ءبىز زايىرلى قوعامعا قۇرىلعان زاڭمەن ءومىر سۇرەتىن ەلمىز. سوندىقتان، ءبىزدىڭ ەلدە اتا زاڭىمىز بولا تۇرا ەكىنشى ءبىر ءدىننىڭ زاڭى قاتار قولدانىستا بولۋى - بىتپەيتىن تەكەتىرەسكە الىپ كەلەتىنى زاڭدىلىق.
مىنا ۆيدەوداعى “ۇستاز” مەشىتكە جاماعاتىن جيناپ الىپ “ايەلدى ۇرۋعا” رۇحسات بەرىپ وتىر. ءتىپتى، ايەل ادامىن وسىلاي “تاربيەلەۋگە” ۇگىتتەپ وتىر دەسە دە بولادى.
سوندا قالاي بولعانى؟!
ءبىزدىڭ ەلدە وتباسىنداعى زورلىق-زومبىلىققا قارسى زاڭدارىمىزدىڭ اياسىندا قانشاما جۇمىستار جۇرگىزىلىپ جاتىر. پرەزيدەنتتىڭ جانىنان قۇرىلعان ارنايى كوميسسيا دا جۇمىس ىستەۋدە. ەگەردە وعان مۇقتاجدىق بولماسا، وندا ول كوميسسيا مەن ونىڭ وڭىرلەردەگى وكىلدەرى تۇراقتى جۇمىس ىستەمەس ەدى. ولاردىڭ قولىنداعى ستاتيستيكالار بالالاردىڭ قۇقىعىنا بايلانىستى اشىق جاريالانبايدى. بىراق، سول كوميسسيانىڭ وڭىرلەردەگى مۇشەلەرىمەن اۋىزەكى سويلەسسەڭىز سۇمدىق مالىمەتتەردى ەستي الاسىز. ونداي وتباسىلارمەن كۇرەسۋگە كوميسسيانىڭ ءتىپتى رەسۋروستارى جەتپەي جاتىر.
ەندى قاراڭىز!
ۇكىمەتتىك مەكەمەلەر شاماسى كەلگەنشە كۇرەسىپ جاتقاندا، مىنانداي مولداسماقتار وتباسىنداعى زورلىق-زومبىلىققا رۇحسات بەرىپ، ءتىپتى ۇگىتتەپ وتىر.
ءبىر وتباسىنداعى ايەلى ءوز قۇقىعىمەن ءومىر سۇرگىسى كەلسە، مەشىتتەن مىنانداي ۋاعىزدارمەن “ارقالانىپ كەلگەن” ەركەگى وتباسىنداعى قاتىناسىن “شاريعاتىمەن رەتتەگىسى” كەلەدى. ءبىر وتباسىنداعى قاتىناستىڭ ەكى ءتۇرلى زاڭمەن رەتتەلۋى مۇمكىن بە؟ ارينە، جوق!
مەملەكەت تە - ۇلكەن وتباسى.
مۇنداي قاتىناس ءبىر وتباسىن ەكىگە بولۋگە الىپ كەلەتىنى زاڭدىلىق. ال، ونىڭ زاردابى مەن جۇگىن كوتەرەتىن بالا مەن مەملەكەت!
بۇدان شىعاتىن قورتىندى - قازاقستان مۇسىلماندارى ءدىني باسقارماسى ءوزىنىڭ ۋاعىزدارىن قايتا قارايتىن ۋاقىت كەلدى دەگەن ءسوز. اباي اتامىزدىڭ ء“اننىڭ دە ەستىسى بار، ەسەرى بار” دەگەنىندەي، شاريعات زاڭدارىنىڭ دا ءبىزدىڭ زايىرلى قوعامعا قاتىستى “ەستىسى بار، ەسەرى بار” بولىپ تۇر.
مەشىتتەردەگى ۋاعىز ايتاتىن “ۇستازدارىن” قايتا دايىندىقتان وتكىزىپ، ءبىزدىڭ قۇقىقتىق قوعامنىڭ ۇستانىمىنا قارسى كەلەتىن كەز-كەلگەن شاريزات زاڭدارىن ناسيحاتتاۋعا تيىم سالۋلارى كەرەك.
