قازاقستاندىق اسەل ايتپاەۆانى زورلادى دەپ ايىپتالعان بەسيك توردۋانىڭ ولىمىنە مي ينفاركتى سەبەپ بولۋى مۇمكىن، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
2021 جىلدىڭ 28 مامىرىندا ەلدىڭ ارنايى پەنيتەنتسيارلىق قىزمەتىندە ايىپتالۋشىعا مەديتسينالىق تەكسەرۋ جۇرگىزىلىپ، ارتەريالىق گيپەرتەنزيا دياگنوزى قويىلعان. سوعان بايلانىستى ول ۇنەمى مەديتسينا قىزمەتكەرلەرىنىڭ باقىلاۋىندا بولدى.
2021 جىلدىڭ 30 ماۋسىمىندا توردۋا دارىگەرگە باسى قاتتى اۋىرىپ تۇرعانىن، ەسىنەن تانىپ قالعانىن ايتقان. ول سويلەۋ قابىلەتىنىڭ بۇزىلۋىنا جانە قان قىسىمىنىڭ جوعارىلاۋىنا اكەلگەن.
توردۋا جەدەل جاردەممەن ازاماتتىق ەمحاناعا جەتكىزىلدى. ەمحانادا جۇرگىزىلگەن ميدىڭ كومپيۋتەرلىك توموگرافياسىنىڭ ناتيجەسى جانە نەۆرولوگتىڭ كەڭەسى بويىنشا وعان مي ينفاركتى دياگنوزى قويىلدى.
«اۋىر جاعدايدا بولعانىنا بايلانىستى ايىپتالۋشى جانساقتاۋ بولىمىنە جاتقىزىلدى، ەم قابىلداپ، ينتەنسيۆتى باقىلاۋدا بولدى. نەيروحيرۋرگتىڭ كەڭەسىنە بايلانىستى شۇعىل وپەراتسيا جاساۋ قاجەتتىلىگى تۋىندادى. وپەراتسيادان كەيىن ناۋقاستىڭ جالپى جاعدايى اۋىر، گەموديناميكا كورسەتكىشتەرى تۇراقسىز بولىپ قالا بەردى»، - دەلىنگەن پەنيتەنتسيارلىق قىزمەتتىڭ حابارلاماسىندا.
ەم كورسەتىلگەنىنە قاراماستان ناۋقاستىڭ جاعدايى ناشارلادى. 2021 جىلدىڭ 14 شىلدەسىندە جۇرەك ىرعاعى بۇزىلىپ، كوپ ۇزاماي ونىڭ جۇمىسى توقتادى.
«جۇرەك-وكپە رەانيماتسياسى حاتتاماعا تولىق سايكەس باستالدى، بىراق جۇرەكتىڭ مەحانيكالىق فۋنكتسياسىن قالپىنا كەلتىرە المادى. ناۋقاس قايتىس بولدى»، - دەلىنگەن حابارلامادا.
ايتا كەتەيىك، بۇعان دەيىن 26 جاستاعى قازاقستان ازاماتى اسەل ايتپاەۆانى زورلادى دەپ ايىپتالعان بەسيك توردۋا تۇرمەدە ءولى تابىلعانى تۋرالى اقپارات تارادى.
ءىس بويىنشا تەرگەۋ ءالى اياقتالعان جوق.
"ادىرنا" ۇلتتىق پورتالى
