مەملەكەتتىك سارايدا موڭعوليا رەزيدەنتى ۋحنااگين حۇرەلسۇحتىڭ ء«داستۇرلى موڭعول مەديتسيناسىن دامىتۋ تۋرالى» جارلىققا قول قويۋىنىڭ سالتاناتتى ءراسىمى ءوتتى، دەپ حابارلايدى "ادىرنا" ۇلتتىق پورتالى montsame.mn-گە سىلتەپ.
ءىس-شارا بارىسىندا مەملەكەت باسشىسى ءداستۇرلى موڭعول مەديتسيناسىنىڭ ەلدىڭ تاريحي مۇراسىنىڭ، مادەني داستۇرلەرىنىڭ جانە زياتكەرلىك الەۋەتىنىڭ اجىراماس بولىگى ەكەنىن اتاپ ءوتتى.
پرەزيدەنتتىڭ ايتۋىنشا، ءداستۇرلى موڭعول مەديتسيناسىنىڭ تاريحى بەس مىڭ جىلدان اسا ۋاقىتتى قامتيدى. 1681 جىلى كورنەكتى ەمشى ەردەنەبانديدا حۋتۋگت لۋۆساندانزانجانتسان ەلدەگى العاشقى ماارامبتار مەن ديەتولوگ-دارىگەرلەردى دايارلايتىن مەكتەپتىڭ نەگىزىن قالاپ، ونى وقۋ-ەمدەۋ مەكەمەسى رەتىندە جۇيەلەگەن.
عاسىرلار بويى وقۋ جانە كلينيكالىق قۇرال رەتىندە قولدانىلعان «ادام دەنەسىنىڭ قۇرىلىسى تۋرالى جوعارى دارەجەدە بەكىتىلگەن تراكتات» اتتى بىرەگەي ەڭبەك 2025 جىلى يۋنەسكو-نىڭ ماتەريالدىق ەمەس مادەني مۇرالار تىزىمىنە ەنگىزىلگەن. بۇل شەشىم ءداستۇرلى موڭعول مەديتسيناسىنىڭ حالىقارالىق بەدەلىن ارتتىرىپ، كەڭىنەن تانىلۋىنا ىقپال ەتكەن.
بيىل موڭعولياداعى ءداستۇرلى مەديتسينا مەكتەبىنىڭ قۇرىلعانىنا 345 جىل تولۋىنا وراي جانە وسى سالاداعى زاماناۋي قىزمەت كورسەتۋ جۇيەسىن دامىتۋ اياسىندا ء«داستۇرلى موڭعول مەديتسيناسىن دامىتۋ تۋرالى» جارلىق قابىلداندى.
قۇجاتقا سايكەس، ۇكىمەتكە ءداستۇرلى مەديتسينا سالاسىنىڭ قۇقىقتىق بازاسىن جەتىلدىرۋ، ونى وزىق تەحنولوگيالار مەن جاساندى ينتەللەكت نەگىزىندە دامىتۋ، بىلىكتى كادرلار جۇيەسىن قالىپتاستىرۋ، سونداي-اق ءداستۇرلى ءدارى-دارمەكتەردىڭ ساپاسى، قاۋىپسىزدىگى مەن ستاندارتتالۋىن قامتاماسىز ەتۋ جونىندە كەشەندى ساياسات جۇرگىزۋ تاپسىرىلدى.
