Biz zaıyrly qoǵamǵa qurylǵan zańmen ómir súretin elmiz. Sondyqtan, bizdiń elde Ata zańymyz bola tura ekinshi bir dinniń zańy qatar qoldanysta bolýy - bitpeıtin teketireske alyp keletini zańdylyq.
Myna vıdeodaǵy “ustaz” meshitke jamaǵatyn jınap alyp “áıeldi urýǵa” ruhsat berip otyr. Tipti, áıel adamyn osylaı “tárbıeleýge” úgittep otyr dese de bolady.
Sonda qalaı bolǵany?!
Bizdiń elde otbasyndaǵy zorlyq-zombylyqqa qarsy zańdarymyzdyń aıasynda qanshama jumystar júrgizilip jatyr. Prezıdenttiń janynan qurylǵan arnaıy komıssııa da jumys isteýde. Egerde oǵan muqtajdyq bolmasa, onda ol komıssııa men onyń óńirlerdegi ókilderi turaqty jumys istemes edi. Olardyń qolyndaǵy statıstıkalar balalardyń quqyǵyna baılanysty ashyq jarııalanbaıdy. Biraq, sol komıssııanyń óńirlerdegi múshelerimen aýyzeki sóılesseńiz sumdyq málimetterdi estı alasyz. Ondaı otbasylarmen kúresýge komıssııanyń tipti resýrostary jetpeı jatyr.
Endi qarańyz!
Úkimettik mekemeler shamasy kelgenshe kúresip jatqanda, mynandaı moldasmaqtar otbasyndaǵy zorlyq-zombylyqqa ruhsat berip, tipti úgittep otyr.
Bir otbasyndaǵy áıeli óz quqyǵymen ómir súrgisi kelse, meshitten mynandaı ýaǵyzdarmen “arqalanyp kelgen” erkegi otbasyndaǵy qatynasyn “sharıǵatymen rettegisi” keledi. Bir otbasyndaǵy qatynastyń eki túrli zańmen rettelýi múmkin be? Árıne, joq!
Memleket te - Úlken otbasy.
Mundaı qatynas bir otbasyn ekige bólýge alyp keletini zańdylyq. Al, onyń zardaby men júgin kóteretin bala men memleket!
Budan shyǵatyn qortyndy - Qazaqstan Musylmandary Dinı Basqarmasy óziniń ýaǵyzdaryn qaıta qaraıtyn ýaqyt keldi degen sóz. Abaı atamyzdyń “Ánniń de estisi bar, eseri bar” degenindeı, sharıǵat zańdarynyń da bizdiń zaıyrly qoǵamǵa qatysty “estisi bar, eseri bar” bolyp tur.
Meshitterdegi ýaǵyz aıtatyn “ustazdaryn” qaıta daıyndyqtan ótkizip, bizdiń quqyqtyq qoǵamnyń ustanymyna qarsy keletin kez-kelgen sharızat zańdaryn nasıhattaýǵa tıym salýlary kerek.
Tipti, Parlamenttegi Quqyqtyq komıtettiń músheleri men bilikti zańgerlerden jumysshy tobyn quryp, bizdiń qoldanystaǵy zańymyzǵa qarsy keletin sharıǵat zańdaryn qaıta qarap, súzgiden ótkizip alý kerek dep oılaımyn. Osylaı bizdiń Ata zańymyzǵa qarsy keletin kez-kelgen sharıǵat zańdaryn úgitteýge tıym salynýy kerek.
Sonda ǵana dinniń zańy men elimizdiń qoldanystaǵy zańdary arasyndaǵy teketirestiń joıylýyn qamtamasyz etýge bolady. Bolmasa, jyldaǵy “oramal daýy”, “otbasy zańy” t.b teketiresterdiń jyl ótken saıyn shıelene túse bereri anyq.
Keshegi eks-mınıstrdiń máselesi qoǵamdaǵy aısbergtiń tek tóbesi ǵana. Onda da ol adam tanymal bolǵan soń jaryqqa shyǵyp ketti. Al, ondaı otbasylardyń shynaıy málimetterin kórseńizder shashtaryńyz turady. Bul jaıynda Prezıdent janyndaǵy komıssııa múshesi Baıan Aıtbekovna Jandosova apaımen bir joba boıynsha eki kún júrip sumdyq málimetterge ábden qanyqqanmyn.
Al, mynandaı “ustazsymaqtarǵa” bári bir. Aldyna kelgen jamaǵatynyń qoshemetine arqalanyp, zańǵa qaıshy bolsa da “sharıǵat osy” dep zańsyzdyqqa aıtaqtap otyra bermek. Jaqsy bir zańger arqyly myna moldanyń úgit-nasıhatyn saraptamaǵa jiberetin bolsań, zorlyq-zombylyqqa úgittegeni boıynsha oń qortyndy alýǵa bolady. Ary qaraı zańmen jazalaý túkte emes. Osy boıynsha QR Bas prokýratýrasynyń nazaryna / da usynamyn. Qylmystyń quramy bar-joǵyn saralaýǵa.
Májilis depýtaty Abzal Quspan myrza!
Sizdiń nazaryńyzǵa búgin resmı hatpen usynysymdy joldaımyn. Ary qaraı sizden “Sharıǵat zańdaryn Ata zańymyzǵa saı qaıta saralap, bizdiń qoǵamda qoldanysqa jaraıtyn-jaramaıtyndaryn QMDB-ǵa ajyratyp berý men moldalardy qaıta daıyndaý kýrstarynan ótkizip, arnaıy sertıfıkat arqyly ýaǵyz aıtýlaryna ruhsat beretin zań qabyldaý týraly” osy usynysymdy komıtettiń kún tártibine engizýdi suraımyn.
Ata zańnyń ústemdigi kez-kelgen sharıǵat zańynan joǵary bolýy kerek!
Ol qatań baqylaýda bolýy kerek.
