رەسەي پرەزيدەنتى ۆلاديمير پۋتين مەن اقش پرەزيدەنتى دونالد ترامپتىڭ قىتاي حالىق رەسپۋبليكاسىنىڭ توراعاسى سي تسزينپينمەن كەزدەسۋى 19 قاراشادا شەنچجەن قالاسىندا وتەدى. بۇل تۋرالى اق ءۇي جاريالاعان اقش پرەزيدەنتىنىڭ جۇمىس كەستەسىندە كورسەتىلگەن، دەپ حابارلايدى «ادىرنا» ءتىلشىسى.
ۇشجاقتى سامميت Kylin Villa قوناقۇي كەشەنىندە وتەدى دەپ جوسپارلانعان. كەلىسسوزدەر جەرگىلىكتى ۋاقىت بويىنشا ساعات 14:30-دا (استانا ۋاقىتىمەن 11:30 – رەد.) باستالادى.
بۇعان دەيىن ازيا-تىنىق مۇحيتى ەكونوميكالىق ىنتىماقتاستىعى ءسامميتى اياسىندا وتەتىن پۋتين، ترامپ جانە سي ءتسزينپيننىڭ كەزدەسۋىندە يادرولىق قارۋ ماسەلەسى نەگىزگى تاقىرىپتاردىڭ ءبىرى بولاتىنى حابارلانعان ەدى.
قىتايدىڭ South China Morning Post باسىلىمىنىڭ مالىمەتىنشە، ۋكرايناداعى قاقتىعىس پەن كورەي تۇبەگىن يادرولىق قارۋسىزداندىرۋ ماسەلەلەرى كوشباسشىلار كەزدەسۋىندە تالقىلانۋى مۇمكىن تاقىرىپتار تىزىمىنەن ءىس جۇزىندە الىنىپ تاستالعان.
گازەت دەرەككوزدەرىنىڭ ايتۋىنشا، تاراپتار ورتاق كەلىسىمگە كەلە الاتىن باعىتتارعا باسىمدىق بەرىپ وتىر. اتاپ ايتقاندا، ءۇش ەلدىڭ باسشىلارى يادرولىق ارسەنالداردى باسقارۋ جۇيەلەرىندە جاساندى ينتەللەكتىنى پايدالانۋدى باقىلاۋ ماسەلەسى بويىنشا كەلىسىمگە كەلۋى مۇمكىن.
كوپتى كۇپتى قىلعان كەزدەسۋ وتەتىن كۇن قىزىقتى ءبىر داتامەن سايكەس كەلىپ وتىر.
ادەتتە 19 قاراشا بۇۇ باستاماسىمەن دۇنيەجۇزىلىك دارەتحانا كۇنى رەتىندە اتاپ وتىلەدى. بۇل اتاۋلى كۇن 2001 جىلدىڭ قاراشاسىندا سينگاپۋردا ناشار سانيتاريا ماسەلەلەرىنە ارنالعان حالىقارالىق كونفەرەنتسيادا جاريالانعان. 2026 جىلعى دۇنيەجۇزىلىك دارەتحانا كۇنى سانيتاريا مەن گەندەرلىك تەڭدىككە باعىتتالعان. «قاۋىپسىز دارەتحانالار. تەڭ مۇمكىندىكتەر» ۇرانىمەن وتەتىن ناۋقان قاۋىپسىز سانيتاريانىڭ ايەلدەر مەن قىزداردىڭ دەنساۋلىعىن، فيزيكالىق قاۋىپسىزدىگىن، قادىر-قاسيەتىن جانە مۇمكىندىكتەرىن قالاي قورعايتىنىن، ولارعا ءبىلىم الۋعا، جۇمىس ىستەۋگە جانە قوعامعا تولىققاندى قاتىسۋعا مۇمكىندىك بەرەتىنىن كورسەتەدى.
