy men arnaıy medalmen marapattaldy. «Eli súıgen, jerin súıgen Elbasy» respýblıkalyq shyǵarmalar baıqaýynyń birinshi oryn ıegeri. Gúlmaral Ersinqyzynyń shyǵarmashylyq jolyna talmas talap tileı otyryp, alar asýlary áli de kóp bolady dep senemin.
Gúlnara QOJAHANOVA,
Úsharal orta mektebiniń muǵalimi
