ەتنوفەستيۆالدىڭ ءبىرىنشى كۇنى – «تاعىلىم»; ەكىنشى كۇنى – «داستۇرلەر جاڭعىرىعى»; ءۇشىنشى كۇنى – «سالبۋرىن» اتاۋىمەن بەلگىلەنگەن. تاعى ءبىر ماڭىزدى شارا - 4–6 جەلتوقسان كۇندەرى اۋىل-ايماقتاردا سوعىمنىڭ ءداستۇرلى سىباعاسى تاراتىلىپ، ۇلكەن-كىشىگە قۇرمەت كورسەتىلۋىندە.
«تاعىلىم» كۇنىندە ءبىلىم بەرۋ ۇيىمدارىندا ۇلتتىق قۇندىلىقتاردى دارىپتەيتىن تانىمدىق ساباقتار مەن شەبەرلىك ساعاتتارى ءوتتى.
بۇگىن «سىباعا – 2025» ۇلتتىق داستۇرلەر فەستيۆالى سالتاناتتى تۇردە اقتوبەدەگى ونەر ورتالىعىنىڭ الدىندا «التىباقان» مادەني ويىن-ساۋىق باعدارلاماسىمەن باستالدى. ۇلتتىق ويىندار مەن ءداستۇرلى اۋەندەر توعىسقان، ۇلتتىق ناقىشقا تولى ساحنالىق كورىنىستەر فەستيۆالدىڭ باستالۋىنا ءسان بەرىپ، كەلگەن جۇرتشىلىقتى ونەر مەرەكەسىنىڭ رۋحىنا بولەدى.
ەتنوفەستيۆالدىڭ اشىلۋ سالتاناتىندا وبلىس اكىمى اسحات شاحاروۆ قۇتتىقتاۋ ءسوز سويلەپ، «سىباعا» ۇلتتىق داستۇرلەر فەستيۆالىنىڭ ايماقتا ەكىنشى جىل قاتارىنان وتكىزىلىپ وتىرعانىن اتاپ ءوتتى.
«مەملەكەت باسشىسى قاسىم-جومارت توقاەۆ ۇلتتىق قۇرىلتاي وتىرىسىندا «وتكەنىمەن عانا ءومىر سۇرەتىن جۇرت وركەنيەتتى ەل بولا المايدى. ۇلت ساپاسىن جاقسارتامىز دەسەك، ءبىر ەل بولىپ جاڭا قۇندىلىقتار جۇيەسىن قالىپتاستىرۋىمىز قاجەت» - دەپ اتاپ وتكەن بولاتىن. سالت-ءداستۇر – ادامزات ءۇشىن ىلگەرىلەۋدىڭ سارقىلماس قاينار كوزى. عىلىمي-تەحنيكالىق پروگرەسس قانشا دامىعانىمەن، قولدا بار جەتىستىكتەردىڭ ىرگەتاسىن قالاعان قۇندىلىقتاردان باس تارتۋعا بولمايتىندىعىن وسكەلەڭ ۇرپاققا جەتكىزۋ باستى مىندەت»، - دەدى ءوڭىر باسشىسى.
ايتىپ ءوتۋ كەرەك، اقتوبەدە ءوتىپ جاتقان حالىقارالىق ينۆەستيتسيالىق فورۋم اياسىندا 20 مەملەكەتتەن كەلگەن دەلەگاتسيا جانە 7 ەلشى شاراعا قاتىستى. اكىم قوناقتارعا ريزاشىلىعىن ءبىلدىرىپ، ۇلتتىق مادەنيەتتى دامىتۋعا اتسالىسىپ جۇرگەن شەبەرلەر مەن ونەرسۇيەر قاۋىمعا العىسىن جەتكىزدى.
ۇلتتىق بولمىسىمىزدى دارىپتەپ، اتا-بابادان ميراس بولعان رۋحاني قازىنانى زاماناۋي ۇلگىدە ناسيحاتتاۋعا باعىتتالعان ەتنوفەستيۆال اياسىندا «داستۇرلەر جاڭعىرىعى» اتتى ۇلكەن كونتسەرتتىك باعدارلاما ءوتتى.
باعدارلاما بارىسىندا كورەرمەندەرگە حالىق اندەرى، جىر-داستاندار، كۇيلەر، ۇلتتىق اسپاپتىق كومپوزيتسيالار، سونداي-اق وتاندىق ديزاينەرلەردىڭ ەتنوستيلدەگى توپتامالارى ۇسىنىلدى. ء«تاربيا»، مەيرامگۇل تاۋباتىروۆا، قىرعىزستان رەسپۋبليكاسىنان گۇلميرا اكماتوۆا، ءسابينا كۇنكەي، ماڭعىستاۋلىق جاننار مەڭدىقۇلوۆا، ينابات ەسكەندىر سىندى ديزاينەرلەردىڭ توپتامالارى ۇلتتىق كيىم مادەنيەتىنىڭ اسەم ورنەگىن پاش ەتتى.
كونتسەرتتىڭ شارىقتاۋ شەگى – قازاقستاننىڭ حالىق ءارتىسى تامارا اساردىڭ ورىنداۋىنداعى اسەم اندەر بولدى. كورەرمەن قاۋىم بەلگىلى ءانشىنىڭ ونەرىن زور ىقىلاسپەن قابىلدادى.
ال «سارقىت» مەيرامحاناسىندا ۇيىمداستىرىلعان «كونەدەن جەتكەن ءدام» گاسترو-فەستيۆالىندە وبلىستىڭ ءاربىر اۋدانى وزىنە ءتان ۇلتتىق تاعامدارىن ۇسىنىپ، ولاردىڭ شىعۋ تاريحى مەن سيمۆولدىق ءمانى تۋرالى اڭگىمەلەدى. قوناقتاردىڭ ەرەكشە نازارىن اۋدارعان تاعامداردىڭ ءبىرى — ۇلپەرشەك، ول داستۇردە اتا-انانىڭ قىزىنا دەگەن قامقورلىعى مەن مەيىرىمىن بىلدىرەدى.
فەستيۆال قاتىسۋشىسى نازيفا الدراپەكوۆا بۇل تاعامنىڭ بۇرىن جاس كەلىنشەك العاش رەت توركىنىنە كەلگەن كەزدە ارنايى دايىندالعانىن ايتتى.
«ۇزاتىلاتىن قىزعا دايىندالاتىن تاعامدى جاسادىم. بۇرىن تۇرمىسقا شىققان قىز بالا سۇيگەن سوڭ عانا اتا-اناسىنا قوناققا بارعان. سول كەزدە توركىنى وعان ارناپ ەرەكشە تاعام — ۇلپەرشەك ازىرلەگەن»، — دەدى ول.
قاتىسۋشىلار مەن قوناقتاردىڭ ايتۋىنشا، فەستيۆال ءدام مەرەكەسى عانا ەمەس، تەرەڭنەن تامىر تارتقان مادەني داستۇرلەردى قايتا تانىپ-بىلۋگە مۇمكىندىك بەرگەن شارا بولدى.
