اقتوبەدەگى كەن ورنىندا تاعى اپات بولدى. سالدارىنان حرومتاۋ اۋدانىنداعى ءدوڭ كەن بايىتۋ كومبيناتىندا جۇمىسشى اۋىر جارالاندى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
ءدوڭ كەن بايىتۋ كومبيناتىنىڭ 28 جاستاعى جۇمىسشىسى جارالانىپ، اۋرۋحاناعا ءتۇستى. اقتوبە وبلىستىق ەڭبەك ينسپەكتسياسى باسقارماسى باسشىسىنىڭ ورىنباسارى تالعات يسكاريننىڭ حابارلاۋىنشا، تاۋ-كەن شەبەرى سۋ ناسوسىن تەكسەرگەن. سول كەزدە ناسوس بىرنەشە بولىككە ءبولىنىپ، جۇمىسشىنىڭ اياعى مەن قولىنا زاقىم كەلدى. ونى الدىمەن حرومتاۋ اۋداندىق اۋرۋحاناسىنا جەتكىزگەنىمەن، كەيىن وبلىستىق جەدەل مەديتسينالىق جاردەم اۋرۋحاناسىنا تاسىمالداندى. ەمدەۋ ورنىندا وتا جاسالدى.
«اياعى سىنىپ، جىلىنشىگىنە زاقىم كەلگەن. اشىق جاراسى بار. قولىنىڭ ساۋساقتارى دا سىنعان. جاعدايى ورتاشا اۋىر. قازىرگى كەزدە تراۆماتولوگيا بولىمىندە ەم قابىلداپ جاتىر»، - دەپ حابارلادى وبلىستىق دەنساۋلىق ساقتاۋ باسقارماسى.
