Qazaqstan Jazýshylar odaǵy Almaty oblystyq fılıalynyń tóraǵasy Qanat Ábilqaıyr muzbalaq aqyn Muqaǵalı Maqataev meken etken Qarasazdaǵy úı qańyrap turǵanyn jazdy, dep habarlaıdy "Adyrna" tilshisi.
Qarasazdaǵy kezekti poezııa keshteriniń birine barǵanda Qanat Ábilqaıyr aýyldy aralap, Maqataevtar áýletiniń úıine joly túsedi. Onyń aıtýynsha aqyn úıin búginde kisiler baspana etip otyr.
"Eki bólmeli úıdiń tóbesinen bórenelerdiń dini kórinip tur. Bylǵarydan qaptalǵan esik pen qalyń taqtaıly edeni de kemi 60-70 jyldan beri kádege jarap turǵany baıqalady. Tereze de baıaǵy zamandy eske túsiredi" dep jazdy ol.
Aýyl adamdary men ákimdikten surastyrǵan aqparat boıynsha qonaq etken úıleri Muqaǵalı Maqataevtyń Qarasazǵa kelgen saıyn osy úıge qonyp, aýnap-qýnaǵan, Muqaǵalıdy ómirge ákelgen Naǵıman anamyzdyń osy úıde ómiriniń biraz bóligin ótken, Muqaǵalıdyń baýyry Toqtarbaıdyń qasıetti ordasy bolǵan qara shańyraq ekeni belgili boldy.
Orys aqyny Pýshkınniń Oral qalasynda az ýaqyt aıaldaǵan kezde turǵan úıi qazir Pýshkınniń murajaıy, al Almatydaǵy Ahmet Baıtursynulynyń murajaıy bolyp turǵan baspanada Ahmet atamyz az ýaqyt qana ómir súrgendigin aıtyp, bul baspananyń da eleýsiz qalmaǵanyn qalaıtynyn jetkizdi qoǵam belsendisi.
Qanat Ábilqaıyr Maqataevtar áýletiniń kóziniń qarashyǵyndaı bolyp saqtalǵan kóne aǵash úı memleket qorǵaýyna alynyp, úıdiń qabyrǵasyna bul úıdiń Maqataevtar áýletine tıesili úı ekeni týraly taqtaısha ornatylyp, mýzeı balansyna satyp alyp, mýzeı fılıalyna aınaldyryp, Muqaǵalıdyń úı jaǵdaıynda qoldanǵan jádigerleri qoıylyp, aqynnyń rýhanı ordasyna aınalǵanyn qoldap otyr. Jazba astyna pikir qaldyrǵan ádebıet janashyryna aınalǵan jurtshylyq, aıtylǵan ıdeıany qos qoldap qoldaýda.
