قازاقستاندا 46 جالعان ديپلوم جانە ولاردى زاڭسىز دايىنداۋمەن اينالىسقان 20 ينتەرنەت-رەسۋرس انىقتالدى، دەپ حابارلايدى "ادىرنا".
عىلىم جانە جوعارى ءبىلىم مينيسترلىگىنىڭ اقپاراتىنشا، قۇزىرلى ورگاندار جالعان ديپلومداردى دايىنداۋ جانە ساتۋ فاكتىلەرىن تۇراقتى تۇردە باقىلاپ، توقتاتىپ وتىرادى. قىلمىستىق كودەكستىڭ 385-بابىنا سايكەس جالعان قۇجاتتاردى جاساۋ نەمەسە قولدانۋ ايىپپۇل سالۋعا، تۇزەۋ جۇمىستارىنا نەمەسە ەكى جىلعا دەيىن باس بوستاندىعىن شەكتەۋ نە ايىرۋعا اكەپ سوعادى.
«بۇگىنگى تاڭدا 46 جالعان ديپلوم جانە ولاردى زاڭسىز دايىنداۋمەن اينالىسقان 20 ينتەرنەت-رەسۋرس انىقتالدى. ماتەريالدار ءىىم مەن مام-عا جولداندى»، - دەلىنگەن حابارلامادا.
مينيسترلىك 1991 جىلدان بەرى بەرىلگەن ديپلومداردىڭ دەرەكتەر بازاسىن قۇرعان. ديپلومدار ارنايى مودۋل ارقىلى بىرەگەي نومىرلەر مەن QR-كودتار بەرۋ جولىمەن قالىپتاستىرىلادى. جۇيەگە قول جەتكىزۋ قۇقىعى وسى مودۋلدە تىركەلگەن، رەسمي تۇردە جاۋاپتى ۋنيۆەرسيتەت قىزمەتكەرلەرىنە عانا بەرىلەدى.
ديپلومداردى گەنەراتسيالاۋ «جوعارى ءبىلىم بەرۋدىڭ بىرىڭعاي پلاتفورماسى» اقپاراتتىق جۇيەسىندەگى ءبىلىم الۋشىلار تۋرالى دەرەكتەر نەگىزىندە جۇزەگە اسادى. ەگەر ءبىلىم الۋشى تۋرالى اقپارات پلاتفورمادا بولماسا، ديپلوم ءنومىرىن قالىپتاستىرۋ مۇمكىن ەمەس. وزىندىك ۇلگىدەگى ءبىلىم تۋرالى قۇجاتتاردا گەنەراتسيالانعان بىرەگەي ءنومىر مەن QR-كود بولماعان جاعدايدا مۇنداي قۇجاتتار جارامسىز دەپ تانىلادى، دەپ اتاپ ءوتتى ۆەدومستۆو.
سونىمەن قاتار جوعارى وقۋ ورىندارى دەرەكتەردى تسيفرلاندىرۋ جۇمىسىن جالعاستىرىپ جاتىر. ال جۇمىس بەرۋشىلەر ديپلومنىڭ تۇپنۇسقالىعىن https://epvo.kz سەرۆيسى ارقىلى تەكسەرە الادى. ديپلومنىڭ ەلەكتروندىق نۇسقاسى ەلەكتروندىق ۇكىمەتتىڭ («تسيفرلىق قۇجاتتار») ءموبيلدى قوسىمشاسىندا دا قولجەتىمدى.
