ەۋروپالىق بانك موڭعولياعا 2.2 ملرد دوللار قارجى قۇيماق

821

ەۋروپالىق قايتا قۇرۋ جانە دامۋ بانكى (ەققدب) موڭعوليادا قۇرىلعاننان بەرى ەلدەگى 116 جوباعا 2,2 ميلليارد دوللاردان استام ينۆەستيتسيا سالدى. بۇل تۋرالى ورتالىق ازيا بويىنشا باسقارۋشى ديرەكتورى جۋجاننا حارگيتاي باستاعان ەققدب دەلەگاتسياسىمەن كەزدەسۋدە پرەزيدەنت ۋ.حۇرەلسۋح مالىمدەدى، دەپ حابارلايدى "ادىرنا" ۇلتتىق پورتالى. 

كەزدەسۋ بارىسىندا تاراپتار موڭعوليا مەن ەققدب اراسىنداعى ەكولوگيا، جاسىل دامۋ، ينفراقۇرىلىم، جاڭارتىلاتىن ەنەرگيا كوزدەرى جانە بيزنەس سالاسىنداعى ىنتىماقتاستىقتى كەڭەيتۋ مۇمكىندىكتەرىن تالقىلادى.

حارگيتاي حانىم موڭعوليا مەن ەققدب اراسىنداعى بولاشاق ىنتىماقتاستىعى نەگىزىنەن تسيفرلاندىرۋ، جاسىل ەكونوميكا، اۋىلدى دامىتۋ جانە جاس كاسىپكەرلەردى قولداۋ سياقتى سالالارعا باعىتتالاتىنىن اتاپ ءوتتى. ەققدب تاجىريبە الماسۋعا جانە كليماتتىڭ وزگەرۋىنە قارسى كۇرەس، اتاپ ايتقاندا دەكاربونيزاتسيا سالاسىندا ناقتى زەرتتەۋلەر جۇرگىزۋگە دايىن ەكەنىن ءبىلدىردى.

كليمات پەن جاسىل دامۋدىڭ جاھاندىق ماسەلە ەكەنىنە توقتالعان پرەزيدەنت ۋ.حۋرەلسۋح موڭعوليا جالپى ىشكى ءونىمنىڭ كەم دەگەندە ءبىر پايىزىن قورشاعان ورتاعا جۇمساۋ ساياساتىن جۇزەگە اسىرىپ، ءبىر ميلليارد اعاش وتىرعىزۋ ناۋقانىن باستاعانىن ايتتى. ول پرەزيدەنتتىڭ ءىس-شارالار جوسپارى، ۇكىمەتتىڭ ءىس-شارالار جوسپارى جانە «كوزقاراس 2050» ۇزاق مەرزىمدى باعدارلامالىق قۇجاتى «تدم 2030» باعدارلاماسىنا سايكەس كەلەتىنىن اتاپ ءوتتى.

مەملەكەت باسشىسى كەزدەسۋدە تالقىلانعان جوبالار مەن باعدارلامالاردى جۇزەگە اسىرۋ ءۇشىن ەققدب-مەن بارلىق اسپەكتىدە ىنتىماقتاسۋعا، قورشاعان ورتانى قورعاۋ سالاسىنداعى، اتاپ ايتقاندا، شولەيتتەنۋ مەن شاڭدى داۋىلمەن كۇرەستە ىنتىماقتاستىقتى كەڭەيتۋگە دايىن ەكەنىن ءبىلدىردى.

"ادىرنا" ۇلتتىق پورتالى

پىكىرلەر
ۇقساس جاڭالىقتار