فوتو: وزبەكستان پرەزيدەنتىنىڭ ءباسپاسوز قىزمەتى
وزبەكستاندا مەكتەپكە دەيىنگى جانە مەكتەپتىك ءبىلىم مينيسترلىگى مەن جوعارى ءبىلىم، عىلىم جانە يننوۆاتسيالار مينيسترلىگى بىرىكتىرىلدى. وزبەكستان پرەزيدەنتى شاۆكات ميرزيوەۆتىڭ جارلىعىمەن ەكى ۆەدومستۆونىڭ نەگىزىندە ءبىلىم جانە عىلىم مينيسترلىگى قۇرىلدى. بۇل تۋرالى مەملەكەت باسشىسىنىڭ ءباسپاسوز قىزمەتى حابارلادى، دەپ جازادى "ادىرنا".
رەفورمانىڭ نەگىزگى ماقساتى – زاماناۋي تالاپتارعا ساي ەلدەگى ءبىلىم بەرۋ، تاربيە جانە عىلىم سالالارىن بىرىڭعاي جۇيەگە بىرىكتىرۋ. سونداي-اق ءبىلىم ساپاسى مەن تيىمدىلىگىن ارتتىرۋ، ادامي كاپيتالدى دامىتۋ باعىتىنداعى جۇمىستاردى جاڭا دەڭگەيگە كوتەرۋ كوزدەلىپ وتىر.
جاڭا جۇيە ءبىلىم بەرۋدىڭ بارلىق دەڭگەيىن – مەكتەپكە دەيىنگى بىلىمنەن باستاپ جوعارى بىلىمگە دەيىن، سونداي-اق عىلىمي قىزمەتتى قامتيدى.
پرەزيدەنت اكىمشىلىگىنىڭ مالىمەتىنشە، ءبىلىم بەرۋدىڭ بارلىق تۇرلەرى اراسىندا ءوزارا ىقپالداستىق پەن ساباقتاستىقتى قامتاماسىز ەتۋ جوسپارلانعان. سونىمەن قاتار بارلىق ءبىلىم بەرۋ ساتىلارى مەن عىلىمي قىزمەتتى قامتيتىن بىرىڭعاي ءارى ءتيىمدى باسقارۋ جۇيەسى ەنگىزىلەدى.
رەفورمانىڭ تاعى ءبىر ماقساتى – ءبىلىم بەرۋ جۇيەسىنىڭ قوعام الدىنداعى ەسەپتىلىگىن ارتتىرۋ.
