بادام وزەنىنىڭ جاعالاۋىنداعى جاعداي تۇراقتى. ەشقانداي تاسقىن قاۋپى جوق. بۇل تۋرالى شىمكەنت قالاسى اكىمدىگىنىڭ ءباسپاسوز قىزمەتى مالىمدەدى، دەپ حابارلايدى "ادىرنا".
كوكتەم مەزگىلىندە سۋ دەڭگەيى ءجيى كوتەرىلەتىن وزەننىڭ تاسقىن قاۋپىن ازايتۋ ءۇشىن وتكەن جىلى 5,3 شاقىرىم جاعالاۋ بەكىتىلىپ، جەلتوقسان ايىندا تولىق اياقتالعان بولاتىن. بۇل جۇمىسقا 2,7 ميلليارد تەڭگە تەڭگە بولىنگەن.
قالالىق جايلى ورتانى دامىتۋ باسقارماسىنىڭ مالىمەتىنشە، يگىلىك، جاڭاتالاپ جانە كوكبۇلاق ەلدى مەكەندەرىنىڭ تۇسىندا وزەن ارناسى رەتتەلىپ، جاعالاۋى بەتوندالعان. الايدا بەلگىسىز تۇلعالار وزەن ارناسىنان زاڭسىز تاس قازىپ الىپ، گيدروتەحنيكالىق قۇرىلىسقا زيان كەلتىرگەن.
"زاڭسىز ارەكەتتەر سالدارىنان بەتون بوگەتتىڭ شامامەن 40 مەترى ءبۇلىندى. قازىر قۇقىق قورعاۋ ورگاندارى كىنالىلەردى انىقتاۋ جۇمىستارىن جۇرگىزىپ جاتىر، — دەدى باسقارما باسشىسى ابىلقايىر وڭعار.
مامانداردىڭ ايتۋىنشا، زاقىمدانعان بولىگى مەردىگەر كومپانيا ەسەبىنەن قالپىنا كەلتىرىلەدى. جوبانىڭ كەپىلدىك مەرزىمى 7 جىلدى قۇرايدى.
