جەزقازعان قالاسىنداعى Kazahmys Energy جەو-دا ءىرى ءورت بولدى، تۇرعىن ۇيلەر مەن كەڭسە عيماراتتارىنىڭ 40 پايىزى بىرنەشە ساعات بويى جارىقسىز قالدى، دەپ حابارلايدى "ادىرنا" ۇلتتىق پورتالى.
«پاتريوت» پورتالى جازعانداي، توتەنشە جاعداي 7 قاراشا كۇنى ساعات 18:43-تە بولعان. ءورتتىڭ جالپى اۋماعى 100 شارشى مەتردى قۇرادى.
ەلەكتر تسەحىنىڭ كابىلدىك ەدەنىندەگى جارامسىز بولعان پلاستيكالىق شامدار، جوعارى ۆولتتى باسقارۋ كابەلدەرى جانە بەس تەرەزە بلوگى ورتەنىپ كەتكەن. قاراعاندى وبلىسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ كۇشىمەن ەلەكتر تسەحىنان جەتى ادام ەۆاكۋاتسيالاندى. ءورت 20:11-دە ءسوندىرىلدى، — دەپ حابارلادى تجد ءباسپاسوز قىزمەتى.
قۇرباندار مەن زارداپ شەككەندەر جوق.
ءورتتىڭ شىعۋ سەبەبى انىقتالۋدا.
توتەنشە جاعدايعا بايلانىستى جەزقازعانداعى تۇرعىن ۇيلەر مەن نىساندارعا ەلەكتر قۋاتىن بەرۋ شەكتەلدى – 30-40 پايىزدى ايتىپ وتىرمىز. قالانى ەلەكتر ەنەرگياسىمەن تولىق قامتاماسىز ەتۋ ءۇشىن بارلىق قاجەتتى شارالار قابىلداندى. ساعات 22:00 شاماسىندا كەيبىر ۇيلەر ەلەكتر جارىعىنا قوسىلىپ، ەلەكتر قۋاتىنسىز قالعان ۇيلەردىڭ سانى 15 پايىزعا جۋىقتادى. قازىردىڭ وزىندە ساعات 23:00-دە اپاتتى جەلىلەردەن قايتا قوسۋ اياقتالىپ، بارلىق تۇتىنۋشىلارعا ەلەكتر قۋاتىن بەرۋ قالپىنا كەلتىرىلدى. جىلۋمەن قامتۋ جۇيەسىندە اقاۋ بولعان جوق. بارلىق جىلۋ ماگيسترالدارى جۇمىس ىستەدى جانە ادەتتەگىدەي جۇمىسىن جالعاستىرۋدا»، - دەپ حابارلادى جەزقازعان قالاسى اكىمدىگىنىڭ ءباسپاسوز قىزمەتى.
"ادىرنا" ۇلتتىق پورتالى
