ء"بىر-بىرىمىزگە دايىن سۇراقتار قويمايىق". بۇل پىكىردى قر وقۋ اعارتۋ ءمينيسترى اسحات ايماعامبەتوۆ سەمەي تۇرعىندارىمەن كەزدەسۋ كەزىندە ايتتى، دەپ جازادى "ادىرنا" ۇلتتىق پورتالى.
Arnapress.kz حابارلاۋىنشا، كەزدەسۋ بارىسىندا مينيستردەن "مەكتەپتە قانداي ۇيىرمەگە قاتىستىڭىز" دەپ سۇرادى. اسحات ايماعامبەتوۆ مۇنداي الدىن-الا دايىندالعان سۇراقتاردى قويماۋعا شاقىردى.
"مۇنداي سۇراقتار قويىلماۋى كەرەك. ءبىز جاڭا قازاقستان دەپ ايتامىز. ادىلەتتى قازاقستان قۇرىپ جاتىرمىز. بۇل ەڭ الدىمەن بۇل ءبىلىم بەرۋ سالاسىنان باستالادى. ءبىر-بىرىمىزگە دايىن سۇراقتار قويۋ تىپتەن ۇيات. مەن سىزدەردىڭ كەز-كەلگەن سۇراقتارىڭىزعا جاۋاپ بەرۋگە دايىنمىن. پروبلەمالىق سۇراقتار بار ما؟ ارينە، بار. ءبىز بۇل ماسەلەلەردى تالقىلاپ، شەشۋگە تىرىسامىز. مەكتەپتەگى ماتەريالدىق-تەحنيكالىق بازاعا قاتىستى، وقۋلىقتار مەن وقۋ باعدارلامالارىنا، اتتەستاتسياعا قاتىستى سۇراقتار وتە كوپ. بىزگە سولاردى قويىڭىزدار، ءبىزدىڭ ساپارىمىزدىڭ باستى ماقساتى – كەلۋ، اشىق سويلەسۋ" - دەدى مينيستر.
"ادىرنا" ۇلتتىق پورتالى
