قالا شەتىندەگى شاعىناۋدانداردى دامىتۋ بويىنشا كوشپەلى جيىن جالعاسىن تابۋدا. بۇل جولى قالا اكىمى مۇرات ايتەنوۆتىڭ «تۇران» شاعىناۋدانىنا اتباسىن بۇردى. جيىندا شاعىناۋداندى كوگالداندىرۋ، تۇرعىن ءۇيدى پايدالانۋعا بەرۋ جانە جول قۇرىلىسى ماسەلەرى تالقىلاندى.
ءوز ءسوزىن، قالا حالقىنىڭ لايىقتى ءومىر سۇرۋىنە جاعداي جاساۋ قاجەتتىلىگىنەن باستاعان شاھار باسشىسى مۇرات ايتەنوۆ ەڭ الدىمەن ينفراقۇرىلىممەن قامتاماسىز ەتۋ ءىسىن جۇيەلەندىرۋدى قولعا الۋدى اتاپ ءوتتى. سونداي-اق، ساپالى تۇرعىن ءۇي سالۋ، سونىمەن بىرگە گاز، اۋىز سۋ، ساپالى ەلەكتر جارىعى، جول مەن اباتتاندىرۋ جانە كوگالداندىرۋ ماسەلەلەرىن رەتكە كەلتىرۋىمىز كەرەك، دەدى.
كوشپەلى جيىندا «تۇران» شاعىناۋدانىنىڭ دامۋ جوسپارىنا سايكەس، 14 وراممەن - 24 ورام ارالىعىنداعى تۇرعىن ءۇي جانە الەۋمەتتىك نىساندار، ساياباقتار قۇرىلىسى، سونىمەن قاتار، 25 ورام مەن 29 ورامداردىڭ ارالىعىنداعى ينجەنەرلىك جۇيەلەردىڭ قۇرىلىس جۇمىستارى مەن جول ماسەلەسىنىڭ بارىسى پىسىقتالدى. بۇگىندە شاعىناۋداننىڭ 13 كوشەسىندە قۇرىلىس جۇمىستارى جۇرگىزىلۋدە. جوباعا سايكەس، جاياۋ جۇرگىنشىلەرگە ارنالعان اياقجول، ۆەلوجول جانە اۆتوموبيل جولداردىڭ سىزبالارى ەنگىزىلگەن. №1,2,6,7,8,10 كوشەلەردىڭ قۇرىلىس جۇمىستارىن جىل سوڭىنا دەيىن اياقتاۋ جوسپارلانسا، 3,4,5,9,11,12,13 كوشەلەردىڭ قۇرىلىس جۇمىستارى 2022 جىلعا وتپەلى. سونداي-اق، شاعىناۋداندى مەكتەپكە باراتىن جولمەن قامتاماسىز ەتۋ بويىنشا جالپى ۇزىندىعى 908 م، ەنى 6 م جولعا 2 قاباتتى اسفالت توسەۋ جوبالانعان.
كەزەكتى كوشپەلى جيىندى قورىتىندىلاعان قالا اكىمى مۇرات ايتەنوۆ سالالىق باسقارمالارعا قۇرىلىس جۇمىستارىنىڭ كەستەگە ساي ءوز ۋاقىتىندا ساپالى اتقارىلۋىن قاداپ تۇرىپ تاپسىردى. سونداي-اق، ءاربىر مەردىگەر مەكەمەگە قۇرىلىس جۇمىستارىنىڭ بارىسىندا قاۋىپسىزدىك شارالارىنا مۇقيات بولۋ جاعى قايتا-قايتا ەسكەرتىلدى.
گ. اسقارقىزى
