كازتالوۆ اۋدانىندا مەملەكەت باسشىسى قاسىم-جومارت كەمەلۇلى توقاەۆتىڭ اپاتتى مەكتەپتەردىڭ ورنىنا جاڭا ءبىلىم وشاقتارىن سالۋ جونىندەگى تاپسىرماسىنا سايكەس، «قاراشىعاناق پەتروليۋم وپەرەيتينگ ب.ۆ.» كومپانياسىنىڭ الەۋمەتتىك جاۋاپكەرشىلىك اياسىندا جۇزەگە اسقان 60 ورىندىق جاڭا مەكتەپ پايدالانۋعا بەرىلدى. جاڭا ءبىلىم ورداسىنىڭ اشىلۋ سالتاناتىنا باتىس قازاقستان وبلىسى اكىمىنىڭ ورىنباسارى قايىرجان مەڭدىعاليەۆ، «قاراشىعاناق پەترولەۋم وپەرەيتينگ ب.ۆ.» باس ديرەكتورىنىڭ ورىنباسارى مۇحتار مانكەەۆ، وبلىستىق ءبىلىم باسقارماسىنىڭ باسشىسى ەلدوس سافۋللين، اۋدان اكىمى اسلانبەك سارقۇلوۆ، اۋداندىق ءماسليحات توراعاسى سارسەنباي مولداشەۆ قاتىستى.
قونىس اۋىلىندا العاشقى مەكتەپتىڭ ىرگەتاسى 1948 جىلى سالىنعان. العاشىندا ۆ.ي.لەنين اتىنداعى جەتى جىلدىق مەكتەپ رەتىندە اشىلعان ءبىلىم ورداسى، 1957-1958 جىلدارى «سترويتەل» جەتى جىلدىق مەكتەبى بولىپ، كەيىن 1976 جىلى كرۋپسكايا اتىنداعى 8 جىلدىق مەكتەپ بولىپ وزگەرىپ، جاڭا مەكتەپ عيماراتى بوي كوتەرگەن. 1979-1980 وقۋ جىلىندا ورتا مەكتەپ بولىپ قايتا قۇرىلىپ، العاشقى ورتا مەكتەپ تۇلەكتەرى 1980 جىلى ءبىتىردى.
ال «AMANAT» پارتياسىنىڭ سايلاۋالدى باعدارلاماسىنا ەنگەن، «قاراشىعاناق پەترولەۋم وپەرەيتينگ ب.ۆ.» كومپانياسىنىڭ تاپسىرىسىمەن سالىنعان نىساننىڭ قۇرىلىسىن «Smartech» جشس جۇرگىزدى. زامان تالابىنا ساي جابدىقتالعان ءبىلىم ورداسىندا 11 وقۋ كابينەتى، سپورت زالى، اسحانا، كىتاپحانا، ءماجىلىس زالى قاراستىرىلعان.
وبلىس اكىمىنىڭ ورىنباسارى قايىرجان مەڭدىعاليەۆ جاڭا مەكتەپتىڭ اشىلۋىمەن قۇتتىقتاپ، مەملەكەتتىك ساياساتتىڭ جۇزەگە اسىرىلىپ جاتقانىن جەتكىزدى.
- بۇگىن بارشامىز ءۇشىن ەرەكشە قۋانىشتى ءسات! كونستيتۋتسيانىڭ 30 جىلدىعىنا وراي جانە جاڭا وقۋ جىلىنىڭ قارساڭىندا «قاراشىعاناق پەتروليۋم وپەرەيتينگ ب.ۆ.» كومپانياسىنىڭ الەۋمەتتىك جاۋاپكەرشىلىگى اياسىندا جۇزەگە اسقان 60 ورىندىق جاڭا مەكتەپتىڭ اشىلۋ سالتاناتىنا جينالىپ وتىرمىز. پرەزيدەنتىمىز بيىلعى تامىز كونفەرەنتسياسىندا «بۇگىن سانالى ۇرپاق تاربيەلەي الساق، ەرتەڭ زامان كوشىنىڭ باسىندا جۇرەمىز. سوندىقتان وسى سالانى قولداۋ مەملەكەتتىك ساياساتتىڭ نەگىزگى باسىمدىعى بولىپ قالا بەرەدى...» دەگەن بولاتىن. بۇل ءبىلىم ورداسىنىڭ بوي كوتەرۋى — مەملەكەت پەن بيزنەستىڭ، جەرگىلىكتى بيلىك پەن حالىقتىڭ بىرلەسكەن ەڭبەگىنىڭ جارقىن كورىنىسى. «قاراشىعاناق پەتروليۋم وپەرەيتينگ ب.ۆ.» كومپانياسى ءوڭىرىمىزدىڭ الەۋمەتتىك دامۋىنا بەلسەندى ۇلەس قوسىپ كەلەدى، - دەدى وبلىس اكىمىنىڭ ورىنباسارى.
قايىرجان ەرمەكۇلى ءوز سوزىندە كازتالوۆ اۋدانىندا سوڭعى 3 جىلدا اتقارىلعان جۇمىستارعا توقتالدى.
