ماڭعىستاۋ وبلىسىنىڭ بەينەۋ اۋدانىنداعى جەر ۇيدە قولدان جاسالعان جىلىتۋ قازاندىعىندا گاز جارىلدى، دەپ حابارلايدى "ادىرنا" ۇلتتىق پورتالى.
وقىس وقيعا اۋدان ورتالىعىندا 3 ءساۋىر كۇنى تۇندە تىركەلىپ، ءبىر ادام قايتىس بولدى.
«جارىلىس سالدارىنان جەكەمەنشىك ءۇي تولىعىمەن قيراپ، بەينەۋ اۋىلىنىڭ تۇرعىنى اۋرۋحانادا كوز جۇمدى. قايعىلى وقيعا تاڭعا جۋىق بولدى. بۇل تۋرالى «كازترانسگاز ايماق» اق اپاتتىق بريگاداسىنا توتەنشە جاعداي قىزمەتكەرى حابارلاعان. وقيعا ورنىنا جەتكەن ماماندار ۇيدە قولدان جاسالعان گاز پەشى ورناتىلعانىن انىقتادى. اپات تۋرالى اۋداندىق اكىمدىك پەن پوليتسياعا بىردەن حابار بەرىلدى. الدىن الا مالىمەتتەر بويىنشا، اۋاعا گاز تاراپ، بولمە ىشىنە تولعان. ۇيدە ورناتىلعان قولدان جاسالعان گاز قازاندىعىنا قاتىستى تەكسەرۋشى رتسكۋ مەكەمەسى بۇرىن وسى جابدىقتى اۋىستىرۋ تۋرالى ەسكەرتۋ بەرگەن ەكەن. بىراق ءۇي يەلەرى ول ەسكەرتۋدى ەلەمەگەنگە ۇقسايدى. قايعىلى وقيعا سەبەپتەرى تەكسەرىس قورىتىندىسى بويىنشا انىقتالادى»، - دەپ جازىلعان «قازترانسگاز ايماق» اق-نىڭ قوعاممەن بايلانىس دەپارتامەنتى تاراتقان مالىمەتتە.
