قاراعاندى وبلىسى، بۇقار جىراۋ اۋدانى، بوتاقارا اۋىلىنىڭ احاج عيماراتىندا بولعان وقيعا ەلدى ەلەڭ ەتكىزدى. اجىراسىپ جاتقان ازاماتتار اراسىندا داۋ تۋىپ، ەر ادام ايەلىنە پىشاق ۇردى. وكىنىشكە قاراي، دەنەسىنە بىرنەشە رەت سۇعىلعان سۋىق قارۋدىڭ سالدارىنان ايەل كوز جۇمدى، دەپ حابارلايدى "ادىرنا" ۇلتتىق پورتالى.
"ۆەچەرنيايا كاراگاندا" باسىلىمىنىڭ حابارلاۋىنشا، ايەل اۋىر جاراقاتتان قايتىس بولعان.
اجىراسۋ راسىمىنە قاتىسۋ ءۇشىن كۇيەۋى الماتىدان ارنايى بارعان. ايەلى قىزىمەن ۇزاق ۋاقىت بولەك تۇرعان.
پوليتسيا وقيعاعا قاتىستى مىنانداي تۇسىنىك بەردى:
"اتالعان فاكتىگە قاتىستى قر قىلمىستىق كودەكسىنىڭ 99-بابىنىڭ 1-بولىگى "ادام ءولتىرۋ" بويىنشا قىلمىستىق ءىس قوزعالدى. كۇدىكتى قاماۋعا الىندى. تەرگەۋ امالدارى جۇرگىزىلىپ جاتىر", - دەپ حابارلادى قاراعاندى وبلىسى پوليتسيا دەپارتامەنتىنىڭ ءباسپاسوز قىزمەتى.
"ادىرنا" ۇلتتىق پورتالى