— مەكتەپتەردىڭ اپاتتىلىعىن، ۇشاۋىسىمدىلىق ماسەلەسىن شەشۋ ماقساتىندا سوڭعى ءۇش جىلدا وبلىسىمىزدا 7526 ورىنعا 26 مەكتەپ سالىندى، سونىڭ ىشىندە كپو ب.ۆ. كومپانياسىنىڭ الەۋمەتتىك ينۆەستيتسيالىق جوباسى اياسىندا 1344 ورىنعا 16 مەكتەپ، جەرگىلىكتى بيۋدجەت ەسەبىنەن 1982 ورىنعا 7 مەكتەپ، «كەلەشەك مەكتەپتەرى» ۇلتتىق جوباسى اياسىندا 4200 ورىنعا 3 مەكتەپ پايدالانۋعا بەرىلدى. 2023 جىلى كازتالوۆ اۋىلىندا الما ورازباەۆا اتىنداعى 600 ورىندىق مەكتەپ، جۇلدىز اۋىلىندا ا.حۇسايىنوۆ اتىنداعى 108 ورىندىق مەكتەپ، بوستاندىق جانە قاراوبا اۋىلدارىندا دارىگەرلىك امبۋلاتوريالار، سونداي-اق قاراوزەن اۋىلىندا فەلدشەرلىك-اكۋشەرلىك پۋنكت ىسكە قوسىلدى. ال 2024 جىلى سارالجىن اۋىلىندا 60 ورىندىق مەكتەپ، قايشاقۇدىق اۋىلىندا ءمودۋلدى مەديتسينالىق پۋنكت، قايىڭدى اۋىلىندا جاڭا مادەنيەت ءۇيى، كازتالوۆ اۋىلىندا 320 ورىندىق زاماناۋي سپورت كەشەنى پايدالانۋعا بەرىلدى. 2025 جىلى 4 باعىت بويىنشا 20 الەۋمەتتىك نىسانعا گاز كىرگىزىلدى، «قالادان-اۋىلعا» باعدارلاماسى بويىنشا جالپاقتال، قاراوزەن، ورازعالي اۋىلدارىنا كوشىپ كەلگەن 8 وتباسىعا پاتەر كىلتى تابىستالدى. سەكسەنباەۆ، بوزوبا، بەيستەرەك، حايرۋش اۋىلدارىنا اۋىز سۋعا ارنالعان بلوك-مودۋلدى كەشەن ورناتىلدى. بۇل نىساندار - اۋدان تۇرعىندارىنىڭ الەۋمەتتىك جاعدايىن جاقسارتۋعا، ساپالى ءبىلىم، دەنساۋلىق ساقتاۋ جانە مادەني-سپورتتىق ينفراقۇرىلىمدى دامىتۋعا باعىتتالعان مەملەكەتتىك ساياساتتىڭ جەمىستى ناتيجەسى، — دەدى ول.
ءبىلىم ورداسىنىڭ اشىلۋ سالتاناتىندا جاڭا مەكتەپكە وبلىس اكىمىنىڭ اتىنان LED ەكران تابىستالدى. سونىمەن قاتار «قاراشىعاناق پەترولەۋم وپەرەيتينگ ب.ۆ.» باس ديرەكتورىنىڭ ورىنباسارى مۇحتار مانكەەۆ ءسوز الىپ جىلى لەبىزىن بىلدىرسە، اۋدان اكىمى اسلانبەك سارقۇلوۆ مەردىگەر «Smartech» جشس ديرەكتورى جانىبەك بايعاتوۆقا مەكتەپ قۇرىلىسىن ساپالى جۇرگىزىپ، ۋاقىتىلى اياقتاعانى ءۇشىن العىس حات تابىس ەتتى. مەكتەپ وقۋشىلارى مەن ۇستازدار مەكتەپ تاريحىن بايانداپ، جەتىستىكتەرىن اتاپ ءوتتى.
جاڭا مەكتەپتىڭ اشىلعانى قونىستىقتاردىڭ دا مەرەيىن اسىرىپ، تۇرعىندار قۋانىشىمەن ءبولىستى.
— جاڭا مەكتەپتىڭ سالىنعانى ءبىز ءۇشىن ۇلكەن قۋانىش، زور جەتىستىك بولدى. بۇل – بولاشاق ۇرپاققا جاسالعان ەڭ ۇلكەن قامقورلىقتىڭ، ەل ەرتەڭىنە دەگەن ايرىقشا جاناشىرلىقتىڭ ايقىن كورىنىسى. جاڭا شاڭىراقتان ءتالىم الىپ شىعاتىن شاكىرتتەردىڭ كوكىرەگىن ءبىلىم نۇرى ساۋلەلەندىرىپ، بولاشاقتا ەل يگىلىگىنە قىزمەت ەتەتىنىنە سەنىم مول. وسىنداي يگىلىكتى ءىستى جۇزەگە اسىرعان مەملەكەت باسشىسىنا، وبلىس پەن اۋدان باسشىلىعىنا قونىستىقتار اتىنان العىسىمىز شەكسىز. حالىقتىڭ قۋانىشىن ءبولىسىپ، قۋات بەرگەن بۇل كۇن تاريحىمىزدىڭ جارقىن بەتتەرىنىڭ ءبىرى بولىپ جازىلارى انىق، — دەدى ارداگەر ۇستاز جاۋھار ساپارعاليەۆا.
قونىس اۋىلىنداعى جاڭا مەكتەپتىڭ اشىلۋى – ەلدىڭ بولاشاعىنا باعىتتالعان ستراتەگيالىق قادام، ۇرپاققا جاسالعان زور قامقورلىق. بۇل – اۋىلدىڭ جاڭا تىنىسى، ءبىلىم كوكجيەگىن كەڭەيتكەن قۋانىش. ەندى قونىس اۋىلىنىڭ شاكىرتتەرى زاماناۋي مەكتەپتە ءبىلىم الىپ، ءوز الەۋەتىن تولىق جۇزەگە اسىرۋعا مۇمكىندىك الادى. «جاڭا مەكتەپ – جاڭا سەرپىن، جاڭا مۇمكىندىك» دەگەن سەنىممەن، اۋىل بولاشاعىنىڭ نۇرلى بولارىنا ءۇمىت مول.
