اقبەرەن ەلگەزەك اياگۇلدىڭ جۇمباق ولىمىنە قاتىستى ايىپتاۋلارعا جاۋاپ بەردى

5645
Adyrna.kz Telegram

قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى اقبەرەن ەلگەزەك قالامگەر اياگۇل مانتايدىڭ جۇمباق ولىمىنە قاتىستى جازۋشىلار وداعىنا كىنا تاققاندارعا جاۋاپ بەردى، دەپ حابارلايدى "ادىرنا" ۇلتتىق پورتالىنىڭ ءتىلشىسى. بۇل تۋرالى اقىن ءوزىنىڭ Facebook پاراقشاسىندا جازدى. 

ءبىرىنشى ايىپ: جازۋشىلار وداعى اياگۇلدىڭ قازاسىنا كوڭىل ايتۋعا جارامادى!

- جاۋاپ: اياگۇل قايتىس بولعاندا جازۋشىلار وداعىنا قاراستى سول اپتاداعى «قازاق ادەبيەتى» گازەتى كوڭىل ايتۋ بەرگەن. ودان بولەك ءوزىم قۇرىپ، جۇرگىزىپ وتىرعان «ۇلت» پورتالىنىڭ اتىنان دا كوڭىل ايتۋ بەرىلدى. مەنىڭ ءوتىنىشىم بويىنشا جازۋشىلار وداعىنىڭ بەلدى قىزمەتكەرى قايىرنيسا اپاي اياگۇلدىڭ سىڭلىسىنە حابارلاسىپ، بىزدەن قانداي كومەك دەپ سۇراعاندا، ەشتەڭە قاجەت ەمەس دەگەن جاۋاپ الدى. ءبىز قولىمىزدان كەلگەنشە اقشا قۇراپ (وداقتىڭ ەسەبىنەن ەمەس) تۋعان-تۋىسىنا ازعانتاي بولسا دا كومەك كورسەتپەك نيەتتە ەدىك. الايدا، جاۋاپ الگىندەي بولدى.

ەكىنشى ايىپ: اياگۇلگە جازۋشىلار وداعى كومەكتەسپەدى، جۇمىسقا المادى، الەۋمەتتىك جاعدايىنا بەي-جاي قارادى!

- جاۋاپ: بىرىنشىدەن، اياگۇل جازۋشىلار وداعىنا، ونىڭ توراعاسى ۇلىقبەك ەسداۋلەت اعامىزعا نەمەسە ماعان تىكەلەي شىعىپ، «جاعدايىم قيىن، ماعان كومەكتەسىڭىزدەر» دەپ ءوتىنىش جاساماعان ەدى. ەكىنشىدەن، وداق مۇشەلەرىنىڭ وزىنە ءبىزدىڭ ۇيىم تىكەلەي ماتەريالدىق-قارجىلىق كومەك بەرە المايدى. سەبەبى تۇسىنىكتى شىعار. جازۋشىلار وداعى ءوز كۇشىمەن قالت-قۇلت ەتىپ، جۇمىس ىستەپ كەلە جاتقان كوپ ۇكىمەتتىك ەمەس ۇيىمداردىڭ ءبىرى عانا. تاريحي اتاعى زور بولعانمەن، قازىرگى جاعدايى ونداي ءماز ەمەس. پاندەميا كەزىندە ءتىپتى تيتىقتاپ قالدىق. قانشاما قىزمەتكەرىمىزدى اقىسىز دەمالىسقا جىبەرۋگە ءماجبۇر بولدىق. ولاردىڭ كوبى ءالى كۇنگە دەيىن جۇمىسسىز ۇيىندە وتىر. قر اقپارات جانە قوعامدىق دامۋ مينيسترلىگىنىڭ قولداۋىنىڭ ارقاسىندا عانا گازەت-جۋرنالدارىمىز («قازاق ادەبيەتى» گازەتى، «جۇلدىز» جانە «پروستور» جۋرنالدارى) ۇزدىكسىز شىعىپ كەلەدى. سوندىقتان، ءار قالامگەرگە اقشا ۇلەستىرىپ يا باسقاشا كومەك بەرۋگە بازبىرەۋلەر ويلاعانداي بىزدە ونداي قاۋقار جوق. ەسەسىنە، الماتى قالاسىنىڭ، اقتوبە وبلىسىنىڭ اكىمدىكتەرىنە شىعىپ، وسىناۋ قيىن شاقتا جازۋشىلار وداعىنىڭ مۇشەلەرىنە اكىم گرانتتارىن بەرۋگە ۇسىنىس جاساعانبىز. اتالعان اكىمدىكتەر كومەكتەستى، قالعاندارى ءالى قاراستىرۋدا. الدىن الا ايتا كەتەيىن: اياگۇل جازۋشىلار وداعىنىڭ مۇشەلىگىنە تۇركىستان وبلىسىنان قابىلداناتىن جاستاردىڭ تىزىمىندە تۇرعان. الايدا، ءارى پاندەميانىڭ كەسىرىنەن، ءارى تۇركىستان وبلىسى اكىمدىگىنىڭ جەرگىلىكتى قالامگەرلەردىڭ جيىنىن وتكىزەمىز دەگەن جاۋابىن كۇتۋمەن ۋاقىت ءوتىپ كەتتى. ءبىز ءالى دە تۇركىستان وبلىسىندا (نۇر-سۇلتاندا، تالدىقورعاندا، اقتوبەدە، پاۆلوداردا، تارازدا، شىمكەنتتە، وسكەمەندە، قاراعاندىدا وتكەن بولاتىن) جاڭا مۇشەلەردى قابىلداۋ ءراسىمىن وتكىزۋ ءۇشىن ءوڭىر باسشىلىعىنىڭ جاۋابىن كۇتىپ وتىرمىز.

