Almaty oblysynyń tilderdi damytý jónindegi basqarmasynyń uıymdastyrýymen Talǵar aýdandyq mádenıet jáne tilderdi damytý bólimi Táýelsizdigimizdiń 30 jyldyǵyna oraı «Rýhanı jańǵyrý» baǵdarlamasy aıasynda rýhanı qundylyqtardy nasıhattaý, jastardy otansúıgishtikke tárbıeleý, ádebıettiń damýyna yqpal etip, memlekettik tildiń mártebesin kóterý maqsatynda Almaty oblysy ákiminiń «Aq qaýyrsyn» júldesi úshin «Til — ǵumyr» atty aýdandyq baıqaý jarııalaǵan bolatyn. Baıqaýda poezııalyq baǵyt boıynsha «Til jáne Táýelsizdik» taqyrybyna bir óleń, erkin taqyryptaǵy bir óleń qamtylatyn bolsa, prozalyq baǵytta «Til – táýelsizdik tiregi» taqyrybyna arnalǵan shyǵarmany usyný mindettelgen.
Jıyrma altynshy naýryzdan bastalǵan atalmysh baıqaýǵa 20-45 jas aralyǵyndaǵy qalam terbep júrgen daryn ıeleri buryn sońdy esh jerde jarııalanbaǵan shyǵarmalaryn elektrondy poshta arqyly joldap, ózi jaıynda qysqa málimetter jiberýi tıis bolatyn. Bir aı ýaqyt ishinde kelip túsken segiz úmitkerdiń shyǵarmasy qalamgerlerden qurylǵan qazylar alqasymen saraptalyp, úzdik dep tanylǵan úsh adamnyń shyǵarmasy oblystyq baıqaýǵa joldandy. Atap aıtar bolsaq, Poezııa baǵyty boıynsha bas júldege aqyn Maqsat Erejep laıyqty dep tanylsa, birinshi oryn Nursultan Beısenbekke, ekinshi oryn aqyn Baǵdat Sársenbaıǵa, úshinshi oryn Erjan Saltaqov pen Saııda Tileýlıevaǵa buıyrdy. Al proza baǵyty boıynsha Gúlnár Muratqyzynyń til týraly shyǵarmasy úzdik dep tanyldy. Al ekinshi oryndy Uljan Sadyqova, úshinshi oryndy Janbota Sultanmuratqyzy ıelendi.
Qazylar alqasy shyǵarmalardy baǵalaýda kórkemdik deńgeıiniń joǵary bolýyna, ıdeıa ereksheligine, ádebı-kórkem qundylyǵyna, baıandaý rettiligi men maǵynalyǵyna, janrǵa sáıkestigine, estetıkalyq áser teńdigine, grammatıkalyq jáne stılıstıkalyq qatelikterdiń bolmaýyna, taqyryptyń jan-jaqty ashylýyna basa nazar aýdardy.
Sonymen qatar Talǵar aýdandyq mádenıet jáne tilderdi damytý bóliminiń uıymdastyrýymen memleketimizdegi til saıasatyn iske asyrýdyń 2020-2025 jyldarǵa arnalǵan memlekettik baǵdarlamasyn júzege asyrý, M.Maqataevtyń 90 jyldyq mereıtoıyn keńinen nasıhattaý, óleń qudireti arqyly memlekettik tildiń mártebesin kóterý, jastardy ádebı sheberlikke baýlý, jas talantty aqyndardy taný maqsatynda «Poezııa menimen egiz be ediń?» atty aýdandyq onlaın baıqaýy 30 naýryzdan bastap jarııalanǵan bolatyn. Atalmysh baıqaýǵa aýdanymyzdyń ár óńirinen 37 úmitker qatysyp, 3 kezeń boıynsha baq synady. 15-29 jas aralyǵyndaǵy úmitkerlerden iriktelgen baıqaý óz máresine jetip ádilqazylardyń baǵalaýymen jeńimpazdar anyqtaldy. «Bolashaq, sen tursań, men ólmespin!» dep atalatyn birinshi kezeńde úmitkerler óz shyǵarmashylyǵynan aqynǵa arnalǵan óleńderin oqysa, «…Al ekinshi baqytym – tilim meniń» dep atalatyn ekinshi kezeńde til taqyrybyna arnalǵan kez-kelgen aqynnyń bir óleńin oqý mindettelgen. «Kúndelik jaz, jarqynym!» dep atalatyn úshinshi kezeńde aqynnyń kúndeliginen syr shertý, aqyn beınesi arqyly kórkemsóz oqý sheberligin tanytýlary tıis bolǵan.
Úsh kezeń túgeldeı qamtylyp túsirilgen úmitkerlerdiń beınejazbalary áleýmettik jelidegi paraqshalarǵa jarııalanǵan. Barlyq úmitkerlerdiń ónerimen tanys bolǵan ádilqazy músheleri olardyń eńbekterin jan-jaqty baǵalap, eń úzdik degen qatysýshylardy iriktedi. Baǵalaý barysynda ár tapsyrmaǵa eki mınýt ýaqyt berilgen bolsa sol reglamenttiń saqtalý tártibi men beınejazbalardyń sapalary eskerildi. Poezııany oqý sheberlikterine, jetkize bilý qabiletterine asa mán berdi. Keıbir úmitkerlerdiń baıqaý shartyn durys túsinbegenderi, tapsyrmalardy nemquraıly oryndaǵandary, keıbir beınejazbalar óte tómen sapamen túsirilgendigi aıshyqtalyp turdy. Dese de ózgelerden ozyq shyǵyp, ónerimen tánti etken úmitkerler óz baǵalaryna laıyq dep tanyldy.
Atap aıtar bolsaq, bas júldege Gúlnár Kereı, birinshi orynǵa Elaman Qyzaıbek pen Dýman Dúısenbi, ekinshi orynǵa Meıirjan Maratov pen Medet Dáýletjan, úshinshi orynǵa Qaraqat Kájek, Aıdana Qalıbaeva, Aıgerim Jetpisbaeva syndy úmitkerler laıyq dep tanyldy. Jeńimpazdar arnaıy dıplomdarmen marapattaldy. Baıqaýǵa qatysqan basqa qatysýshylarǵa da «Alǵys hattar» tabystaldy.
Aınash Áldıbek,
«Talǵar»