ءتىپتى، پارلامەنتتەگى قۇقىقتىق كوميتەتتىڭ مۇشەلەرى مەن بىلىكتى زاڭگەرلەردەن جۇمىسشى توبىن قۇرىپ، ءبىزدىڭ قولدانىستاعى زاڭىمىزعا قارسى كەلەتىن شاريعات زاڭدارىن قايتا قاراپ، سۇزگىدەن وتكىزىپ الۋ كەرەك دەپ ويلايمىن. وسىلاي ءبىزدىڭ اتا زاڭىمىزعا قارسى كەلەتىن كەز-كەلگەن شاريعات زاڭدارىن ۇگىتتەۋگە تيىم سالىنۋى كەرەك.
سوندا عانا ءدىننىڭ زاڭى مەن ەلىمىزدىڭ قولدانىستاعى زاڭدارى اراسىنداعى تەكەتىرەستىڭ جويىلۋىن قامتاماسىز ەتۋگە بولادى. بولماسا، جىلداعى “ورامال داۋى”، “وتباسى زاڭى” ت.ب تەكەتىرەستەردىڭ جىل وتكەن سايىن شيەلەنە تۇسە بەرەرى انىق.
كەشەگى ەكس-ءمينيستردىڭ ماسەلەسى قوعامداعى ايسبەرگتىڭ تەك توبەسى عانا. وندا دا ول ادام تانىمال بولعان سوڭ جارىققا شىعىپ كەتتى. ال، ونداي وتباسىلاردىڭ شىنايى مالىمەتتەرىن كورسەڭىزدەر شاشتارىڭىز تۇرادى. بۇل جايىندا پرەزيدەنت جانىنداعى كوميسسيا مۇشەسى بايان ايتبەكوۆنا جاندوسوۆا اپايمەن ءبىر جوبا بويىنشا ەكى كۇن ءجۇرىپ سۇمدىق مالىمەتتەرگە ابدەن قانىققانمىن.
ال، مىنانداي “ۇستازسىماقتارعا” ءبارى ءبىر. الدىنا كەلگەن جاماعاتىنىڭ قوشەمەتىنە ارقالانىپ، زاڭعا قايشى بولسا دا “شاريعات وسى” دەپ زاڭسىزدىققا ايتاقتاپ وتىرا بەرمەك. جاقسى ءبىر زاڭگەر ارقىلى مىنا مولدانىڭ ۇگىت-ناسيحاتىن ساراپتاماعا جىبەرەتىن بولساڭ، زورلىق-زومبىلىققا ۇگىتتەگەنى بويىنشا وڭ قورتىندى الۋعا بولادى. ارى قاراي زاڭمەن جازالاۋ تۇكتە ەمەس. وسى بويىنشا قر باس پروكۋراتۋراسىنىڭ نازارىنا / دا ۇسىنامىن. قىلمىستىڭ قۇرامى بار-جوعىن سارالاۋعا.
ءماجىلىس دەپۋتاتى ابزال قۇسپان مىرزا!
ءسىزدىڭ نازارىڭىزعا بۇگىن رەسمي حاتپەن ۇسىنىسىمدى جولدايمىن. ارى قاراي سىزدەن “شاريعات زاڭدارىن اتا زاڭىمىزعا ساي قايتا سارالاپ، ءبىزدىڭ قوعامدا قولدانىسقا جارايتىن-جارامايتىندارىن قمدب-عا اجىراتىپ بەرۋ مەن مولدالاردى قايتا دايىنداۋ كۋرستارىنان وتكىزىپ، ارنايى سەرتيفيكات ارقىلى ۋاعىز ايتۋلارىنا رۇحسات بەرەتىن زاڭ قابىلداۋ تۋرالى” وسى ۇسىنىسىمدى كوميتەتتىڭ كۇن تارتىبىنە ەنگىزۋدى سۇرايمىن.
اتا زاڭنىڭ ۇستەمدىگى كەز-كەلگەن شاريعات زاڭىنان جوعارى بولۋى كەرەك!
ول قاتاڭ باقىلاۋدا بولۋى كەرەك.