ءۇشىنشى ايىپ: قازاقستان جازۋشىلار وداعى اياگۇلدىڭ تالانتىن بايقامادى!

- جاۋاپ: اياگۇل – تالانتى ەرتە تانىلعان قالامگەر. سونىڭ ارقاسىندا كەزىندە ۇلىقبەك ەسداۋلەت اعامىز ونى «قازاق ادەبيەتىنە» جۇمىسقا العان بولاتىن. كەيىن ماسكەۋگە وقۋعا بارام دەپ اياگۇل ءوزى گازەتىمىزدەن كەتىپ قالدى. ۇلىاعاڭ اياگۇلدى ءوزى ۇسىنىپ، «سەرپەر» سىيلىعىن (بۇرىنعى ايگىلى كومسومول سىيلىعىنىڭ مۇراگەر پرەمياسى) الۋىنا داۋىس بەرىپ، جاردەمدەسكەن ەدى. ودان بولەك، ۇلىقبەك اعا اياگۇلدەن وزگە دە ادەبي-رۋحاني قولداۋ-كومەگىن اياعان ەمەس. ماسەلەن، ۇلىقبەك اعا اياگۇلدىڭ «گاۋھار» اتتى اڭگىمەسىن تۇرىك تىلىنە اۋدارتىپ، انكارادا شىعاتۇعىن «كارداش كالامگەرلەر» جۋرنالىنا تۇرىكتىڭ جازۋشىسى، وسى باسىلىمنىڭ رەداكتورى، قازاقتىڭ ۇلكەن دوسى ياكۋب ومەروعلى مىرزاعا ايتىپ ءجۇرىپ، جاريالاپ بەرگەن. وعان مارقۇم اياش بالاشا قۋانىپ، راحمەتىن دە ايتقان. ماعان ۇلىاعاڭنىڭ ءوزى «وسى اياگۇل جاقسى كورەتىن قارىنداستارىمنىڭ ءبىرى» دەپ تالاي ايتقان بولاتىن. ۇلىقبەك اعانىڭ اياگۇلگە جاساعان قامقورلىعىنا ريزا بولعان قازاقتىڭ كلاسسيك جازۋشىسى دۋلات يسابەكتىڭ ءوزى قوڭىراۋ شالىپ: «قارىنداسىما جاساپ جۇرگەن جاقسىلىقتارىڭا كوپ راحمەت» دەپ العىس ايتقان كەزدەرى دە بولعان. بۇعان قۇداي دا، كوزى ءتىرى اعالارىمىز دا كۋا. ۇلىقبەك اعا اياگۇلدىڭ قازاسىنا بارشامىز سياقتى قاتتى قايعىردى. سول كۇندەرى اياگۇلدىڭ بارلىق شىعارمالارىن جيناقتاپ، ءبىر كىتاپ قىپ شىعارۋ كەرەك دەپ قازاقتىڭ اياۋلى اقىنى قاسىمحان بەگمانوۆ اعامىزعا ءوتىنىش جاسادى. ول كىسى بىردەن ەلەڭ ەتىپ، اياگۇلدىڭ كىتابىن «ءداستۇر» باسپاسىنان شىعارىپ بەرۋگە ۋادە بەردى. الايدا، مارقۇمنىڭ قولجازبالارى تەرگەۋدە جاتقاندىقتان، ول شارۋا ازىرگە توقتاپ تۇر. بىراق، بولاشاقتا بۇل دۇنيە ىسكە اسادى دەپ سەنەمىز. جاعدايدىڭ وسىنداي دەرەكتەرىن زەرتتەپ-بىلمەي جاتىپ، «اياگۇلدىڭ تالانتىن ەشكىم ەلەگەن جوق! اياگۇلگە ەشكىم كومەكتەسكەن جوق! انادان ساداعا كەت، مىنادان ساداعا كەت» دەپ ايتۋ دۇرىس پا، دۇرىس ەمەس پە، ءوزىڭىز شەشىڭىز، اعايىن!

