Bir kezde kenshiler qalasynda shahter bolyp jumys istegen Jumeken aqyn qaıladan qoly bosaǵanda qalamyn alyp:
Qaraǵandy bir qaraǵan sekildi,
Kúıe basqan kirpikterin sál ashyp.
Sodan keıin meniń qońyr betimdi,
Súıdi jeli kún nurymen talasyp,
-dep jyrlaǵan edi.
Sol Jumeken aǵamyzdyń shabytyn oıatqan qazynaly Qaraǵandynyń kirpigine kúıe juqtyrmaı, kóshesine kir shaldyrmaı, aıaýlysyndaı aıalap júrgen ardaqty azamattar kóp-aq.
Ilgeride dańqty dáriger, dilmar sheshen Ǵabdolla Qulqybaev bizdiń baǵdarlamamyzǵa bergen bir suhbatynda "Ál-Farabı: "Eger qalada tereń bilimdi, asa zııaly bir adam turatyn bolsa, ol qalanyń baqytty shahar ekenine daý joq" depti. Al bizdiń Qaraǵandyny dál sondaı bir emes, eki adam mekendedi. Olar - Evneı Býketov pen Jaıyq Bekturov. Demek, bizdiń Qaraǵandy eki ese baqytty", - dep edi...
Shynynda da kenshiler qalasy - zııalylardan baǵy janǵan qala. Sol zerdeli zııalynyń biri - ǵıbratty ǵalym, bilikti basshy, zııatty zańger Nurlan Dýlatbekov.
Aqyl-oıdyń alyby Evneı Býketov negizin qalǵan Qaraǵandy ýnıversıtetiniń búgingi rektory. Únemi izdenedi. Tynym tappaıdy. Eshqashan qol qýsyryp, qarap otyrmaıdy. Birese, óz otany Japonııany jersinbeı, qazaq jurtyna qaıtyp oralǵan Aqtastaǵy Ahıkomen syrlasyp turady, birese Sergeı Esenınniń bel balasy Aleksandrdy izdep, AQSh-qa jol tartyp ketedi. Endi birde tarıhtyń aqtańdaqtaryn aqtaryp, arhıvte júredi. Taǵy birde qala qonaqtaryn irgedegi Karlagqa bastap alyp bara jatady.
Qaraǵandydaǵy Karlag mýzeı-kesheninde odan kóp bolǵan adam joq shyǵar. Osymen neshinshi ret bara jatyr eken sol ǵımaratqa? Bálkim, júzinshi, bálkim, myńynshy...
Kóp jyldan beri Alash arystarynyń murasyn jan-jaqty zerttep keledi. Buǵan sol dáýirdegi el ardaqtylarynyń birazynyń mamandyǵy zańger ekendigi de áser etpeı qoıǵan joq. Zańger ǵalym zańǵar tulǵalardyń ǵıbratty ǵumyrnamasy men mııatty murasyn jerine jetkize zerdelese nesi bar?!
Jaýynger jyraý Dospanbettiń:
Azaýlyda aǵa bolǵan erler kóp edi,
Áıtse de almaǵa at baılaǵany joq edi, -
dep keletin joryq jyry esterińizde bolar. Sol dúldúl jyraý aıtqandaı, óz jurtynda aǵa bolǵan Nurekeń almaǵa at baılamasa da, búgin alpysqa kep at baılady!
Alpysyńyzdyń altyn qazyǵy berik bolsyn, Nurlan dos! Orta tolsyn, Alpystyń aýyly!
Baýyrjan OMARULY
