Bizdiń býyn... KazGÝ-di aqyndar alqalaǵan jyldar... Qalashyqty jaılaǵan qaptaǵan shaıyrdyń qataryna keshke qaraı Jalańtóstiń jasaǵyndaı bop, KazPI-diń jaısań jigitteri bir búıirden qosylatyn.
Jaı jigitter emes, ózegine óleń qonǵan órimdeı jastar. Muǵalimder ınstıtýtynyń fılfagynda oqıtyn talantty tastúlekter Nurlan Ábdibekov pen Qadirbek Qunypııaulynyń janynda kórkemsýret-grafıka fakýltetiniń bolmysy bólek syryqtaı stýdenti Qazybek Isa júrer edi. Bolashaq sýretshiniń óleńine deıin ózgeshe-tuǵyn... KazPI-den kúnara kelip júrip, qalashyqtyń turǵyndaryna áıgili "Shyńǵyrlaýdaǵy shyraılymdy" jattatty. Birinshi kýrsta Svetqalı Nurjan "Kópten beri estimeı syńǵyryn jyrdyń, Almatyǵa syıa almaı shyńǵyryp júrmin" dep eki jol óleń órgen-di. Sony oqyp, jappaı shyńǵyryp, sher tarqatyp júrgen bizdiń qatarlastarymyz endi "Shyńǵyrlaýdaǵy shyraılymǵa" bas qoıdy.
Shyrqalǵan kókte júr qalyqtap án,
Shynaıy súıý - shyn baqyt.
Shyńǵyrlaý dese, shyrmalyp qalam,
Shyńyraý oıǵa shym batyp...
Keıin ataqty bard aqyn Tabyldy Dosymov osy óleńge án jazdy. Sóıtip, ekeýi ult uǵymyndaǵy aq mahabbatqa, pák sezimge, ádepti arýǵa, sol arýdy ósirgen órkendi óńirge eskertkish qoıdy. Sol tustaǵy jas jigitterdiń jan-júregin shyńǵyrtqan Shyńǵyrlaý sulýynyń kim bolǵany, onyń bizdiń Qazybektiń jolynda neǵyp júrgeni, odan sońǵy taǵdyr-talaıy tipti de mańyzdy emes. Eń bastysy, bul óleń bizdiń zamanymyzdaǵy alǵaýsyz taza kóńildiń, móldir muńnyń kórinisi edi. Júzigi júreginde júretin qaǵilez Qazybek qalaı bolǵanda da óleńmen órilgen ózgeshe órnekti ómirge ákeldi. Mıymyzǵa mórdeı basylyp, áli kúnge deıin sanamyzda jańǵyryp turǵanyna qaraǵanda, bul óleńdi bir emes, qos Qazybek jazǵan sekildi kórinedi keıde. Aqyn Qazybek qolyna jyr-qalamdy alyp, tereńnen tolǵanyp, odan ári sýretshi Qazybek qylqalamyn ońtaılap, bederlep-beıneleı jónelgen be dersiń... Múmkin, bári de múmkin, bul kórkemónerdiń qupııasy taýsylǵan ba, sirá?!
Jalpy, ádebıet tarıhynda qalǵan sýretshi qalamgerler az emes. Kórkemóner salasynda da azdy-kópti qoltańbasy bar aǵylshynnyń sóz zergerleri Ýılıam Bleık men Ýılıam Tekkereıdi, franýz jazýshylary Vıktor Gıýgo men Antýan de Sent-Ekzıýperıdi, orys aqyndary Vladımır Maıakovskıı men Maksımılıan Voloshındi aıtsaq ta bolar. Ózimizdiń qazaq ádebıetinde de sýretshi qalamgerler jetip artylady. Álibek Asqarov, Qaıyrbaı Zákirov, Qultóleý Muqash, Maraltaı Ybyraev, Ersaıyn Japaq... Solardyń arasynda sýretshiliginen góri sýretkerliginiń jetegine kóbirek erip ketken Qazybek Isanyń jóni bólek.
Sóıtip, sýretshi Qazybek áldeqashan sýretker Qazybekke aınaldy. Tek sýretker ǵana emes... Arqaly aqyn. Qarymdy qaıratker. Qaısar qazaq. Ult joqshysy. Halyq qalaýlysy. Til tilekshisi. Aqyryp teńdik surap júrgen aıbarly azamat. Onyń ár qyryna keńirek toqtalýǵa bolar edi...
Búgin bizdiń dáýirdiń qara qyldy qaq jarǵan Qazybegi alpysqa toldy... Jyr-qalamyńyz ben qylqalamyńyz qolyńyzdan túspesin, qadirli Qazke!
Baýyrjan Omaruly
