Qaraǵandy oblysy, Shahtınsk qalasynda múgedek balalardyń ata-analary dabyl qaǵýda. Balalar jattyǵatyn damý ortalyǵy ǵımaratsyz qalýy múmkin. Bul týraly “Adyrna” ulttyq portaly QazAqparat saıtyna silteme jasap habarlaıdy.
Kekesh, aýtızm jáne Daýn sındromy bar balalarǵa arnalǵan damý ortalyǵy bes jyldan astam ýaqyt jumys istep keledi. Onda 20-dan astam bala aınalysady. Jaqynda sabaqtar ótetin ǵımarattan aıyrylý qaýpi týyndady. Ortalyq ıeleri ǵımaratty satyp almaqshy bolǵan. Alaıda bank olarǵa nesıe berýden bas tartty.
«Bankter bizge nesıe berýden bas tartady, óıtkeni ótken jyldardaǵy tabysymyz óte az boldy. Dárigerlerdiń sanıtarlyq talaptary boıynsha nysanda balalardy qabyldaýǵa shekteýler bolǵandyqtan, biz sabaqtardy júrgize almadyq», - deıdi damý ortalyǵynyń jetekshisi Elena Rataýk.
Bul jaǵdaı týraly bilgen soń, ortalyqqa kelgen balalardyń ata-analary dabyl qaǵa bastaǵan. Olar qala bıliginen úı-jaı máselesin sheshýdi ótinýde. Shahtınsk qalasynyń bilim berý bóliminde balalar kóshede qalmaıdy, olardy memlekettik balabaqshalar qabyldaıdy dep sendirdi. Erekshe qajettilikteri bar balalar úshin onda 200-den astam oryn bar. Sondaı-aq, bilim bólimi memlekettik tapsyrys boıynsha 75 balaǵa qarajat bólýge daıyn ekenderin jetkizdi. Alaıda ortalyqqa qoıylyp otyrǵan mindetti shart – sabaqtardy ótkizý úshin ǵımarattyń bolýy.
«Kásipker aıyna 4 mln teńgege deıin alady. Tıisinshe, memleket osy bilim berý uıymyna qarajat bólý úshin olardyń materıaldyq-tehnıkalyq bazasy qurylýy kerek degen talap qoıady. Óńirde bos ǵımarattar bar», - deıdi Qalalyq bilim bóliminiń basshysy Nıkolaı Onsovıch.
”Adyrna” ulttyq portaly
