ماسكاتتاعى كەلىسسوز. تاشكەنت پەن ومان 30-عا جۋىق قۇجات ازىرلەدى

277
Adyrna.kz Telegram
https://adyrna.kz/storage/uploads/pFRvijH1vZ0ewN5X3Y98m8Pjuw6zlj3dBdhhV8Ae.jpg

16 قاراشادا وزبەكستان پرەزيدەنتى شاۆكات ميرزيوەۆ ومان سۇلتاندىعىنىڭ استاناسى ماسكات قالاسىنا ەكى كۇندىك مەملەكەتتىك ساپارمەن باردى. اۋەجايدا ونى ومان سۇلتانى حايسام بين تاريك ءال سايد قارسى الدى. بۇل تۋرالى وزبەكستان پرەزيدەنتىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى. ساپار اياسىندا جالپى قۇنى شامامەن 5 ميلليارد دوللار بولاتىن جوبالار مەن كەلىسىمشارتتار بويىنشا 30-عا جۋىق قۇجات ازىرلەنگەن، دەپ حابارلايدى «ادىرنا» ءتىلشىسى.

ومان اۋە كەڭىستىگىندە پرەزيدەنت ۇشاعىن كورولدىك اۋە كۇشتەرىنىڭ جويعىش ۇشاقتارى الىپ جۇرگەن. اۋەجايدا قۇرمەت قاراۋىلىنىڭ سالتاناتتى ءراسىمى ءوتىپ، قىسقاشا اڭگىمەلەسكەننەن كەيىن ميرزيوەۆ پەن سۇلتان بىرگە ء«ال-الام» سارايىنا بەت العان. وندا رەسمي كەزدەسۋ ءوتىپ، مەملەكەت باسشىلارى ەكىجاقتى ىنتىماقتاستىقتى، سونداي-اق وڭىرلىك جانە حالىقارالىق ماسەلەلەردى تالقىلاعان.

ساپار باعدارلاماسىنا جوعارى دەڭگەيدەگى كەلىسسوزدەر مەن ءىرى كومپانيالاردىڭ باسشىلارىمەن كەزدەسۋلەر ەنگىزىلگەن. وزبەكستان تاراپى ساۋدا، ينۆەستيتسيا، اۋىل شارۋاشىلىعى، تۋريزم جانە مادەني بايلانىستاردى نەگىزگى باعىتتار رەتىندە اتاپ وتكەن. كەلىسسوزدەر قورىتىندىسى بويىنشا ەكىجاقتى قۇجاتتار مەن كەلىسىمدەرگە قول قويۋ جوسپارلانعان.

قۇنى 5 ميلليارد دوللاردى قۇرايتىن كەلىسىمدەر توپتاماسى تۋرالى بۇعان دەيىن وزبەكستاننىڭ ينۆەستيتسيالار، ونەركاسىپ جانە ساۋدا ءمينيسترى لازيز قۇدراتوۆ مالىمدەگەن. ومان سىرتقى ىستەر مينيسترلىگىنىڭ حابارلاۋىنشا، تاراپتار وزبەكستان-ومان ينۆەستيتسيالىق كومپانياسىنىڭ جارعىلىق كاپيتالىن 500 ميلليون دوللارعا دەيىن ۇلعايتۋ جانە ورتالىق ازيا مەن ومان پورتتارى اراسىنداعى كولىك باعىتتارىن دامىتۋ ماسەلەلەرىن دە تالقىلاعان. الايدا پرەزيدەنت ساپارىنا دايىندالعان قۇجاتتاردىڭ تولىق ءتىزىمى جاريالانعان جوق.

كەلىسسوزدەردىڭ تاعى ءبىر ماڭىزدى باعىتى – پرەفەرەنتسيالىق ساۋدا تۋرالى كەلىسىم. تاشكەنت ومانعا ازىق-تۇلىك، جەمىس-جيدەك پەن كوكونىس ونىمدەرىن، مىس، اليۋميني، توقىما بۇيىمدارىن، ەلەكتر تەحنيكاسى مەن حيميا ونىمدەرىن ەكسپورتتاۋدى ارتتىرۋدى كوزدەپ وتىر. ال كەرى باعىتتا قانت، پوليمەرلەر، مۇناي ونىمدەرى مەن مايلاۋ ماتەريالدارىن جەتكىزۋ ماسەلەسى قاراستىرىلۋدا.

بىرلەسكەن ءوندىرىس ورىندارىن اشۋ دا كۇن تارتىبىندە بار. اتاپ ايتقاندا، فارماتسەۆتيكا كاسىپورىندارىن قۇرۋ، ەلەكتر جابدىقتارى مەن اۆتوموبيل بولشەكتەرىن شىعارۋ جوسپارلانىپ وتىر. لوگيستيكا سالاسىندا وزبەكستانداعى تەرمينالداردى دامىتۋ جانە پارسى شىعاناعى ەلدەرى مەن شىعىس افريكا نارىقتارىنا شىعۋ ءۇشىن ومان پورتتارىن پايدالانۋ ماسەلەلەرى تالقىلانعان.

ىسكەرلىك كەزدەسۋلەردىڭ ءبىر بولىگى بۇعان دەيىن ءوتىپ قويعان. وزبەكستان ۇكىمەتىنىڭ رەسمي پورتالىنداعى اقپاراتقا سايكەس، ماسكاتتا ۇيىمداستىرىلعان بيزنەس-فورۋم مەن كورمەگە ەكى ەلدىڭ 150-دەن استام كومپانيا وكىلى مەن ىسكەرلىك توپ مۇشەسى قاتىسقان. فورۋم قورىتىندىسى بويىنشا ەنەرگەتيكا، ونەركاسىپ، كولىك جانە لوگيستيكا، قارجى، اۋىل شارۋاشىلىعى مەن تەحنولوگيا سالالارىندا قۇجاتتارعا قول قويىلعان. 

الايدا ولاردىڭ اتاۋلارى مەن قارجىلىق كولەمى جاريالانباعان. قازىر ەكى ەل اراسىنداعى ءوزارا ساۋدا كولەمى ايتارلىقتاي ۇلكەن ەمەس. 2026 جىلدىڭ قاڭتار-قىركۇيەك ايلارىندا تاۋار اينالىمى شامامەن 3,3 ميلليون دوللاردى قۇراپ، وتكەن جىلدىڭ سايكەس كەزەڭىمەن سالىستىرعاندا 70 پايىزدان استام وسكەن.

وزبەكستان مەن ومان اراسىنداعى ديپلوماتيالىق قاتىناس 1992 جىلى ورناعان. 2009 جىلدىڭ قازانىندا ومانعا وزبەكستاننىڭ تۇڭعىش پرەزيدەنتى يسلام كاريموۆ مەملەكەتتىك ساپارمەن بارعان ەدى. ال 2026 جىلدىڭ شىلدەسىنەن باستاپ ماسكات پەن تاشكەنت اراسىندا Oman Air اۋە كومپانياسى اپتاسىنا ەكى رەت تىكەلەي رەيس ورىندايدى.

پىكىرلەر