Almaty oblysynda Respublika künıne orai ziiatkerlık oiyndar jäne auyl şaruaşylyǧy järmeŋkelerı, sporttyq jarystar men turnirler, konsertter men körmeler, senbılıkter men qaiyrymdylyq ıs-şaralary, jalpy barlyǧy 200-den astam ıs-şara ötedı. Mereke qarsaŋynda bırqatar eldı mekende jaŋa äleumettık nysandar aşylyp, tūrǧyndardyŋ igılıgıne baǧyttalǧan jobalar ıske qosylady.
Jaŋa äleumettık nysandar aşylady
Bügın 22 qazanda Qarasai audanynyŋ Qaskeleŋ qalasynda 20 otbasy baspanaly boldy. Jyl soŋyna deiın taǧy 46 otbasyn tūrǧyn üimen qamtu josparlanǧan. Sondai-aq Jarmūhambet auylynda tūrǧyndardy sapaly tırşılık närımen qamtamasyz etetın jaŋa su jüiesı ıske qosyldy.
23 qazanda Jambyl audanynyŋ Qarǧaly auylynda 350 oryndyq jaŋa mädeniet üiı aşylady. Ekı qabatty ǧimaratta körermen zaly, kıtaphana, horeografiiaǧa arnalǧan zal jäne şyǧarmaşylyq üiırmelerge qajettı oryndar qarastyrylǧan.
Al 27 qazanda Raiymbek audanynyŋ Narynqol auylynda jaŋa emhana paidalanuǧa berıledı. Tört qabatty medisinalyq mekeme bır auysymda 250 adamdy qabyldai alady. Mūnda tūrǧyndarǧa kündızgı stasionar men oŋaltu bölımşesınıŋ qyzmetterı de qoljetımdı bolady.
Sport dodalary ūiymdastyrylady
22 qazanda Ūiǧyr audanynyŋ ortalyǧy Şonjy auylynda velojarys öttı. Oǧan audan tūrǧyndary men mekeme qyzmetkerlerınen 200-den astam adam qatysty. Jarys soŋynda eŋ jas jäne eŋ ülken jastaǧy qatysuşylar marapattaldy.
Al 22-24 qazan aralyǧynda Ile audanynyŋ Ötegen batyr kentınde Älmerek baba jüldesıne arnalǧan respublikalyq sambo turnirı ötedı. Bozkılemde Qazaqstannyŋ 13 öŋırınen, sondai-aq Özbekstan men Qyrǧyzstannan kelgen 250-ge juyq jas sportşy baq synaidy.
Senbılık, järmeŋke jäne merekelık jeŋıldıkter
17-29 qazan aralyǧynda Alatau qalasyndaǧy «Evraziia», «Jetısu» jäne «Toimart» sauda oryndarynda «Republic Day» aksiiasy ötedı. Osy künderı tūrǧyndar türlı tauarlardy jeŋıldıkpen satyp ala alady.
23 qazanda Qarasai audanynyŋ Eltai auylynda «Taza Qazaqstan» bastamasy aiasynda 200 tüp aǧaş otyrǧyzylady. İgı şara auyldyŋ körkın arttyryp, jasyl jelek kölemın köbeituge jäne qorşaǧan ortany taza ūstauǧa baǧyttalǧan.
Al 24 qazanda Qonaev qalasyndaǧy «Aişa Siti» bazarynda «Dala dämı» auyl şaruaşylyǧy järmeŋkesı ötedı. Mūnda jergılıktı şarualardyŋ önımderı qoljetımdı baǧamen ūsynylady.
Memlekettık Tu köterılıp, merekelık konsertter ötedı
23 qazanda oblys ortalyǧy Qonaev qalasyndaǧy Mädeniet üiınde saǧat 12:00-de merekelık konsert ötedı. Körermender aldynda Qazaqstannyŋ halyq ärtısı Maqpal Jünısova, Bolat Äbdılmanov, Qazaqstannyŋ eŋbek sıŋırgen qairatkerı Bekjan Tūrys, Şäkärım Almasbek, Ūljan Aǧlaqova, Nūrlan Äşımov jäne basqa da önerpazdar öner körsetedı. Sondai-aq «Ūlytau» toby, «Altynai» bi ansamblı, Süiınbai atyndaǧy Almaty oblystyq filarmoniiasynyŋ ışektı-simfoniialyq kameralyq orkestrı, «Qūlansaz» bi toby men «Alatau äuenderı» konserttık ūiymynyŋ önerpazdary qatysady.
Merekelık baǧdarlamada «Atameken» beine-horeografiialyq prology men «Jerūiyq» teatrlandyrylǧan qoiylymy ūsynylady.
Būl künı merekelık konsertter men saltanatty jiyndar Qonaev qalasynan bölek Alatau qalasynda, sondai-aq barlyq audanda ūiymdastyrylady.
Al 25 qazanda ortalyq alaŋda Memlekettık Tu köterılıp, Änūran oryndalady. Saltanatty räsımnen keiın konsert ötedı.
Irı investisiialyq jobalar ıske qosylady
Merekelık şaralar 27 qazanda da jalǧasady. Būl künı Kegen audanynda ekı ırı investisiialyq joba ıske qosylady.
Bırınşısı – qūny 2,5 mlrd teŋge bolatyn et öŋdeu kombinaty. Käsıporyn bır auysymda 15 tonna et öŋdep, 1,5 myŋ kelı şūjyq jäne 1 myŋ banka konservı öndıre alady. Keşen qūramyndaǧy mal soiu sehynda täulıgıne 50 basqa deiın ırı qara, 150 basqa deiın qoi-eşkı jäne 10 jylqy soiuǧa mümkındık bar. Jaŋa käsıporynda 115 jūmys orny aşylady.
Sol künı qūny 2,8 mlrd teŋge bolatyn «Compass Group» avtojanarmai qūiu stansiiasy men servistık keşenı de paidalanuǧa berıledı. Mūnda 80 adam jūmyspen qamtylady. Keşen halyqaralyq jäne respublikalyq maŋyzy bar joldarmen qatynaityn jolauşylar men turisterge qyzmet körsetedı. Jobaǧa säikes, nysan jylyna 800 myŋǧa deiın keluşını qabyldai alady dep kütılude.
