قاراعاندى وبلىسى، شاحتينسك قالاسىندا مۇگەدەك بالالاردىڭ اتا-انالارى دابىل قاعۋدا. بالالار جاتتىعاتىن دامۋ ورتالىعى عيماراتسىز قالۋى مۇمكىن. بۇل تۋرالى “ادىرنا” ۇلتتىق پورتالى قازاقپارات سايتىنا سىلتەمە جاساپ حابارلايدى.
كەكەش، اۋتيزم جانە داۋن سيندرومى بار بالالارعا ارنالعان دامۋ ورتالىعى بەس جىلدان استام ۋاقىت جۇمىس ىستەپ كەلەدى. وندا 20-دان استام بالا اينالىسادى. جاقىندا ساباقتار وتەتىن عيماراتتان ايىرىلۋ قاۋپى تۋىندادى. ورتالىق يەلەرى عيماراتتى ساتىپ الماقشى بولعان. الايدا بانك ولارعا نەسيە بەرۋدەن باس تارتتى.
«بانكتەر بىزگە نەسيە بەرۋدەن باس تارتادى، ويتكەنى وتكەن جىلدارداعى تابىسىمىز وتە از بولدى. دارىگەرلەردىڭ سانيتارلىق تالاپتارى بويىنشا نىساندا بالالاردى قابىلداۋعا شەكتەۋلەر بولعاندىقتان، ءبىز ساباقتاردى جۇرگىزە المادىق»، - دەيدى دامۋ ورتالىعىنىڭ جەتەكشىسى ەلەنا راتاششۋك.
بۇل جاعداي تۋرالى بىلگەن سوڭ، ورتالىققا كەلگەن بالالاردىڭ اتا-انالارى دابىل قاعا باستاعان. ولار قالا بيلىگىنەن ءۇي-جاي ماسەلەسىن شەشۋدى وتىنۋدە. شاحتينسك قالاسىنىڭ ءبىلىم بەرۋ بولىمىندە بالالار كوشەدە قالمايدى، ولاردى مەملەكەتتىك بالاباقشالار قابىلدايدى دەپ سەندىردى. ەرەكشە قاجەتتىلىكتەرى بار بالالار ءۇشىن وندا 200-دەن استام ورىن بار. سونداي-اق، ءبىلىم ءبولىمى مەملەكەتتىك تاپسىرىس بويىنشا 75 بالاعا قاراجات بولۋگە دايىن ەكەندەرىن جەتكىزدى. الايدا ورتالىققا قويىلىپ وتىرعان مىندەتتى شارت – ساباقتاردى وتكىزۋ ءۇشىن عيماراتتىڭ بولۋى.
«كاسىپكەر ايىنا 4 ملن تەڭگەگە دەيىن الادى. تيىسىنشە، مەملەكەت وسى ءبىلىم بەرۋ ۇيىمىنا قاراجات ءبولۋ ءۇشىن ولاردىڭ ماتەريالدىق-تەحنيكالىق بازاسى قۇرىلۋى كەرەك دەگەن تالاپ قويادى. وڭىردە بوس عيماراتتار بار»، - دەيدى قالالىق ءبىلىم ءبولىمىنىڭ باسشىسى نيكولاي ونسوۆيچ.
”ادىرنا” ۇلتتىق پورتالى
