قالا ورتالىعىنداعى ءال-فارابي الاڭى مەرەكەلىك گاسترونوميالىق كەڭىستىككە اينالىپ، تۇرعىندار مەن قوناقتارعا ەرەكشە مادەني ءارى دامدىك اتموسفەرا سىيلاۋدا.
فەستيۆالدىڭ باستى ماقساتى – ۇلتتىق جانە الەمدىك اسحانانىڭ ۇزدىك ۇلگىلەرىن كەڭىنەن تانىستىرۋ. كەلۋشىلەر قازاقتىڭ ءداستۇرلى تاعامدارىنان باستاپ، ەۋروپالىق جانە ازيالىق اسحانانىڭ ءتۇرلى ءدامىن تاتىپ، كوپۇلتتى مادەنيەتتىڭ ەرەكشەلىكتەرىمەن تانىسۋدا. الاڭدا ناۋرىز مەيرامىنىڭ باستى تاعامى – ناۋرىز كوجەنىڭ بىرنەشە ءتۇرى ۇسىنىلۋدا.
ءىس-شاراعا قازاقستاننان جانە شەتەلدەردەن كەلگەن حالىقارالىق دەڭگەيدەگى 10 اسپاز قاتىسۋدا. ولار اۆتورلىق تاعامدارىن ۇسىنىپ، اسپازدىق شەبەرلىكتەرىن كورسەتۋدە. اتاپ ايتقاندا، بەلگيالىق اسپاز جان اشنەر «ميدي پو-بەلگيسكي» تاعامىن، شۆەيتساريالىق توماس ميۋللەر ىرىمشىك نەگىزىندەگى فيرمالىق اسىن ۇسىنۋدا. سونىمەن قاتار، رەسەيلىك ەۆگەني چەكانين، ازەربايجاندىق ەميل اليەۆ، فرانتسيالىق نيكوليا لەزيور، تۇركيالىق ابباس يشيك، گرۋزيالىق يوسەبي دجاباناشۆيلي، قىرعىزستاندىق بەريك ەگينباەۆ، وزبەكستاندىق احماد حامداموۆ جانە سەربيالىق دانيەلا پانتيچ ءوز تاعامدارىن كوپشىلىك نازارىنا ۇسىنۋدا.
فەستيۆال اياسىندا بىرنەشە نوميناتسيا بويىنشا گاسترونوميالىق بايقاۋلار ۇيىمداستىرىلعان. قاتىسۋشىلار «ۇزدىك كاۋاپ»، «ۇزدىك پالاۋ»، «ۇزدىك سامسا» جانە «ۇزدىك ۇلتتىق تاعام» اتالىمدارى بويىنشا باق سىناۋدا.
سونىمەن قاتار، فەستيۆالگە شامامەن 50-گە جۋىق جەرگىلىكتى مەيرامحانا قاتىسىپ، كەلۋشىلەرگە سان ءتۇرلى تاعامدار ۇسىنۋدا. ولاردىڭ قاتارىندا Grand Praga, BOZJYRA, Calista, Barvilla, Mimino, Mozzarella by Meyram Group, Afsona, كوكساراي، Dushevnaya Kukhnya, STEAKFIELD, مادلەن، Istanbul, Kamshat, Kausar جانە Jeti Tandir بار.
فەستيۆال تەك گاسترونوميالىق باعىتپەن شەكتەلمەي، كەڭ اۋقىمدى مادەني-ويىن-ساۋىق باعدارلاماسىمەن تولىقتىرىلعان. كەلۋشىلەر ءۇشىن street style جانە K-pop باعىتتارىنداعى بي سايىستارى، دومبىراشىلار ءانسامبلىنىڭ ونەرى، باتىرلار شوۋى، تسيرك قويىلىمدارى، موتوشەرۋ مەن اۆتوكولىكتەر كورمەسى ۇيىمداستىرىلۋدا.
ءىس-شارا بىرنەشە تاقىرىپتىق ايماققا بولىنگەن. ەتنوايماقتا حالىقارالىق اسپازداردىڭ شەبەرلىك ساباقتارى مەن ۇلتتىق تاعامدار بايقاۋى وتسە، ەۋروپالىق ايماقتا زاماناۋي شوۋ-باعدارلامالار ۇسىنىلۋدا. ال اربات ايماعىندا قولونەرشىلەر جارمەڭكەسى ۇيىمداستىرىلىپ، ۇلتتىق بۇيىمدار كوپشىلىك نازارىنا ۇسىنىلعان.
فەستيۆالدىڭ رەسمي اشىلۋى سالتاناتتى تۇردە ءوتىپ، كەشكى ۋاقىتتا جەڭىمپازداردى ماراپاتتاۋ ءراسىمى مەن كونتسەرتتىك باعدارلاما جوسپارلانعان.
«DamDastour» حالىقارالىق گاسترونوميالىق فەستيۆالى – تەك تاعام مەرەكەسى عانا ەمەس، حالىقتار مادەنيەتى مەن ءداستۇرىن توعىستىراتىن، ناۋرىزدىڭ شىنايى رۋحىن ايشىقتايتىن جانە قوعامدى بىرىكتىرەتىن اۋقىمدى مادەني الاڭعا اينالىپ وتىر.
