"بوكس" اعىلشىن تىلىندە "بەلگىلى ءبىر ەرەجەمەن وتەتىن "جەكپە-جەك" دەپ اتالادى. جالپى، "بوكس" دەگەن ءسوزدىڭ ءوزى جەكە دەگەندى بىلدىرەدى. مىسالى، اۋرۋحاناداعى جەكە ءبولىم "بوكس" دەپ اتالادى. اسكەري كازارمالاردا، سۇڭگۋىر قايىقتاردا جانە ت.ت. "بوكس" بار. ەرلەردىڭ وقشاۋ شاش قويۋى دا بوكس دەپ اتالادى...
ەندى ونى "جەكپە-جەك" دەيتىن بولساق، وندا ونىڭ بەلگىلى ءبىر ەرەجەلەرى بولۋى مىندەتتى. ءاربىر بوكسشى ءوز شەبەرلىگىن سول ەرەجەلەرگە ساي شىڭدايدى، جەتىلدىرەدى. سوندىقتان "بوكس" ءبىر كەزدەرى تەك شەبەرلىك ەمەس، ونەر دەپ تە قابىلدانا باستادى.
مىسالى، الىسقا بارماي-اق، ءوزىمىزدىڭ سەرىك قوناقباەۆتىڭ شەبەرلىگىن الايىق. سەرىك وتە سۇلۋ بوكس ونەرىن كورسەتە الدى. ودان كەيىن وعان ۇقساعان بىرنەشە قازاقستاندىق سپورتشىلار بوكستى جوعارعى ونەر دەڭگەيىنە كوتەرىپ، الەمدىك "باركەر كۋبوگى" يەگەرلەرى اتالعانى ەسىمىزدە.
قازىرگى وليمپياداعى "بوكستى" كورىپ وتىرىپ، ادامنىڭ ونى كورگىسى كەلمەيتىنى راس. بوكس - كوشە توبەلەسىنە اينالىپتى. ونىڭ باستى بەلگىلەرى:
- وڭدى-سولدى قولدى سەرمەۋ - بەينەبىر كوشەدە توپ-توپ بولىپ توبەلەسكەندەر سياقتى;
- امالى ءسال تاۋسىلسا - قارسىلاسىنا سالبىراپ ىلىنە كەتۋ، كۇرەسۋ، باسپەن، شىنتاقپەن ۇرۋ جانە ت.ت. "كوشە توبەلەسىنىڭ" بەلگىلەرى بوكستى جاۋلاپ العان;
- قارسىلاسىن قولعاپتىڭ ءجىپ بايلانعان ىشىمەن ۇرىپ جاراقاتتاۋ;
- جەلكەدەن، ارقادان، تومەننەن ت.ت. ەرەجەگە ساي كەلمەيتىن سوققىلار جاساۋ;
- ودان وزگە دە قيتۇرقى امالدار قولدانۋ....
قازىرگى تورەشىلەر وسىنىڭ ءبارىن كورىپ وتىرسا دا، ونى "لاس بوكس" جانە "تازا بوكس" ەكەنىن ءبىلىپ وتىرسا دا - تورەلىك ەتكەندە "لاس" پەن "تازا" ەشبىر ەسكەرىلمەيدى. كىم قولىن كوبىرەك شوشاڭداتسا، سول جەڭىپ شىعادى... بەينەبىر "بەتپاقتاردىڭ بەت تىرناسۋىنا" تورەلىك ەتكەندەي...
ەگەردە، ولار بوكسشىنىڭ ءاربىر "لاس قيمىلى" ءۇشىن "ايىپ ۇپايىن" بەلگىلەسە - مۇنداي سوراقىلىق بولماس ەدى. ء(تارتىپ بۇزعانى ءۇشىن سالىناتىن ايىپپۇل سياقتى).
ول بولماۋى سەبەپتى، قازىرگى بوكستا شىن بوكسشىلار كوبىنە "كوشە حۋليگاندارىنان" تاياق جەپ، ۇتىلىپ جاتىر. ونداي "لاس بوكسقا" كوپتەگەن ەلدەردىڭ بوكسشىلارى ابدەن ۇيرەنىپ، اككىلەنىپ العان.
مىسالى، ول ءتاسىلدى مىنا باۋىرلاس وزبەك بوكسشىلارى دا ءجيى قولدانادى... افريكالىقتار دا، امەريكالىقتار دا ودان كەتارى ەمەس..
ال ءبىزدىڭ قازاق بوكسشىلارى ءالى كۇنگە بوكستى "ونەر" ساناپ، جارىستارعا وسى تاكتيكامەن كەلەدى.
ءبىز ءوز قارسىلاستارىمىز دا سولاي بوكس كورسەتەدى دەپ ويلايمىز دا، وسىنداي شەبەرلىكتى باستى ورىنعا قويامىز. رومانتيكپىز. ناتيجەسىندە، ءبىزدىڭ "تازا بوكس" دەگەن ونەرىمىز "لاس بوكستان" وڭباي تاياق جەۋدە. نە ىستەۋ كەرەك؟ "لاس بوكستى" ۇيرەتسەك - وزىندىك "قازاقستاندىق" دەپ اتالاتىن تاماشا ءستيلدى جوعالتامىز.ۇيرەنبەسەك - بوكستى "كوشە حۋليگاندارى" تاپتاپ بارادى...
ولاي بولسا، قازاقستاندىق بوكس فەدەراتسياسى حالىقارالىق وليمپيادا كوميتەتىنە "بوكس وليمپيادا باعدارلاماسىنان الىنىپ تاستالسىن" دەگەن تالاپ قويۋى كەرەك. (قازىرگى بوكستىڭ شىن بوكس بولماي قالعانىن دالەلدەيتىن ماتەريالدار جەتكىلىكتى. سولاردى العا تارتىپ، وسىلاي تالاپ قويىلسىن). بولماسا،قازىرگى بوكستاسۋ ەرەجەسىنە وتە ماڭىزدى، اسىرەسە، "لاس بوكستى" تەجەيتىن ەرەجەلەردى جاساپ شىعۋ تالاپ ەتىلسىن! سونىمەن قاتار، تورەشىلەرگە قويىلاتىن تالاپتار دا تۇبىرىمەن قايتا قارالسىن دەگەن تالاپ قويۋ كەرەك! سوندا قازاق بوكسىنىڭ كوسەگەسى كوگەرەدى...
ءابدىراشيت باكىرۇلى،
"ادىرنا" ۇلتتىق پورتالى
