قر ءبىلىم جانە عىلىم مينيسترلىگىنە ۆەدومستۆولىق باعىنىشتى جوو وقىتۋشىلارىنىڭ جالاقىسى وسى جىلدىڭ قىركۇيەگىنەن باستاپ ءوستى، دەپ حابارلايدى "ادىرنا" ۇلتتىق پورتالى.
قر بعم ءباسپاسوز قىزمەتىنىڭ مالىمەتىنشە، ەندى ۋنيۆەرسيتەت وقىتۋشىلارى ايىنا كەمىندە 200 مىڭ تەڭگە الاتىن بولادى. اعا وقىتۋشى كەمىندە 230 مىڭ تەڭگە، قاۋىمداستىرىلعان پروفەسسور – 260 مىڭ تەڭگە، پروفەسسور – 350 مىڭ تەڭگە (ۇلتتىق جوعارى وقۋ ورىندارىندا – 400 مىڭ تەڭگە) الادى.
- مەملەكەت باسشىسىنىڭ قولداۋىنىڭ ارقاسىندا مينيسترلىك جوعارى وقۋ ورىندارىنىڭ شتاتتىق قىزمەتكەرلەرىنە مينيمالدىق جالاقى بەلگىلەۋ تۋرالى بۇيرىق قابىلدادى. قر بعم-گە باعىنىشتى جوو وقىتۋشىلارىنىڭ جالاقىسى ارتتى. سونداي-اق ءبىر ستاۆكانىڭ ماكسيمالدى كولەمى ەندى ءبىر وقۋ جىلىندا 680 ساعاتتان اسپايدى. ياعني، وقۋ جۇكتەمەسى تومەندەتىلەدى. وزگەرىس پروفەسسورلىق-وقىتۋشىلىق قۇرامنىڭ عىلىمي قىزمەتپەن اينالىسۋى ءۇشىن مۇمكىندىك پەن ۋاقىتتىڭ كوبىرەك بولۋىن كوزدەيدى - دەپ اتاپ ءوتتى ءبىلىم جانە عىلىم ۆيتسە-ءمينيسترى قۋانىش ەرعاليەۆ.
ەستەرىڭىزگە سالا كەتەيىك، بۇعان دەيىن ۇلتتىق قوعامدىق سەنىم كەڭەسىنىڭ وتىرىسىندا مەملەكەت باسشىسى جوو وقىتۋشىلارىنىڭ جالاقىسىن كوتەرۋدى تاپسىرعان بولاتىن. 2019 جىلعى قىركۇيەكتە بعم-گە ۆەدومستۆولىق باعىنىشتى جوو پروفەسسور-وقىتۋشىلار قۇرامىنىڭ ەڭبەكاقىسى 20%-كە، 2020 جىلعى قىركۇيەكتە تاعى دا 20%-كە ۇلعايتىلدى. جالاقىنى ەداۋىر ارتتىرۋ بارىسىندا ونىڭ مينيمالدىق مولشەرى جانە پەداگوگيكالىق جۇكتەمەنىڭ ماكسيمالدى كولەمى بەلگىلەندى.
"ادىرنا" ۇلتتىق پورتالى
