بۇگىن شىمكەنت قالاسى اكىمدىگىندە جۇمىسشى ماماندىق يەلەرىن ماراپاتتاۋعا ارنالعان سالتاناتتى جيىن ءوتتى. ءىس-شاراعا قالا اكىمى عابيت ءابدىماجيتۇلى سىزدىقبەكوۆ قاتىسىپ، شاھاردىڭ دامۋىنا ەلەۋلى ۇلەس قوسىپ جۇرگەن ءتۇرلى سالا وكىلدەرىنە العىس ءبىلدىردى.
كۇندەلىكتى كوزگە كوپ كورىنە بەرمەگەنىمەن، قالانىڭ تىنىس-تىرشىلىگىنە تىكەلەي ىقپال ەتەتىن جۇمىسشى ماماندىق يەلەرىنىڭ ەڭبەگى وراسان. قالا تازالىعى، كوركەيتۋ-كوگالداندىرۋ، كوممۋنالدىق قىزمەت، جول، جارىق جانە اباتتاندىرۋ سالالارىندا تاباندى ەڭبەك ەتىپ جۇرگەن ازاماتتار قالا اكىمىنىڭ ارنايى قابىلداۋىندا بولدى.
كەزدەسۋ بارىسىندا قالا باسشىسى ءاربىر ەڭبەك ادامىمەن جەكە سۇحباتتاسىپ، ولاردىڭ ۇسىنىس-پىكىرلەرىن تىڭدادى. ەركىن فورماتتا وتكەن جيىندا جۇمىسشىلاردىڭ كۇندەلىكتى قىزمەتى، سالاداعى وزەكتى ماسەلەلەر مەن الداعى جوسپارلار تالقىلاندى.
— قالانىڭ كوركەيۋى مەن تۇرعىنداردىڭ جايلى ءومىر ءسۇرۋى – سىزدەردىڭ ماڭداي تەرلەرىڭىزدىڭ جەمىسى. سىزدەر اتقارىپ جۇرگەن ەڭبەك قاشاندا قۇرمەتكە لايىق. جۇمىسشى ماماندىقتارى تەك ءبىر جىل اياسىندا عانا ەمەس، ءاردايىم قوعامنىڭ باستى تىرەگى بولىپ قالا بەرەدى، – دەدى قالا اكىمى.
سونداي-اق عابيت سىزدىقبەكوۆ ەڭبەك ادامدارىن الداعى جاڭا جىل مەرەكەسىمەن قۇتتىقتاپ، زور دەنساۋلىق، وتباسىلارىنا اماندىق، ەڭبەكتەرىنە تولاعاي تابىس تىلەدى.
جيىن سوڭىندا ماراپات يەلەرى كورسەتىلگەن قۇرمەتكە ريزاشىلىقتارىن ءبىلدىرىپ، ەل يگىلىگى جولىنداعى ەڭبەكتەرىن ودان ءارى جالعاستىرا بەرەتىندەرىن اتاپ ءوتتى.
ەڭبەك ادامىن ۇلىقتاۋ – قوعامنىڭ تۇراقتى دامۋى مەن وركەندەۋىنىڭ كەپىلى. وسىنداي تاعىلىمدى كەزدەسۋلەر جۇمىسشى ماماندىقتارىنىڭ بەدەلىن ارتتىرىپ، ولاردىڭ قوعامداعى ماڭىزىن ايقىنداي تۇسەتىنى ءسوزسىز.
