ەندى كوللەدج ستۋدەنتتەرى تەگىن وقيدى

2590

كوللەدجدەردە 9-سىنىپ نەگىزىندە وقۋ 2024 جىلعا قاراي تولىعىمەن تەگىن بولادى. بۇل تۋرالى پرەمەر-ءمينيستردىڭ ورىنباسارى ەرالى توعجانوۆ مالىمدەدى، دەپ حابارلايدى "ادىرنا" ۇلتتىق پورتالى.

- كوللەدجدەردە وقۋعا نيەت بىلدىرگەن 9-سىنىپ تۇلەكتەرىن 100% تەگىن وقۋمەن قامتۋ جوسپارلانىپ وتىر. جىل سايىن 9-سىنىپتان كەيىن 30 مىڭ بالا كوللەدجدەردە اقىلى نەگىزدە وقۋدا. ولاردىڭ ءبىرازى قارجىلىق قيىندىقتارىنا بايلانىستى كوللەدجدەردى بىتىرمەستەن وقۋىن تاستاپ كەتەتىن جاعدايلار دا جوق ەمەس. سوندىقتان جاستاردىڭ، اسىرەسە، از قامتىلعان وتباسى بالالارىن قولداۋ ماقساتىندا وقۋعا نيەت بىلدىرگەن بارلىق 9-سىنىپ تۇلەكتەرىنە كوللەدجدە تەگىن ءبىلىم الۋعا مۇمكىندىك جاسالادى، – دەدى ەرالى توعجانوۆ.

سونداي-اق، پرەمەر-ءمينيستردىڭ ورىنباسارى حالىقارالىق وليمپيادا جەڭىمپازدارى مەن جۇلدەگەرلەرىنە جوو-عا كونكۋرسسىز گرانتتار بەرىلەتىن ايتتى.

- بۇل شەشىم تالانتتى جاستاردى جالپى قولداۋعا باعىتتالعان، تۇلەكتەردىڭ ەلىمىزدە تەگىن جوعارى ءبىلىم الۋىنا جول اشادى. سونداي-اق، حالىقارالىق وليمپيادالاردىڭ جەڭىمپازدارىنا، ولاردىڭ پەداگوگتەرى مەن تالىمگەرلەرىنە ءبىر جىلعا اقشالاي سىيلىق تاعايىندالادى، – دەپ قوستى ەرالى توعجانوۆ.

ەسكە سالساق، 11 ناۋرىزدا قر پرەمەر-ءمينيسترى اسقار مامين بارلىق جاستار العاشقى ماماندىعىن تەگىن الۋى ءۇشىن كوللەدجدەردە كادرلار دايارلاۋعا مەملەكەتتىك تاپسىرىستى 2021 جىلى 20 مىڭ ورىنعا ۇلعايتۋدى تاپسىردى. 16 ناۋرىزدا قر ءبىلىم جانە عىلىم ءمينيسترىنىڭ ورىنباسارى بيبىگۇل اسىلوۆا توعىزىنشى سىنىپ تۇلەكتەرىنە ەندى كوللەدجگە ءتۇسۋ ەمتيحاندارىن تاپسىرۋدىڭ قاجەتى جوق ەكەنىن ايتتى. بۇدان باسقا، بعم-دە "ستۋدەنتكە اقشا" قاعيداتى بويىنشا مەملەكەتتىك تاپسىرىستى ورنالاستىرۋدىڭ جاڭا مەحانيزمىن ازىرلەنگەن بولاتىن.

"ادىرنا" ۇلتتىق پورتالى

 

پىكىرلەر
ۇقساس جاڭالىقتار