مەملەكەت باسشىسى قاسىم-جومارت توقاەۆ پەن موڭعوليا پرەزيدەنتى ۋحنااگين حۋرەلسۋحتىڭ كەلىسسوزى رەسمي دەلەگاتسيا مۇشەلەرىنىڭ قاتىسۋىمەن كەڭەيتىلگەن قۇرامدا ءوتتى. بۇل تۋرالى اقوردانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
تاراپتار اۋىل شارۋاشىلىعى، جەڭىل ونەركاسىپ، تسيفرلاندىرۋ، تاۋ-كەن، تۋريزم، كولىك-لوگيستيكا، وڭىرارالىق بايلانىس باعىتتارىنداعى ءوزارا ءتيىمدى سەرىكتەستىك پەرسپەكتيۆاسىن تالقىلادى.
مەملەكەتتەر باسشىلارى بۇل رەتتە ۇكىمەتارالىق كوميسسيانىڭ جۇمىسىن جانداندىرۋ، استانا – ۇلان-باتىر، وسكەمەن – ولگەي باعىتتارىنداعى اۋە رەيستەرىن قايتا اشۋ، ەكى ەل اراسىندا توتە اۆتوكولىك جولىن سالۋ ماسەلەسىن پىسىقتاۋ ماقساتىندا ۇكىمەتارالىق جۇمىس توبىن قۇرۋدىڭ ماڭىزىنا ءمان بەردى.
قازاقستان پرەزيدەنتى بايان-ولگەي ايماعىندا قازاقستان كونسۋلدىعىن اشۋعا كورسەتكەن قولداۋى ءۇشىن موڭعوليا باسشىسى العىس ايتتى.
بۇدان بولەك، كەزدەسۋدە ەكى ەلدىڭ ءبىلىم بەرۋ، مادەنيەت جانە تۋريزم سالالارىنداعى ىنتىماقتاستىعىن ىلگەرىلەتۋ ماسەلەسى قاراستىرىلدى.