ءتورتىنشى ايىپ: اياگۇلدىڭ جانازاسىنا، قىرقىنا جازۋشىلار وداعىنان ەشكىم بارعان جوق!

- جاۋاپ: بىرىنشىدەن، ءبىز بارعان كۇننىڭ وزىندە ءبارىبىر مارقۇمنىڭ جانازاسىنا ۇلگەرمەس ەدىك. ونىڭ ۇستىنە، قازىرگى كارانتين جاعدايىندا ءوز دەنساۋلىعىن قاتەرگە تىگىپ بارۋدىڭ ءوزى قانشالىقتى اقىلعا سىياتىن ءىس؟! ەشكىمگە سەن باراسىڭ دەپ ءبىز تاپسىرما بەرە المايمىز. قازىر كەز كەلگەن قازادا وتە شەكتەۋلى ادام قاتىساتىنىن ءبارى بىلەدى. سوندىقتان بۇل ايىپ نەگىزسىز دەپ بىلەمىن. اياگۇلدىڭ قىرقىنا تۇركىستان وبلىسى بويىنشا فيليالىمىزدىڭ ديرەكتورى الىبەك شەگەبايعا قاتىسشى دەپ ءوتىنىش ايتقان ەدىك، ول الماتىدامىن دەپ، ءوز كەزەگىندە شىمكەنتتەگى جازۋشى اعامىز مومبەك ابداكىمۇلىنا ءوتىنىش جاسادى. مومبەك اعامىز كەلىسىم بەرگەن ەدى، تاڭدا جولعا شىققالى تۇرعاندا اۋىرىپ تۇرعانىن سەزىپ، توقتاعاندى ءجون كورىپتى. ول كىسىگە ەش رەنىش جوق. جاعدايدىڭ ءتۇرى مىناۋ. باسقا قالامگەرگە ءبىزدىڭ وكىلىمىز رەتىندە اياگۇلدىڭ قىرقىنا قاتىسىپ، اناسىنا، تۋعان-تۋىسىنا كوڭىل ايتىپ بارىڭىز دەپ ايتۋعا مۇمكىندىگىمىز بولمادى،- دەپ جازدى اقبەرەن ەلگەزەك.

اقىن جەكە باسىنا قاتىستى ايتىلىپ جاتقان كەي پىكىرلەرگە دە توقتالدى. اقبەرەن ەلگەزەك اياگۇل مانتايدىڭ ءوزىن اقىن رەتىندە مويىنداماعانىن راستادى.

- ول راس اڭگىمە. وندا تۇرعان ەشتەڭە جوق. اركىمنىڭ ءوزىنىڭ دەربەس ادەبي-كوركەم تالعامى بولادى. ادەبيەتتە “سەن ناشارسىڭ”، “مەن ۇلىمىن” دەيتۇعىن پىكىرتالاستار بولىپ تۇرادى. ول قالىپتى نارسە. ونداي ءسوزدى اياگۇلدىڭ ءوزى دە از ەستىمەگەن بولار. وعان بولا ول جازۋىن تاستاپ، ادەبيەتتى تارك ەتىپ كەتكەن جوق قوي. اركىمنىڭ ءوز وقىرمانى بار. ۇناتقاندار - وقيدى، ۇناتپاسا - كىتابىڭدى جابا سالادى. پروبلەما جوق!، - دەيدى اقبەرەن ەلگەزەك.

ەسكە سالساق، 29 شىلدە كۇنى جازۋشى اياگۇل مانتاي تۇركىستان وبلىسىنا قاراستى جەتىسايداعى تۋعان ۇيىندە قايتىس بولدى. جازۋشىنىڭ ولىمىنە قاتىستى قازىرگى تاڭدا تەرگەۋ امالدارى ءجۇرىپ جاتىر. 

"ادىرنا" ۇلتتىق پورتالى

پىكىرلەر