قاسىم-جومارت توقاەۆتىڭ رەسەي فەدەراتسياسىنا مەملەكەتتىك ساپارى اياسىندا ماسكەۋ قالاسىندا «قازاقستان مەن رەسەي دوستىعى» سكۆەرىنىڭ اشىلۋ سالتاناتى ءوتتى. جاڭا ساياباق ماسكەۋدىڭ وڭتۇستىك اكىمشىلىك وكرۋگىندە، «الما-اتينسكايا» ستانتسياسىنىڭ ماڭىندا ورنالاسقان.
سالتاناتتى ءىس-شاراعا قر مادەنيەت جانە اقپارات ءمينيسترى ايدا بالاەۆا، رف فەدەرالدىق جينالىسى فەدەراتسيا كەڭەسى توراعاسىنىڭ ءبىرىنشى ورىنباسارى اندرەي ياتسكين، ديپلوماتيالىق كورپۋس وكىلدەرى، سونداي-اق رەسەي مەن قازاقستاننىڭ تانىمال مادەنيەت جانە ونەر قايراتكەرلەرى قاتىستى.
«رەسەي مەن قازاقستان حالىقتارىنىڭ دوستىعىنا ارنالعان تاماشا سكۆەردىڭ اشىلۋ راسىمىنە قاتىسۋ – مەن ءۇشىن زور مارتەبە. يگى جوبا ماسكەۋ قالاسى ۇكىمەتىنىڭ باستاماسىمەن قولعا الىنىپ، رەسەي فەدەراتسياسىنىڭ سىرتقى ىستەر مينيسترلىگى قولداۋىمەن جۇزەگە اسىپ وتىر. بۇل – ەكى ەل اراسىنداعى ستراتەگيالىق ارىپتەستىك پەن تاتۋ كورشىلىك قاتىناستاردىڭ جوعارى دەڭگەيىن كورسەتەدى. سكۆەردىڭ قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆتىڭ تاريحي مەملەكەتتىك ساپارى قارساڭىندا اشىلىپ وتىرعانى دا ەرەكشە مانگە يە. ارينە، ماسكەۋدە دە، رەسەيدىڭ باسقا ايماقتارىندا دا، قازاقستاندا دا وسىنداي قوعامدىق ورىندار از ەمەس. دەگەنمەن، ولاردىڭ كوبىرەك بولعانى يگى، سەبەبى مۇنداي نىساندار ەكى ەل اراسىنداعى ءداستۇرلى دوستىق پەن ۇرپاقتار ساباقتاستىعىن ايعاقتاي تۇسەدى»، – دەدى اندرەي ياتسكين.
ءىس-شارا بارىسىندا ايدا بالاەۆا رەسەي مەن قازاقستاندى عاسىرلار بويى قالىپتاسقان تاتۋ كورشىلىك داستۇرلەرى مەن ورتاق رۋحاني قۇندىلىقتارعا نەگىزدەلگەن بەرىك بايلانىس بىرىكتىرەتىنىن ايتتى. بۇل بايلانىسقا تاريحى تەرەڭدە جاتقان مادەني ىنتىماقتاستىقتىڭ ۇزدىكسىز دامۋى نەگىزگى تىرەك بولىپ وتىر.
ءمينيستردىڭ پىكىرىنشە، مادەنيەت ەكى ەل ءۇشىن دە اعارتۋشىلىققا، ۇلتتىق بولمىس پەن بىرلىككە باستايتىن «رۋحاني كوپىرگە» اينالدى. ول ءوز سوزىندە وسى جىل دا حالىقتار اراسىنداعى مادەني جانە شىعارماشىلىق بايلانىستاردىڭ مىزعىماس داستۇرگە جانە باي مازمۇنعا يە ەكەنىن تاعى ءبىر مارتە دالەلدەگەنىن اتاپ ءوتتى.
ايتا كەتۋ كەرەك، بيىلعى مامىر ايىندا استانادا «قازاقستان مەن رەسەيدىڭ ماڭگىلىك دوستىعى» اللەياسى اشىلعان بولاتىن.
